គណបក្សប្រជាជនកម្ពុជាបានដាក់ចេញនូវគោលនយោបាយរក្សាស្ថិរភាពតម្លៃកសិផលក្នុងរដូវប្រមូលផលសម្រាប់ការប្រកួតប្រជែង ការបោះឆ្នោតជ្រើសតាំងតំណាងរាស្ដ្រនីតិកាលទី៧ ខណៈអង្គការសង្គមស៊ីវិលយល់ឃើញថា កសិករខ្មែរនៅតែបន្តប្រឈមបញ្ហាជាច្រើនផ្នែកវិស័យកសិកម្មនេះ។
ថ្លែងក្នុងថ្ងៃដំបូងនៃការបើកយុទ្ធនាការឃោសនាបោះឆ្នោតកាលពីថ្ងៃសៅរ៍នេះ លោក នាយករដ្ឋមន្រ្តី ហ៊ុន សែន បានលើកឡើងនូវគោលនយោបាយជាអាទិភាពចំនួន៦ចំណុច ដែលជាកម្មវិធីអភិវឌ្ឍន៍សង្គមជាតិ របស់គណបក្សប្រជាជនកម្ពុជានៅអាណត្តិថ្មីនេះ។
ក្នុងនោះមានមួយចំណុច ដែលលោកនាយករដ្ឋមន្រ្តី បានដាក់សំដៅលើការព្យាយាមរកទីផ្សារនិងរក្សាតម្លៃកសិផលឱ្យមានស្ថិរភាពក្នុងរដូវប្រមូលផល តាមរយៈការផ្ដល់ហិរញ្ញប្បទានរាប់លានដុល្លារអាមេរិក សម្រាប់ការប្រមូលទិញកសិផលក្នុងករណីប្រឈមនឹងបញ្ហាណាមួយ។
លោក ហ៊ុន សែន បន្តថា ផលិតផលកសិផលសំខាន់ៗតម្រូវឱ្យមានការរក្សាលំនឹងតម្លៃរៀងរាល់រដូវប្រមូលផលមាន ស្រូវ ស្វាយកែវរមៀត មៀនប៉ៃលិន ស្វាយចន្ទី ដំឡូង ពោត និងផលិតផលផ្សេងៗទៀតតាមការចាំបាច់។
លោកបន្តថា៖ «កម្មវិធីហិរញ្ញប្បទានសំដៅលើកស្ទួយផលិកម្មរកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ តាមរយៈការដាក់ចេញនូវកញ្ចប់ថវិកាជាក់លាក់ដោយចាប់ផ្ដើមពីចំនួន១០០លានដុល្លារអាមេរិក និងអាចវិភាជថវិកាបន្ថែមប្រសិនបើមានតម្រូវការចាំបាច់ដើម្បីធ្វើអន្តរាគមន៍ឱ្យទាន់ពេលវេលា ក្នុងការទិញកសិផលពីប្រជាកសិករ ជាមួយនឹងគោលដៅរក្សាស្ថិរភាពថ្លៃនូវរាល់រដូវប្រមូលផល» ។
ក្រៅពីគណបក្សប្រជាជនកម្ពុជា គេឃើញមានគណបក្សនយោបាយផ្សេងទៀត ក៏បានឃោសនាគោលនយោបាយរបស់ខ្លួនទាក់ទិននឹងវិស័យកសិកម្មនេះដែរ។
សម្រាប់គណបក្សប្រជាធិបតេយ្យមូលដ្ឋានដែលជាដៃគូប្រកួតប្រជែងមួយក្នុងចំណោមបក្សនយោបាយចំនួន១៧ផ្សេងទៀត បានជំរុញឱ្យសហគមន៍កសិកម្មទទួលបានទុនវិនិយោគជាមួយអត្រាការប្រាក់ត្រឹម៣ភាគរយក្នុងមួយឆ្នាំ និងការផលិតវត្ថុធាតុដើមក្នុងស្រុកសម្រាប់វិស័យកសិកម្ម ដើម្បីកាត់បន្ថយតម្លៃ និងការចំណាយរបស់កសិករ និងស្ដារប្រឡាយទឹកសម្រាប់ធ្វើកសិកម្ម។
ដោយឡែក គណបក្សខ្មែររួបរួមជាតិ ក៏បានដាក់ចេញនូវគោលនយោបាយកសិកម្មដែរ ដោយកំណត់តម្លៃស្រូវទាបបំផុត ១,២០០រៀលក្នុងមួយគីឡូក្រាម និងធានាតម្លៃទីផ្សារកសិផល ព្រមទាំងបញ្ចុះតម្លៃប្រេង និងជីកសិកម្ម។
បើទោះបែបណា គេសង្កេតឃើញថា ក្នុងរយៈពេលប្រមាណ ៤០ឆ្នាំមកនេះ គោលនយោបាយកសិកម្ម ដែលគណបក្សប្រជាជនកម្ពុជាបានដាក់ចេញ ហាក់មិនបានផ្តល់ផលស្មើគ្នាទៅដល់ដៃកសិករប៉ុន្មានទេ។នៅចំពោះមុខនេះ វិស័យកសិកម្មត្រូវធ្វើដំណើរ ក្នុងស្ថានភាពលំបាកលំបិន ក្នុងន័យថាពលរដ្ឋត្រូវចំណាយខ្ពស់ទៅលើថ្លៃដើម ដូចជាទិញជីចូលជាដើម តែទទួលបានទិន្នផលទាប។មានពេលខ្លះ កសិផលផលិតបាន ប៉ុន្តែត្រូវប្រឈមគ្មានទីផ្សារក៏មានដែរ។ហើយបើត្រូវលក់ចេញ ក៏បង្ខំចិត្តលក់ក្នុងតម្លៃមួយដែលទាបជាងតម្លៃនៅលើទីផ្សារទៅទៀត។
យ៉ាងនេះក្តីលោក ថូ ណារិទ្ធ នាយកអង្គការសេដាក លើកឡើងថា ក្រៅពីតម្លៃកសិផលធ្លាក់ចុះអំឡុងពេលប្រមូលផលកសិករខ្មែរនៅមានបញ្ហាប្រឈមរាប់មិនអស់ដែលរដ្ឋាភិបាលត្រូវយកចិត្តទុកដាក់។លោកបន្តថា បញ្ហាទាំងនោះមាន កង្វះប្រព័ន្ធធារាសាស្រ្តសម្រាប់ស្រោចស្របដំណាំ ទុនវិនិយោគ និងទីផ្សារកសិផលជាដើម។
បើតាមលោក ថូ ណារិទ្ធ កសិករភាគច្រើនបានខ្ចីប្រាក់ពីស្ថាប័នហិរញ្ញវត្ថុដែលមានអត្រាការប្រាក់ខ្ពស់ដើម្បីយកមកចំណាយលើវត្ថុធាតុដើមសម្រាប់ដំណាំកសិកម្មរបស់ពួកគេ។
ទន្ទឹមនឹងនេះ លោក ណារិទ្ធ ជំរុញឱ្យរដ្ឋាភិបាលបណ្ដុះបណ្ដាលមន្រ្តីកសិកម្មតាមឃុំដែលជាផ្នែកកមួយនៃគោលនយោបាយរបស់បក្សកាន់អំណាចនៅអាណត្តិថ្មីនេះឱ្យមានសមត្ថភាពគ្រប់គ្រាន់ក្នុងការផ្ដល់យោបល់ដល់កសិករ ក្រោមហេតុផលថាពួកគេភាគច្រើនជានិសិ្សតទើបបញ្ចប់ការសិក្សា។
លោកបន្តថា៖«បញ្ហាប្រឈមនៅការពង្រាយមន្រ្តីកសិកម្មឃុំនៅត្រង់ថា បទពិសោធន៍របស់មន្រ្តីកសិកម្មភាគច្រើនជានិសិ្សតដែលបញ្ចប់ការសិក្សាពីសាលាកសិកម្ម។ចឹងខ្ញុំគិតថាអាចមានការប្រឈមកង្វះខាតផ្នែកបទពិសោធន៍ និងបច្ចេកទេសក្នុងការចុះបណ្ដុះបណ្ដាលកសិករបន្ថែមទៀត»។ លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ យល់ឃើញថា គោលនយោបាយរក្សាស្ថិរភាពតម្លៃកសិផលនៅរដូវប្រមូលផលនេះ ទាមទារឱ្យគណបក្សប្រជាជនកម្ពុជាមានឆន្ទៈមុះមុត និងការតាំងចិត្តខ្ពស់ក្នុងការអនុវត្ត។ លោកមានសុទិដ្ឋិនិយមថា ប្រសិនបើអាចដោះស្រាយបញ្ហាអស្ថិរភាពតម្លៃនេះបានជោគជ័យមែននោះ នឹងជំរុញឱ្យជីវភាពកសិករមានភាពប្រសើរជាងមុន៕
