រដ្ឋបាលរាជធានីភ្នំពេញនៅថ្ងៃទី៣ ខែមេសានេះ បានជូនដំណឹងពីការផ្អាកដំណើរការ ផ្សារអូឬស្សី ជាបណ្តោះអាសន្នចំនួន១៤ថ្ងៃ ដោយសារមានករណីឆ្លងជំងឺកូវីដ១៩មួយចំនួននៅទីនោះ។
ក្នុងសេចក្តីជូនដំណឹងរបស់សាលារាជធានីបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ មានអាជីវករ ក៏ដូចជាសន្តិសុខផ្សារមួយចំនួនបានឆ្លងជំងឺកូវីដ១៩ ពីព្រឹត្តិការណ៍ ២០ កុម្ភៈ ឆ្នាំ២០២១ ដោយមានការរីករាលដាលបន្តបន្ទាប់ជាច្រើនតូប និងទីតាំងខុសៗគ្នាក្នុងបរិវេណផ្សារអូឬស្សី បានបង្កជាការព្រួយបារម្ភ ដែលតម្រូវឲ្យចាំបាច់មានវិធានការសុខាភិបាលទប់ស្កាត់ជាបន្ទាន់។
សេចក្តីជូនដំណឹងនោះបញ្ជាក់ថា៖ «រដ្ឋបាលរាជធានីភ្នំពេញ សូមផ្អាកដំណើរការបណ្តោះអាសន្នមជ្ឈមណ្ឌលពាណិជ្ជកម្មផ្សារអូឬស្សីរយៈពេល១៤ថ្ងៃ គិតចាប់ពីថ្ងៃទី៤ ខែមេសា ឆ្នាំ២០២១ ដល់ថ្ងៃទី១៧ ខែមេសា ឆ្នាំ២០២១ ដើម្បីបង្ការ និងទប់ស្កាត់ការឆ្លងរាលដាលវីរុសកូវីដ១៩ ទៅដល់បងប្អូនអាជីវករ អតិថិជន ក៏ដូចជាប្រជាពលរដ្ឋដែលចេញចូលផ្សារនេះ»។
សាលារាជធានីក៏បានបន្ថែមថា រដ្ឋបាលរាជធានីនឹងធានារ៉ាប់រងចំពោះសន្តិសុខ និងសុវត្ថិភាព ចំពោះសម្ភារៈ និងឥវ៉ាន់គ្រប់ប្រភេទរបស់បងប្អូនអាជីវករ ដែលបានរក្សាទុកក្នុងតូបនីមួយៗ មិនឲ្យបាត់បង់ និងមិនតម្រូវឲ្យមានការបង់ថ្លៃសេវាឡើយ។ ដោយឡែក បន្លែ ផ្លែឈើ ត្រី សាច់ ស៊ុត ។ល។ រដ្ឋបាលរាជធានីភ្នំពេញស្នើសុំឲ្យអាជីវករទាក់ទងជាមួយគណៈកម្មការផ្សារ យកទៅរក្សាទុកដោយខ្លួនឯង ដើម្បីជៀសវាងការខូចខាតជាយថាហេតុ។
គិតត្រឹមថ្ងៃទី៣ ខែមេសា ឆ្នាំ២០២១ មានអ្នកឆ្លងជំងឺកូវីដ១៩ សរុបចំនួន ២,៦៨៩ករណី មានអ្នកជាសះស្បើយចំនួន១,៦៥៣នាក់ អ្នកកំពុងសម្រាកព្យាបាលចំនួន១,០១២នាក់ និងមានអ្នកស្លាប់ចំនួន១៩នាក់៕