លោក​នាយករដ្ឋមន្រ្តី ហ៊ុន សែន នៅ​ថ្ងៃ​ព្រហស្បតិ៍​ បាន​បង្ហាញ​រូបរាង​នាឡិកា​ដៃ​​ដែល​កម្ពុជា​ផលិត​បាន សម្រាប់​ជូន​ជា​វត្ថុ​អនុស្សាវរីយ៍​ដល់​ប្រធាន​គណៈ​ប្រតិភូ​ដែល​អញ្ជើញ​ចូលរួម​ក្នុង​កិច្ច​ប្រជុំ​កំពូល​អាស៊ាន​នៅ​រាជធានីភ្នំពេញ នា​សប្តាហ៍​ក្រោយ​នេះ។​

បើតាម​សារ​ដែល​លោក​នាយករដ្ឋមន្រ្តី​ ហ៊ុន សែន បង្ហោះ​លើ​ទំព័រ​ហ្វេសប៊ុក​ផ្លូវ​ការ​របស់​លោក​​នៅ​យប់​ថ្ងៃ​ទី​៣ ខែ​វិច្ឆិកា ឆ្នាំ​២០២២ បញ្ជាក់ថា កម្ពុជាបានផលិត​នាឡិកា​ដៃ​ចំនួន​២៥គ្រឿង​សម្រាប់​ជា​វត្ថុ​អនុស្សាវរីយ៍​ជូន​ប្រធាន​គណៈប្រតិភូ ​ដែល​អញ្ជើញ​មក​ចូលរួម​ប្រជុំ​កំពូល​អាស៊ាន​​នៅកម្ពុជា ឆ្នាំ២០២២។

បើតាម​រូប​ដែល​លោក​នាយករដ្ឋមន្រ្តី​បង្ហោះ នាឡិកា​ដៃ​នោះ​មាន​ស្លាក​ដាក់​ថា «ASEAN Cambodia 2022»។

លោកនាយករដ្ឋមន្រ្តី​បញ្ជាក់​ក្នុង​ន័យ​ដើម​ថា៖ «នាឡិកា​នេះត្រូ​វបា​ន​រៀបចំ​ផ្គុំឡើង​ដោយ​អ្នក​បច្ចេកទេស​ខ្មែរ​សុទ្ធសាធ​ដែល​ជា​ផ្នែក​មួយ​នៃ​ការរីកចំរើន​ខាងវិទ្យាសាស្រ្ត និង​បច្ចេកទេស​​​របស់​កម្ពុជា»។

គួរបញ្ជាក់ដែរថា កិច្ចប្រជុំកំពូលអាស៊ាន​​ទិ​៤០ និង​៤១ និង​កិច្ច​ប្រជុំ​ពាក់ព័ន្ធនានា​ នឹង​ធ្វើ​ឡើង​​នៅ​រាជធានី​ភ្នំពេញ​ ចាប់ពី​​ថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២នេះ ដោយ​មាន​ការចូលរួម​ពី​ថ្នាក់ដឹកនាំអាស៊ាន ថ្នាក់ដឹកនាំប្រទេសដៃគូ និងប្រធានស្ថាប័នពិភពលោក​មួយ​ចំនួន៕​