ស្របពេលអ្នកគាំទ្របក្សកាន់អំណាច និងបក្សនយោបាយ ១៧ផ្សេងទៀត កំពុងស្វែងរកការគាំទ្ររៀងៗខ្លួននៅតាមមូលដ្ឋាននោះ ចំពោះពលរដ្ឋដែលស្មោះស្ម័គ្រ និងមានភក្ដីភាពជាមួយគណបក្សភ្លើងទៀន នៅតែបន្តរក្សាភាពស្ងប់ស្ងាត់ដដែល បើទោះជាយុទ្ធនាការឃោសនាបោះឆ្នោតនេះ កាន់តែខិតជិតដល់បញ្ចប់ហើយក្តី។
អ្នកគាំទ្រគណបក្សភ្លើងទៀនមួយរូប ឈ្មោះ សុំ សាក់ ជាកសិកររស់នៅស្រុកប្រាសាទបាគង ខេត្តសៀមរាប និយាយថា យុទ្ធនាការបោះឆ្នោតដែលបានប្រារព្ធឡើងរយៈពេល ២សប្ដាហ៍មកនេះ លោកពុំចាប់អារម្មណ៍ជាមួយគោលនយោបាយរបស់គណបក្សណាមួយឡើយ។ លោកបន្តថា ក្នុងចំណោមគណបក្សក្រៅរដ្ឋាភិបាល គឺមានតែគណបក្សភ្លើងទៀនមួយទេ ទើបជាគណបក្សមានឆន្ទៈប្រឆាំងពិតប្រាកដ។
លោកបន្តថា៖ «ខ្ញុំវាអត់មានស្រឡាញ់ក្រៅពីបក្សភ្លើងទៀន[…]មិនគួរធ្វើសម្រាប់គណបក្សភ្លើងទៀន អត់មានសិទ្ធិចូលរួមក្នុងការបោះឆ្នោតតំណាងរាស្រ្ត […] សោកស្ដាយណាស់»។
ពលរដ្ឋគាំទ្រគណបក្សភ្លើងទៀនម្នាក់ទៀត អ្នកស្រី សួន សុខឿន អាយុ៥៣ឆ្នាំ ប្រកបមុខរបរលក់នំបញ្ចុក រស់នៅក្រុងតាខ្មៅ ខេត្តកណ្ដាល និយាយថា ការសម្រេចចិត្តគាំទ្រគណបក្សភ្លើងទៀនដោយសម្លឹងឃើញថា គណបក្សនេះអាចជំរុញប្រទេសកម្ពុជាឱ្យមានប្រជាធិបតេយ្យពិតប្រាកដ។
អ្នកស្រីយល់ថា គណបក្សប្រឆាំងផ្សេងទៀតខុសពីគណបក្សភ្លើងទៀន ធ្វើនយោបាយហាក់ដើរតាមការចង្អុលបង្ហាញពីគណបក្សកាន់អំណាច។
អ្នកស្រីបន្តថា៖ «[បក្សផ្សេងទៀត?] ខ្ញុំមើលទៅដូចគាត់ចុះចូល រួមជាមួយបក្សកាន់អំណាចបានខ្ញុំអត់ចូលរួមគាត់ ដូចថាគាត់អត់មានប្រឆាំងជាមួយគេផងហ្នឹង ធ្វើតែតាមគេដែរ ដល់ពេលគេអត់ឱ្យ[គណបក្សភ្លើងទៀនចូលរួមការ]បោះ[ឆ្នោត]ចឹង យ៉ាងណាក៏ខ្ញុំអត់អស់សង្ឃឹមដែរមានតែចាំមើលតទៅទៀត ចាំមើលអាណត្តិហ្នឹង[អាណត្តិទី៧]ក៏ចាំ អាណត្តិក្រោយក៏ចាំ»។
យ៉ាងនេះក្តី អ្នកដែលមានភក្តីភាពចំពោះគណបក្សក្រៅរដ្ឋាភិបាលមួយនេះ នៅបន្តដាក់ក្ដីសង្ឃឹមថា គណបក្សភ្លើងទៀនអាចនឹងមានវាសនា វិលត្រលប់មកចូលរួមប្រកួតប្រជែង សម្រាប់ការបោះឆ្នោតជ្រើសតាំងតំណាងរាស្រ្តនៅអាណត្តិទី៧ ក្នុងពេលខាងមុខនេះ។
គណៈកម្មាធិការជាតិរៀបចំការបោះឆ្នោត បានបិទបញ្ចប់ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះតំណាងរាស្រ្តហើយគិតត្រឹមថ្ងៃទី ៨ ខែ ឧសភា ឆ្នាំ២០២៣។សម្រាប់ការបោះឆ្នោតនៅក្នុងអាណត្តិនេះនោះមានគណបក្សនយោបាយចំនួន២០បានចុះបញ្ជី និងដាក់បេក្ខជនឈរឈ្មោះបម្រើឱ្យការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣។ ប៉ុន្តែ បន្ទាប់ពីពិនិត្យ និងផ្ទៀងផ្ទាត់ឯកសារនានា គ.ជ.ប បានបដិសេធ គណបក្សចំនួនពីរ គឺគណបក្សភ្លើងទៀន និងគណបក្សមហាសាមគ្គីជាតិខ្មែរ ពុំឱ្យចូលរួមប្រកួតប្រជែងការបោះឆ្នោត នៅខែកក្កដានេះ ក្រោមហេតុផលខុសទៅនីតិវិធីរដ្ឋបាល។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ថ្លែងថា គណបក្សភ្លើងទៀន បានបាត់បង់ឱកាសក្នុងការប្រកួតប្រជែងការបោះឆ្នោតហើយ នៅថ្ងៃទី២៣ ខែកក្កដានេះ។ ក៏ប៉ុន្តែបក្សនេះនៅតែអាចចូលរួមការបោះឆ្នោតនៅអាណត្តិក្រោយបាន ដោយការដាក់លិខិតស្នើសុំធ្វើសេចក្ដីចម្លងសំបុត្រដើមនៃការចុះបញ្ជីគណបក្សពីក្រសួងមហាផ្ទៃ។
លោកបន្តថា៖ «បើដឹងថាបាត់ [សំបុត្រដើមនៃការចុះបញ្ជីគណបក្ស]ហើយមិនស្នើសុំឱ្យទាន់ទេ។ ទាល់ដល់ពេលចុះបញ្ជីគណបក្សនយោបាយហើយ បានគាត់ធ្វើការប្រកាសថាបាត់ ហើយទើបរត់ទៅធ្វើ ហើយការធ្វើត្រូវមាននីតិវិធីត្រូវប្ដឹងទៅប៉ុស្ដិ៍នគរបាលឃុំសង្កាត់កន្លែងដែលបាត់បានយកមកស្នើសុំក្រសួងមហាផ្ទៃ ចឹងនីតិវិធីនេះត្រូវការពេលវេលា។ ដល់ឯកសារមកដាក់នៅ គ.ជ.ប បិទឈប់ទទួលសល់តែ២ថ្ងៃទៀតបានគាត់មកដាក់ »។
សម្រាប់លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិជាន់ខ្ពស់នៃអង្គការខុមហ្វ្រែល ចាត់ទុកថា នេះជាការយល់ឃើញរបស់ប្រជាពលរដ្ឋដែលស្រឡាញ់គណបក្សនយោបាយរៀងៗខ្លួន។
ក្រៅពីនេះ បើតាមលោក កន សាវាង្ស គណបក្សភ្លើងទៀនមានសង្ឃឹមតិចតួចដែលអាចមានលទ្ធភាពចូលរួមប្រកួតប្រជែង នៅក្នុងការបោះឆ្នោតនៅអាណត្តិទី៧នេះ ដោយសារពុំបានចុះបញ្ជីគណបក្សនយោបាយនៅ គ.ជ.ប ស្របពេលកាលរិច្ចេទនៃការបោះឆ្នោត ក៏កាន់តែខិតជិតមកដល់ ហើយការសម្របសម្រួលផ្នែកនយោបាយណាមួយ ក៏រឹតតែពិបាកនឹងកើតឡើងថែមទៅទៀត។
លោកបន្តថា៖ «[បក្សភ្លើងទៀនអាចចូលរួមបោះឆ្នោត]បើសិនជាកើតមានមែន ទាល់តែមានសេណារីយោមួយចំនួន ឧទាហរណ៍ ការសម្របសម្រួលផ្នែកនយោបាយ ដោយសារការពន្យាពេលនៃការបោះឆ្នោតជាដើមចឹង ប៉ុន្តែសម្រាប់ខ្ញុំផ្លូវនៃការពន្យាពេលមានលទ្ធភាពតិចតួចណាស់។ ខ្ញុំមិនមានភាពជឿជាក់ខ្ពស់នៅក្នុងការពន្យាពេលដើម្បីបើកច្រកឱ្យមានការចួលរួមទេ ខ្ញុំមិនជឿបែបនេះទេ»។
បើទោះជាបែបណា ទិដ្ឋភាពនៅពេលនេះ វាហាក់មិនខុសគ្នាឆ្ងាយប៉ុន្មាន បើធៀបនឹងការបោះឆ្នោតជ្រើសតាំងតំណាងរាស្រ្តនីតិកាលទី៦ កាលពីឆ្នាំ២០១៨។ ការបោះឆ្នោតមួយ ដែលមិនមានវត្តមានគណបក្សសង្រ្គោះជាតិចូលរួម ការបោះឆ្នោតនៅពេលនោះ ធ្វើឱ្យគណបក្សប្រជាជនកម្ពុជា ដណ្តើមបានកៅអីនៅក្នុងរដ្ឋសភាទាំងស្រុង ១២៣ លើ១២៣ អាសនៈ។ គេសង្កេតឃើញថា ការបោះឆ្នោតនៅក្នុងអាណត្តិនេះវិញ ដំណើរការនៃការបោះឆ្នោតប្រព្រឹត្តទៅហាក់ដូចគ្នា កាលពី៥ឆ្នាំមុនដែរ។ គណបក្សភ្លើងទៀន ត្រូវបានបិទទ្វារមិនឱ្យចូលរួមប្រកួត មុនការបោះឆ្នោតមកដល់ ក្រោមហេតុផលខ្វះខាតក្នុងនីតិវិធី។ ប៉ុន្តែលើកនេះ វាហាក់ប្រសើរជាងអាណត្តិទី៦បន្តិច នៅត្រង់ថា គណបក្សជំទាស់មួយនេះ មិនត្រូវបានរំលាយដោយតុលាការកំពូល នៅមុនការបោះឆ្នោត ដូចគណបក្សសង្រ្គោះជាតិ៕
