ប្រជាពលរដ្ឋចំនួន១០០នាក់ផ្ទុះការតវ៉ានៅមុខសាលាក្រុងប៉ោយប៉ែត កាលពីថ្ងៃទី ២ សីហា ប្រឆាំងសាលក្រមរបស់សាលាដំបូងខេត្តបន្ទាយមានជ័យដោយបង្គាប់ឱ្យពួកគេរុះរើលំនៅឋានចេញទៅតាំងទីលំនៅផ្សេង ពីតាំងដែលពួកគេកំពុងរស់នៅបច្ចុប្បន្ន ដោយចោទប្រកាន់ថា ពលរដ្ឋទាំងជាង១០០គ្រួសារនេះរស់នៅលើដីដែលមានម្ចាស់កម្មសិទ្ធិរួចទៅហើយ។
លោក សាំង សំណាង អាយុ៤៧ឆ្នាំ ជាពលរដ្ឋម្នាក់ក្នុងចំណោមពលរដ្ឋសរុប១២៣គ្រួសារដែលប្រឈមការបណ្ដេញចេញពីលំនៅឋានដោយអំណាចតុលាការ និយាយថា លោកបានទិញដី និងរស់នៅលើដីកំពុងមានទំនាស់នេះជិត១០ឆ្នាំហើយ។ប៉ុន្តែ លោកថា រយៈពេល៣ឆ្នាំចុងក្រោយនេះ មានអ្នកដាក់ពាក្យបណ្ដឹងទាមទារដីនេះពីម្ចាស់ដីមុន ហើយតុលាការបានចេញដីកាបង្គាប់ឱ្យលោក និងពលរដ្ឋផ្សេងទៀតរស់នៅលើដីមានវិវាទរុះរើលំនៅឋានដែលសុទ្ធសឹងជាសំណង់រឹងកាលពីសប្ដាហ៍មុន។
លោកបន្តថា៖ «ទិញជិត១០ឆ្នាំទើបមកវិវាទ៣ឆ្នាំមុននេះឯង។ បានគេប្ដឹងថាដីគេ តែអ្នកប្ដឹងអត់ឃើញឈ្មោះផងចេញតែឈ្មោះ វ៉ែន ខែមរិន្ទ តែម្នាក់ ហើយតុលាការចេញមក គេ ថា ភាគីខាងគេមាន២៥០គ្រួសារ។ តែដីហ្នឹងខ្ញុំស្គាល់ដំបូងសុទ្ធដីពីដើមព្រៃកប់សុទ្ធបឹង អត់មានមនុស្សនៅទេ។
បើតាម លោក សំណាង ដីមានវិវាទនេះមានទំហំ៣ហិកតា ស្ថិតក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត។ក្នុងឆ្នាំ២០១៤ លោកបានទិញដីនៅតំបន់នោះ ទទឹងទំហំ ៤ម៉ែត្រ និងបណ្ដោយ ១៦ម៉ែត្រ ក្នុងតម្លៃសរុបជិត៦ពាន់ដុល្លារ ដោយកក់ប្រាក់៥០០ដុល្លារ និងបង់រំលោះ២២០ដុល្លារជារៀងរាល់ខែរហូតដល់២ឆ្នាំ ព្រមទាំងបានសាងសង់ជាផ្ទះល្វែងលើដីនោះថែមទៀតផង។
ក្នុងលិខិតផ្ទេរកម្មសិទ្ធិកាន់កាប់ដីធ្លីរបស់លោក សំណាង បាននិយាយថា ក្នុងឆ្នាំ២០១៤ លោក សំណាង បានទិញលំនៅឋាន ពីបុគ្គលម្នាក់ឈ្មោះ ង៉ោ ឆេង។ក្នុងលិខិតនោះ ក៏បានបង្ហាញពីការចុះហត្ថលេខាទទួលស្គាល់ពីសំណាក់ លោក គង់ សុខ អតីតចៅសង្កាត់ប៉ោយប៉ែត និង លោក ង៉ោ ម៉េងជ្រួន អតីតអភិបាលក្រុងប៉ោយប៉ែត និងបច្ចុប្បន្នជាអភិបាលរងខេត្តបន្ទាយមានជ័យដែលជាអាជ្ញាធរមូលដ្ឋានផងដែរ។
ពលរដ្ឋប្រឈមនឹងការបណ្ដេញចេញពីលំនៅឋានមួយរូបទៀតគឺ លោក សៅ ស្រឿន ជាបុគ្គលិកក្រុមហ៊ុនឯកជនម្នាក់ បានប្ដេជ្ញាថា លោកមិនព្រមរុះរើលំនៅឋានតាមការបញ្ជាពីតុលាការនោះទេ ដោយសំអាងថា លោកបានទិញដីនេះដោយស្របតាមច្បាប់។
លោកបន្តថា៖«យើងសោកស្ដាយ[តុលាការបង្គាប់រុះរើ] យើងទិញមានច្បាប់មានទម្លាប់មិនបានលួចគេផង»។
សាលាដំបូងខេត្តបន្ទាយមានជ័យ លោក ឡា ប៊ុនហួន មានប្រសាសន៍ថា ក្នុងសំណុំរឿងលើដីមានទំនាស់នេះ តុលាការបានចេញសាលក្រមរួចហើយ ដោយឱ្យដើមបណ្ដឹង លោក វ៉ែន ខែមរិន្ទ តំណាងពលរដ្ឋ២៥០គ្រួសារឈ្នះក្ដីលើ អ្នកស្រី ប៉ាង ក្រៃស៊ុន។
ប្រភពបន្តថា កន្លងមក លោក ង៉ោ ឆេង និងអ្នកស្រី ប៉ាង ក្រៃស៊ុន បានគប់គិតគ្នាបន្លំឯកសារក្នុងការលក់ដីឱ្យប្រជាពលរដ្ឋជាង១០០គ្រួសារ ខណៈបច្ចុប្បន្នពួកគេកំពុងរស់នៅលើដីនេះ។បន្ថែមពីលើនេះ លោក ប៊ុនហួន ថា តុលាការបានចេញសាលក្រមលុបចោលប្លង់កម្មសិទ្ធិរបស់លោក ង៉ោ ឆេង និងអ្នកស្រី ប៉ាង ក្រៃស៊ិន ព្រមទាំងចេញដីកាតាមចាប់ខ្លួនពួកគេ និងប្រគល់ដីមានទំនាស់ទំហំ៣ហិកតានោះឱ្យ លោក វ៉ែន ខែមរិន ជាម្ចាស់កម្មសិទ្ធិវិញ។
លោកបន្តថា៖«១០០គ្រួសារដែលរស់នៅជាក់ស្ដែងសុទ្ធតែជាជនរងគ្រោះដែលគាត់ទិញពីគេ។…គាត់(លោក ង៉ោ ឆេង និងអ្នកស្រី ប៉ាង ក្រៃស៊ុន)ក្លែងយកដីប្រជាពលរដ្ឋ គេ(តុលាការ)ចេញដីកាតាមចាប់ខ្លួន…ប្លង់ដីគាត់ គេ(តុលាការ)លុបចោលអស់ហើយ» ។
ទាក់ទិននឹងការលើកឡើងនេះ សារព័ត៌មាន Newsroom Cambodia នៅពុំទាន់អាចសុំប្រតិកម្មពី លោក ង៉ោ ឆេង និងអ្នកស្រី ប៉ាង ក្រៃស៊ុន បានភ្លាមៗទេ នៅថ្ងៃនេះ។
សាលាដំបូងខេត្តបន្ទាយមានជ័យ កាលពីថ្ងៃទី ២៦ កក្កដា បានជូនដំណឹងឱ្យ អ្នកស្រី ប៉ាង ក្រៃស៊ុន ដែលតុលាការអះអាងថា ជាកូនបំណុលនៅក្នុងសំណុំរឿង និងពលរដ្ឋកំពុងរស់នៅលើដីមានទំនាស់ ស្ថិតនៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត រុះរើផ្ទះសម្បែងចេញ ក្រោមហេតុផលថា ដើម្បីការពារផលប្រយោជន៍ឱ្យដើមបណ្ដឹង។លើសពីនេះទៀត ប្រសិនបើពលរដ្ឋពុំព្រមរុះរើលំនៅឋានចេញទេ នឹងតុលាការនឹងអនុវត្តវិធានការតាមផ្លូវច្បាប់។
ដោយឡែក លោក លី សុវណ្ណារិទ្ធ អភិបាលរងខេត្តបន្ទាយមានជ័យ និងជាអ្នកនាំពាក្យ មានប្រសាសន៍ថា រដ្ឋបាលខេត្តកំពុងបើកកិច្ចប្រជុំស្វែងរកដំណោះស្រាយនៅលើដីទំនាស់នេះ។
លោកបន្តថា៖ «[មិនអាចនិយាយបានទេ]ព្រោះឥឡូវពុងតែប្រជុំរឿងហ្នឹង» ។
សម្រាប់មន្រ្តីអង្គការឃ្លាំមើលសិទ្ធិមនុស្សអាដហុក លោក ស៊ឹង សែនករុណា យល់ថា តុលាការគួរមានការស៊ើបអង្កេតឱ្យបានល្អិតល្អន់មុនចេញសេចក្ដីសម្រេចបណ្ដេញប្រជាពលរដ្ឋពីកន្លែងពួកគេកំពុងរស់នៅ ទាំងដែលមានឯកសារទិញលក់ដីធ្លីត្រឹមត្រូវ ហើយថែមទាំងមានការទទួលស្គាល់ពីអាជ្ញាធរថែមទៀត។
បន្ថែមពីលើនេះលោកជំរុញឱ្យមានការស្រាវជ្រាវលើភាគីពាក់ព័ន្ធដែលរួមចំណែកឱ្យប្រជាពលរដ្ឋចំណាយប្រាក់ក្នុងការទិញដីមានទំនាស់នោះដែរ។
លោកបន្តថា៖ «ខ្ញុំយល់ថាបញ្ហានេះគួរតែមានការស្រាវជ្រាវរឿងរ៉ាវនេះឱ្យបានច្បាស់លាស់ ហើយដំណោះស្រាយគួរតែមានការពិនិត្យអំពី អ្នកដែលធ្វើការខូចខាតនិងប៉ះពាល់ទៅដល់ អ្វីដែលគាត់[ពលរដ្ឋ]បានចំណាយថវិកាក្នុងការទិញដូរទាំងអស់ហ្នឹង» ។
ទាក់ទិនទំនាស់ដីធ្លី កាលពី៣ឆ្នាំមុន នៅក្នុងខេត្តបន្ទាយមានជ័យនេះដែរ នៅអំឡុងខែ មីនា ឆ្នាំ២០២០ លោក ទុយ ស្រស់ ត្រូវបានកម្លាំងកងរាជអាវុធហត្ថខេត្តបន្ទាយមានជ័យ ធ្វើទារុណកម្មយកចម្លើយ នៅក្នុងមន្ទីរឃុំឃាំងនៃទីបញ្ជាការកងរាជអាវុធហត្ថខេត្ត រហូតបាត់បង់ជីវិត។អំពើទារុណកម្មនេះ ផ្តើមចេញពីទំនាស់ដីធ្លីមួយកន្លែងស្ថិតនៅក្នុងឃុំស្លក្រាម និងឃុំស្វាយចេកខេត្តបន្ទាយមានជ័យ ដែលបណ្តាលឱ្យមនុស្ស៤នាក់ផ្សេងទៀត ត្រូវចាប់ខ្លួន និងចោទប្រកាន់តាមផ្លូវតុលាការ។
ដោយឡែក វិវាទដីធ្លី នៅសង្កាត់អូរជ្រៅ ក្រុងប៉ោយប៉ែតឯណេះវិញ គេសង្កេតឃើញថា ស្ថានភាពនេះហាក់មិនខុសគ្នាប៉ុន្មានដែរ។ពលរដ្ឋទាំង១០០គ្រួសារ ដែលកំពុងប្រឈមនឹងអំណាចសាលក្រមដែលត្រូវបណ្តេញចេញ នៅបន្តប្តេជ្ញាថា នឹងមិនចាកចេញពីទីតាំងដែលធ្លាប់រស់នៅជិត១០ឆ្នាំកន្លងទៅហើយនេះទេ៕
