រដ្ឋបាលរាជធានីភ្នំពេញនឹងផ្អាកចរាចរណ៍លើកំណាត់ផ្លូវវិមានឈ្នះឈ្នះ ចាប់ពីគល់ស្ពានព្រែកព្នៅរហូតដល់ផ្លូវជាតិលេខ៦ ដើម្បីបញ្ចៀសការកកស្ទះចរាចរណ៍ក្នុងតំបន់ប្រារព្ធពិធីបើក និងបិទព្រឹត្តិការណ៍ប្រកួតកីឡាអាស៊ានប៉ារ៉ាហ្គេម។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចុះថ្ងៃទី២៩ ខែឧសភា ឆ្នាំ២០២៣ បានឱ្យដឹងថា ដើម្បីឱ្យពិធីបិទ និងបើកកីឡាប៉ារ៉ាហ្គេមនេះប្រព្រឹត្តទៅដោយរលូន រដ្ឋបាលរាជធានីភ្នំពេញនឹងផ្អាកចរាចរណ៍បណ្តោះអាសន្នជុំវិញទីតាំងប្រារព្ធពិធីរហូតដល់បញ្ចប់ ដោយមិនឱ្យយានជំនិះគ្រប់ប្រភេទឆ្លងកាត់មហាវិថីឈ្នះឈ្នះ ចាប់ពីគល់ស្ពានព្រែកព្នៅ រហូតដល់ផ្លូវជាតិលេខ៦ ចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។
កម្ពុជានឹងរៀបចំពិធីបើក និងបិទព្រឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២ នៅថ្ងៃទី៣ និងទី៩ ខែមិថុនា ឆ្នាំ២០២៣នៅពហុកីឡាដ្ឋានជាតិមរតកតេជោ។ ក្នុងព្រឹត្តកាណ៍នេះ មានប្រទេស១១ចូលរួម និងមានប្រតិភូកីឡាសរុបជាង២៥០០នាក់ ដែលក្នុងនោះកម្ពុជាមានចំនួន ៣៤៣នាក់ និងមានការប្រកួតកីឡារហូតដល់ ១៤ប្រភេទកីឡា។
គួរបញ្ជាក់ថា កីឡាអាស៊ានប៉ារ៉ាហ្គេម គឺជាកីឡាជនពិការ ដែលក្នុងនោះប្រទេសម៉ាឡេស៊ីជាម្ចាស់ផ្ទះដំបូងនៃព្រិត្តកាណ៍កីឡាអាស៊ានប៉ារ៉ាហ្គេមនេះ នៅក្នុងឆ្នាំ២០០១ ហើយនេះជាលើកទី១ហើយសម្រាប់កម្ពុជា ដែលបានក្លាយជាម្ចាស់ផ្ទះនៃព្រឹត្តកាណ៍ប្រកួតកីឡាអាស៊ានប៉ារ៉ាហ្គេមលើកទី១២៕
