ក្រុមយុវជនចលនាមាតាធម្មជាតិ បង្ហាញការព្រួយបារម្ភពីការបាត់បង់ឧទ្យានជាតិគិរីរម្យ ក្រោយរដ្ឋាភិបាលអនុញ្ញាតឱ្យបុគ្គល និងក្រុមហ៊ុនឯកជន បានកាន់កាប់ដីមួយចំណែកធំនៃតំបន់ឧទ្យានជាតិនេះ។
យុវតីចលនាមាតាធម្មជាតិ កញ្ញា ស៊ុន រដ្ឋា បានឱ្យដឹងថា នៅតំបន់ការពារឧទ្យានជាតិគិរីរម្យ ខេត្តកំពង់ស្ពឺ ត្រូវបានកាន់កាប់មួយចំណែកធំដោយបុគ្គលឯកជន ឬក្រុមហ៊ុនឯកជនរបស់អ្នកមានអំណាច ដែលគេគ្រប់គ្នាដឹងថាជាខ្សែស្រឡាយរបស់លោកស្រី ជឹង សុភាព (ហៅយាយភូ)។ ប្រភពដដែល បន្តថា ក្រុមហ៊ុនមួយដែលមានឈ្មោះថា One More ជាក្រុមហ៊ុនរបស់កូនស្រីបង្កើតរបស់លោកស្រី ជឹង សុភាព នោះគឺលោកស្រី ជឹង សុគន្ធាវី និងជាបុគ្គលដែលបានទទួលកាន់កាប់ដីមួយចំណែកធំនៅតំបន់ឧទ្យានជាតិគិរីរម្យមួយនេះ។
កញ្ញាថា៖ «ដីដែលនៅឧទ្យានជាតិគិរីរម្យដែលត្រូវបានកាត់ហ្នឹងមានចំនួនប្រមាណ ២២១ហិកតា ដែល[រដ្ឋាភិបាល]កាត់ទៅឱ្យបុគ្គលឯកជនហ្នឹង»។
កញ្ញាបន្ថែមថា៖ «ឧទ្យានជាតិគិរីរម្យហ្នឹង ត្រូវបានកាត់ទៅឱ្យក្រុមហ៊ុនឯកជនដែលមានឈ្មោះថា One More Co.LTD កាលពីថ្ងៃទី២៧ ខែមិថុនា ឆ្នាំ២០២២»។
ជាអ្នកខេត្តបាត់ដំបង យុវតីមានវ័យ ២៨ឆ្នាំរូបនេះ បានបង្ហាញក្តីបារម្ភពីអនាគតតំបន់ការពារឧទ្យានជាតិគិរីរម្យ ថាអាចនឹងមានវាសនាដូចទៅនឹងតំបន់អភិរក្សភ្នំតាម៉ៅ ខេត្តតាកែវ ដែលធ្លាប់ត្រូវបានទន្រ្ទាន និងកាប់ឈើយ៉ាងអាណាធិបតេយ្យ។
កញ្ញា ស៊ុន រដ្ឋា និយាយថា៖ «យើងមានក្តីបារម្ភថាឧទ្យានជាតិគិរីរម្យ នឹងត្រូវបានបំផ្លាញ ឬក៏អាចនឹងមានវាសនាដូចភ្នំតាម៉ៅ ទើបយើងបង្ហាញពីក្តីបារម្ភ ហើយយើងក៏ចង់ទាមទារឱ្យដីទាំងអស់ហ្នឹងក្លាយទៅជាឧទ្យានជាតិវិញ»។
ក្តីបារម្ភនេះ បានកើតឡើងបន្ទាប់ពីរដ្ឋាភិបាល កាលពីថ្ងៃទី២៧ ខែមិថុនា ឆ្នាំ២០២២ បានចេញអនុក្រឹត្យ កំណត់ជាតំបន់ប្រើប្រាស់ដោយចីរភាពផ្ទៃដីទំហំជាង ២២១ហិកតា ក្នុងឧទ្យានជាតិព្រះសុរាម្រិត-កុសមៈ គិរីរម្យ ក្នុងភូមិសាស្ត្រឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ សម្រាប់ផ្តល់ជូនក្រុមហ៊ុនវ័នម៉រ (One More Ltd.)។
យុវតីចលនាមាតាធម្មជាតិម្នាក់ទៀតគឺកញ្ញា ធូន ស្រីពៅ វ័យ២២ឆ្នាំ បានឱ្យដឹងថា រមណីយដ្ឋានឧទ្យានជាតិគិរីរម្យនេះ សម្បូរទៅដោយទេសភាពធម្មជាតិស្រស់បំព្រង និងជាកន្លែងទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ ព្រោះលម្អដោយដើមស្រល់និងមានទឹកជ្រោះធ្លាក់ជាច្រើនអន្លើ ហើយមានប្រភេទសត្វជាច្រើនអំបូររស់នៅទីនោះផងដែរ។ ករណីនេះ កញ្ញាបារម្ភពីការបាត់បង់ធនធានធម្មជាតិ និងសត្វព្រៃកម្រនៅតំបន់ការពារមួយនេះ ក្រោយរដ្ឋាភិបាល ផ្តល់ទៅឱ្យបុគ្គល ឬក្រុមហ៊ុនឯកជនកាន់កាប់។
កញ្ញាធួន ស្រីពៅ និយាយថា៖ «គិរីរម្យជាដីដែលសម្បូរទៅដោយព្រៃឈើ ជាកន្លែងដែលសម្បូរដោយធនធានធម្មជាតិ ហើយតំបន់ហ្នឹងសុទ្ធតែជាតំបន់ដែលកំពុងបម្រើដល់វិស័យទេសចរណ៍ខ្លាំងមែនទែន។ យើងគិតមើលគិរីរម្យអាចរកចំណូលជូនជាតិបានច្រើន មានទាំងពលរដ្ឋខ្មែរ និងភ្ញៀវបរទេស ក៏តែងតែទៅលេងកម្សាន្តនៅទីនោះ»។
មិនខុសគ្នានេះដែរ យុវជនចលនាមាតាធម្មជាតិម្នាក់ទៀតគឺកញ្ញា ឡុង គន្ធា ក៏បានបង្ហាញការខកចិត្តជាខ្លាំងផងដែរ ចំពោះការផ្តល់ដីកម្មសិទិ្ធរបស់រដ្ឋ ឱ្យទៅឯកជនកាន់កាប់មួយចំណែកធំបែបនេះ។ ប្រភពបន្ថែមថា តំបន់ឧទ្យានជាតិគិរីរម្យមួយនេះ បាននិងកំពុងស្ថិតនៅក្រោមរូបភាពគម្រោងនៃការអភិវឌ្ឍរបស់ក្រុមហ៊ុនឯកជន ដែលក្រុមយុវជនរបស់កញ្ញាបារម្ភថា វានឹងមានវាសនាដូចទៅនឹងគម្រោងនៃការអភិវឌ្ឍតំបន់អភិរក្សភ្នំតាម៉ៅ។
កញ្ញាថា៖ «ខ្ញុំមានការព្រួយបាម្ភការកាត់ដីឧទ្យានជាតិគិរីរម្យទៅឱ្យឯកជនដើម្បីធ្វើការអភិវឌ្ឍ យើងបារម្ភវាសនាឧទ្យានជាតិគិរីរម្យថាអាចនឹងមានវាសនាដូចជាភ្នំតាម៉ៅដែលយើងឃើញហើយគម្រោងនៃការអភិវឌ្ឍ តែងតែមានការបំផ្លាញធនធានធម្មជាតិ»។
យ៉ាងណាមិញ កញ្ញាស្នើទៅដល់រដ្ឋាភិបាល និងមន្ត្រីពាក់ព័ន្ធ គួរដកហូតដីដែលបានប្រគល់ឱ្យក្រុមហ៊ុនឯកជនកាន់កាប់មួយចំណែកធំនៅតំបន់គិរីរម្យនោះ មកទុកជាប្រយោជន៍សម្រាប់សង្គមជាតិឡើងវិញ។
កញ្ញាឡុង គន្ធា ស្នើថា៖ «គួរទុកតំបន់ទាំងអស់ហ្នឹង ទុកជាប្រយោជន៍ដល់ប្រទេសជាតិ និងសម្រាប់ប្រជាជនទូទៅទេសចរណ៍លេងកម្សាន្ត មិនគួរកាត់ទៅឱ្យឯកជនកាន់កាប់នោះទេ ណាមួយវាជាសម្បត្តិជាតិ ហើយក៏សម្បូរធនធានធម្មជាតិទៀត»។
ឧទ្យានជាតិព្រះសុរាម្រិតកុសុមៈគិរីរម្យ ជាតំបន់ខ្ពង់រាបមួយដែលស្ថិតនៅទិសខាងត្បូងឆៀងខាងលិចប្រទេសកម្ពុជា។ ឧទ្យានជាតិនេះ ត្រូវមានចាត់ទុកជាតំបន់ព្រៃស្រល់ធំជាងគេនៅប្រទេសកម្ពុជា។ តំបន់គិរីរម្យ ត្រូវបានកំណត់ជាតំបន់ឧទ្យានជាតិ នៅឆ្នាំ១៩៩៣ ដោយព្រះរាជក្រឹត្យរបស់សម្តេចព្រះបាទនរោត្តម សីហនុ និងត្រូវបានសម្ពោធដាក់ទៅជាឧទ្យានជាតិព្រះសុរាម្រិតកុសុមៈ «គិរីរម្យ» កាលពីខែមិថុនា ឆ្នាំ១៩៩៥ ដែលមានផ្ទៃដីទំហំជាង ៣០ ០០០ (៣ម៉ឺនហិកតា)។
ពាក់ព័ន្ធនឹងរឿងនេះ ប្រធានមន្ទីរបរិស្ថានខេត្តកំពង់ស្ពឺលោក ឱម ម៉ាក់ធារី ឆ្លើយបតយ៉ាងខ្លីថា ការលើកឡើងរបស់យុវជនមាតាធម្មជាតិ ជាសិទ្ធិរបស់ពួកគេ ខណៈអាជ្ញាធរអនុវត្តទៅតាមច្បាប់ និងអនុក្រឹត្យ។
លោកថា៖ «ខ្ញុំអត់ដឹងដែរ ខ្ញុំដឹងតែរឿងធ្វើតាមតែអនុក្រឹត្យរបស់សម្តេចនាយក ខ្ញុំអនុវត្តតាមតែផ្លូវច្បាប់ រាជរដ្ឋាភិបាលលោកឱ្យធ្វើអី យើងធ្វើតាមហ្នឹងទៅ ខ្ញុំចង់ជម្រាបជូនប៉ុណ្ណឹង។ បើក្រុមយុវជនគាត់យល់អីយល់ទៅ ជាសិទ្ធិរបស់គាត់ យើងមានសិទ្ធិអីទៅហាមឃាត់មិនឱ្យយល់ គាត់ចង់យល់ថាម៉េច យល់ទៅ»។
ចំណែក អភិបាលខេត្តកំពង់ស្ពឹ លោក វ៉ី សំណាង ក៏បានប្រាប់សារព័ត៌មាន Newsroom Cambodiaយ៉ាងខ្លីថា ក្រុមយុវជនយល់ឃើញយ៉ាងណាជារឿងរបស់ពួកគេ ហើយរដ្ឋអំណាចអនុវត្តយ៉ាងណាជារឿងរបស់រដ្ឋអំណាច ដោយការងាររបស់រដ្ឋអំណាចបានអនុវត្ត ក៏មានការវាយតម្លៃដោយឯករាជ្យ និងត្រឹមត្រូវ។ លោកបន្ថែមថា ក្រុមការងារវាយតម្លៃរបស់រដ្ឋ បានគិតគូរយ៉ាងម៉ត់ចត់ ហើយបើសិនក្រុមការងារដ្ឋពិនិត្យឃើញថា ការផ្តល់ដីនៅតំបន់នោះទៅឱ្យក្រុមហ៊ុនឯកជន ធ្វើឱ្យប៉ះពាល់ធ្ងន់ធ្ងរដល់បរិស្ថាន ជាជាងប្រយោជន៍សេដ្ឋកិច្ចនោះ គឺរដ្ឋនឹងមិនអនុវត្តនោះទេ។
លោកថា៖ «ការយល់ឃើញរបស់គាត់[ក្រុមយុវជន] គាត់មិនមែនជាអ្នកខាងបច្ចេកទេស ឬអ្នកគិតគូរផ្នែកវិស័យអស់ទាំងហ្នឹងណា៎។ គាត់គិតរឿងវិស័យដែលគាត់ត្រូវធ្វើ គឺការពារ អភិរក្ស ហើយរដ្ឋអំណាចក៏គិតរឿងការពារ និងអភិរក្សដូចគ្នា ប៉ុន្តែអភិរក្សក៏យើងមិនភ្លេចការអភិវឌ្ឍដែរ អាណាត្រូវទុក អាណាត្រូវអភិវឌ្ឍន៍»។
យ៉ាងណាមិញ មន្រ្តីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន សង្កេតឃើញថា ការកាត់ដីឧទ្យានជាតិគិរីរម្យ ឱ្យទៅក្រុមហ៊ុនឯកជនកាន់កាប់នោះ អាចប៉ះពាល់យ៉ាងធ្ងន់ធ្ងរទៅដល់បរិស្ថាន ជាពិសេសប៉ះពាល់ទៅដល់សក្តានុពលអេកូទេសចរណ៍របស់ប្រទេសជាតិ និងការប្រកបមុខរបរទទួលទានរបស់សហគមន៍រស់នៅទីនោះ។
លោកថា៖ «ការផ្តល់តំបន់ដែលមានសក្តានុពលទៅឱ្យក្រុមហ៊ុនធ្វើការអភិវឌ្ឍន៍ និងធ្វើការគ្រប់គ្រងនេះ វាធ្វើឱ្យមានការប៉ះពាល់ដល់បរិស្ថានធម្មជាតិ ជាពិសេសដល់តំបន់គិរីរម្យដែលជាតំបន់មានសក្តានុពលខ្លាំងផ្នែកទេសចរណ៍[…] វាអាចធ្វើឱ្យបាត់បង់ចំណូលរបស់សហគមន៍ ដែលគាត់ធ្លាប់អាស្រ័យផលពីតំបន់អេកូទេសចរណ៍ហ្នឹងផងដែរ»។
កាលពីឆ្នាំ២០១៨ ក្រសួងបរិស្ថាន បានចេញសេចក្តីជូនដំណឹង (ស.ជ.ណ) មួយ ដោយស្នើបញ្ឈប់ការកាន់កាប់ដីដោយខុសច្បាប់ ស្ថិតក្នុងតំបន់ឧទ្យានជាតិព្រះសុរាម្រិតកុសមៈ (គិរីរម្យ) ហើយក្រោយមក រដ្ឋបាលខេត្តកំពង់ស្ពឺ ក៏បានចេញលិខិតមួយស្នើដកហូតលិខិតសម្គាល់សិទ្ធិកាន់កាប់ប្រើប្រាស់ដីធ្លី និងការទន្ទ្រានកាន់កាប់ដីព្រៃក្នុងឧទ្យានជាតិព្រះសុរាម្រិតកុសមៈមកវិញដែរ។
គួររំឭកថា កាលពីថ្ងៃទី១៦ ខែមីនា ឆ្នាំ២០២១ រដ្ឋបាលខេត្តកំពង់ស្ពឺ បានចេញដីកាដកហូតដីព្រៃឈើចំនួន ២៦៦,៣១ហិកតា ស្ថិតនៅ៩ទីតាំងផ្សេងៗគ្នា ក្នុងភូមិសាស្ត្រឃុំតាសាល និងឃុំត្រពាំងជោ ស្រុកឱរ៉ាល់ មកធ្វើជាសម្បត្តិរដ្ឋវិញ ក្រោយពីមានជនខិលខូចមួយចំនួនបានទៅទន្ទ្រានយកធ្វើជាកម្មសិទ្ធិដោយខុសច្បាប់៕
