រដ្ឋបាលរាជធានីភ្នំពេញនឹងរៀបចំការផ្សាយបន្តផ្ទាល់ពិធីបើក និងពិធីបិទក្នុងព្រឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២ នៅទីតាំងចំនួន០៣ កន្លែងផ្សេងគ្នា ក្នុងរាជធានីភ្នំពេញ អំឡុងថ្ងៃទី០៣ ខែមិថុនា ឆ្នាំ២០២៣ និងថ្ងៃទី០៩ ខែមិថុនា ឆ្នាំ២០២៣។
បើតាមសេចក្តីជូនដំណឹងរបស់រដ្ឋបាលរាជធានីភ្នំពេញ ចេញនៅថ្ងៃទី០១ ខែមិថុនា ឆ្នាំ២០២៣ នេះបញ្ជាក់ថា ដើម្បីអបអរពិធីបើក និងពិធីបិទក្នុងព្រឹត្តិការណ៍ប្រកួតកីឡាអាស៊ានប៉ារ៉ាហ្គេម រដ្ឋបាលរាជធានីភ្នំពេញនឹងរៀបចំផ្សាយបន្តផ្ទាល់ពិធីទាំងពីរនេះ ចាប់ពីម៉ោង ១៨.០០ យប់ រហូតដល់ចប់ពិធីនៅតាមទីតាំងចំនួន០៣ កន្លែង។
រដ្ឋបាលរាជធានីភ្នំពេញបានបន្តថា ទីតាំងទាំង០៣ នោះរួមមាន សួនច្បារមុខវត្តបុទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ។ សួនច្បារព្រះនាងប្រាជ្ញាបារមី ក្នុងសង្កាត់ជ្រោយចង្វារ ខណ្ឌជ្រោយចង្វារ និងទីលានប្រជាធិបតេយ្យ ក្បែរស្ពានអាកាសឬស្សីកែវ ក្នុងសង្កាត់ឬស្សីកែវ ខណ្ខឬស្សីកែវ។
កីឡាអាស៊ានប៉ារ៉ាហ្គេមគឺជាកីឡាជនពិការដែលត្រូវបានបង្កើតឡើងដំបូងនៅឆ្នាំ២០០១ ដោយមានប្រទេសម៉ាឡេស៊ីជាម្ចាស់ផ្ទះ។ ហើយនៅឆ្នាំនេះ ជាលើកទី១ហើយសម្រាប់កម្ពុជា ដែលបានក្លាយជាម្ចាស់ផ្ទះនៃព្រឹត្តកាណ៍ប្រកួតកីឡាអាស៊ានប៉ារ៉ាហ្គេមលើកទី១២ ដែលនឹងចាប់ផ្តើមជាផ្លូវការនៅថ្ងៃទី០៣ ខែមិថុនា ដល់ថ្ងៃទី០៩ ខែមិថុនា ឆ្នាំ២០២៣៕
