អង្គការសហគមន៍ឥន្ទធនូកម្ពុជា អំពាវនាវឱ្យលុបបំបាត់នូវរាល់ទម្រង់នៃការរើសអើងលើអ្នកស្រឡាញ់ភេទដូចគ្នា និងស្នើដល់គណៈកម្មាធិការសិទ្ធិមនុស្សកម្ពុជា ធ្វើកិច្ចអន្ដរាគមន៍ជាមួយលោក អ៊ូ ប៉ុណ្ណារ៉ាត់ (ហៅនាមក្រឹម) ដើម្បីបំភ្លឺលើមតិយោបល់របស់គាត់កាលពីពេលថ្មីៗនេះ ដែលធ្វើឱ្យប៉ះពាល់ដល់សិទ្ធិ និងសេចក្តីថ្លៃថ្នូររបស់អ្នកស្រឡាញ់ភេទដូចគ្នា។
ការអំពាវនាវនេះ បានធ្វើឡើងក្រោយពីអង្គការនេះ បានទស្សនានូវវីដេអូនៃការប្រឡងរបស់បេក្ខជនមួយរូប ក្នុងកម្មវិធី Cambodia’s Got Talent រដូវកាលទី៣ កាលពីរាត្រីថ្ងៃទី២៨ ខែតុលា ឆ្នាំ២០២៣ ដោយក្នុងកម្មវិធីនោះ លោក អ៊ូ ប៉ុណ្ណារ៉ាត់ ដែលជាគណៈកម្មការមួយរូប បានបញ្ចេញមតិដែលមានលក្ខណៈរើសអើង និងធ្វើឱ្យប៉ះពាល់សិទ្ធិ និងសេចក្តីថ្លៃថ្នូរ របស់បេក្ខជនរូបនោះផ្ទាល់ ក៏ដូចជាដល់បុគ្គល និងសហគមន៍អ្នកស្រឡាញ់ភេទដូចគ្នា នៅក្នុងប្រទេសកម្ពុជាផងដែរ។
ក្នុងកម្មវិធីនោះ លោក អ៊ូ ប៉ុណ្ណារ៉ាត់ បានផ្តល់មតិយោបល់ទៅកាន់បេក្ខជនមួយរូបដែលជាអ្នកស្រឡាញ់ភេទដូចគ្នាថា លោកមិនចង់ឱ្យមានអ្នកស្រឡាញ់ភេទដូចគ្នាច្រើនទេ ព្រោះធ្វើឱ្យបាត់បង់ធនធានមនុស្ស។
លោកថា៖ «ចិត្តខ្ញុំក៏មិនចង់ឱ្យមាន[អ្នកស្រឡាញ់ភេទដូចគ្នា]ច្រើនដែរ បើមានប៉ុន្មានប៉ុណ្ណឹងទៅ កុំឱ្យលើស ព្រោះបាត់ធនធានមនុស្ស»។
យោងតាមលិខិតរបស់អង្គការសហគមន៍ឥន្ទធនូកម្ពុជា ផ្ញើជូនលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ចុះថ្ងៃទី២៩ ខែតុលា ឆ្នាំ២០២៣ បានលើកឡើងពីក្តីបារម្ភចំពោះការយល់ឃើញរបស់លោក អ៊ូ ប៉ុណ្ណារ៉ាត់ ក្នុងកម្មវិធីនោះថា អាចបង្កើតឱ្យមានការភាន់ច្រឡំដល់សាធារណមតិ ជំរុញការរើសអើង ប៉ះពាល់សេចក្តីថ្លៃថ្នូរ ជាពិសេសសុខភាពផ្លូវចិត្តរបស់បុគ្គល និងសហគមន៍អ្នកស្រឡាញ់ភេទដូចគ្នាយ៉ាងធ្ងន់ធ្ងរ។
ដោយមានក្តីបារម្ភពីទំហំនៃផលប៉ះពាល់តាមរយៈពាក្យសម្តីរបស់លោក អ៊ូ ប៉ុណ្ណារ៉ាត់ ដែលជាសិល្បករ និងជាបុគ្គលសាធារណៈរូបនេះចំពោះសហគមន៍អ្នកស្រឡាញ់ភេទដូចគ្នានៅក្នុងប្រទេសកម្ពុជា អង្គការសហគមន៍ឥន្ទធនូកម្ពុជា ស្នើសុំអន្តរាគមន៍ពីប្រធានគណៈកម្មាធិការសិទ្ធិមនុស្សកម្ពុជា ធ្វើការលើកកម្ពស់ការគោរពសិទ្ធិមនុស្ស អប់រំផ្សព្វផ្សាយ និងអំពាវនាវលុបបំបាត់រាល់ទម្រង់នៃការរើសអើងលើអ្នកស្រឡាញ់ភេទដូចគ្នា។
ប្រធានសម្របសម្រួលអង្គការសហគមន៍ឥន្ទធនូកម្ពុជា កញ្ញា លី ពិសី សុំមិនធ្វើអត្ថាធិប្បាយបន្ថែមលើលិខិត ដោយបញ្ជាក់យ៉ាងខ្លីថា៖ «យើងទុកពេលឱ្យ គ.ស.ម.ក [គណៈកម្មាធិការសិទ្ធិមនុស្សកម្ពុជា]ធ្វើការសមស្របតាមពេលវេលា និងដំណើរការ»។
ចំណែក មន្ត្រីសម្របសម្រួលគម្រោងនិន្នាការភេទ និងអត្តសញ្ញាណយេនឌ័រ នៃមជ្ឈមណ្ឌលសិទ្ធិមនុស្សកម្ពុជា លោក លឹម បូរិន បានជំរុញឱ្យមានការសម្របសម្រួលមួយ ក្នុងការជជែកពិភាក្សា និងមានការបំភ្លឺពីលោក អ៊ូ ប៉ុណ្ណារ៉ាត់ ជុំវិញការលើកឡើងរបស់គាត់ ដើម្បីជៀសវាងការយល់ច្រឡំណាមួយ ដែលអាចបង្កជាផលប៉ះពាល់ដល់សហគមន៍អ្នកស្រឡាញ់ភេទដូចគ្នា។
លោកថា៖ «វាជារឿងល្អដែលអាចមានការជជែកពន្យល់បន្ថែម ហើយឱ្យគាត់យល់អំពីធម្មជាតិអ្នកស្រឡាញ់ភេទដូចគ្នា ហើយពាក្យមួយចំនួនដែលបានលើកឡើងនោះ វាមិនត្រូវជាមួយនឹងសហគមន៍អ្នកស្រឡាញ់ភេទដូចគ្នាទេ» ។
Newsroom Cambodia មិនអាចសុំការឆ្លើយតបជុំវិញការស្នើនេះ ពីប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានទេ នៅថ្ងៃទី៣០ ខែតុលានេះ ដោយលោកប្រាប់ថា ជាប់ប្រជុំ។
តែយ៉ាងណា កាលពីថ្ងៃទី២៩ ខែតុលា លោក កែវ រ៉េមី បានចែករំលែកសារនៅលើបណ្តាញសង្គមឆ្លើយតបទៅនឹងលិខិតរបស់សហគមន៍ឥន្ទធនូកម្ពុជាថា លោកបានទទួលលិខិតរបស់សហគមន៍នេះរួចហើយ ហើយលោកក៏បានបង្កើតក្រុមការងារមួយ ដើម្បីធ្វើកិច្ចការនេះ។
ទាក់ទិននឹងករណីនេះ លោក អ៊ូ ប៉ុណ្ណារ៉ាត់ បានប្រាប់ Newsroom Cambodia ថា លោកនឹងធ្វើការ Live លើបណ្តាញសង្គមបកស្រាយនៅថ្ងៃសៅរ៍ចុងសប្តាហ៍នេះ។
លោកថ្លែងថា៖ «ចាំថ្ងៃសៅរ៍ ចាំខ្ញុំនិយាយតាមឡាយ(Live)ប្រាប់» ។
យោងតាមគេហទំព័រការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិប្រចាំនៅកម្ពុជា បានលើកឡើងថា ស្ថិតក្រោមច្បាប់ជាតិ និងច្បាប់អន្ដរជាតិ បុគ្គលគ្រប់រូប រាប់ទាំងមនុស្សប្តូរភេទ (អ្នកស្រឡាញ់ភេទដូចគ្នា) មានសិទ្ធិទទួលបានសិទិ្ធដូចបុគ្គលដទៃទៀតដែរ។ ប្រភពដដែល បន្តថា មាត្រា១ នៃសេចក្តីប្រកាសជាសកលស្តីពីសិទិ្ធមនុស្ស អះអាងថា មនុស្សទាំងអស់កើតមកមានសេរីភាព និងសមភាពក្នុងផ្នែកសេចក្ដីថ្លៃថ្នូរ និងសិទ្ធិ ហើយមនុស្សម្នាក់ៗមានសិទ្ធិសេរីភាពគ្រប់យ៉ាងដោយមិនប្រកាន់បែងចែកណាមួយ។ គោលការណ៍ទាំងនេះ ស្តីពីសកលភាព ភាពស្មើគ្នា និងការមិនរើសអើង ដែលមានចែងផងដែរ នៅក្នុងធម្មនុញ្ញអង្គការសហប្រជាជាតិនិងសន្ធិសញ្ញាសិទ្ធិមនុស្ស។
ចំណែក រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១ បញ្ជាក់ជាថ្មីអំពីគោលការណ៍ទាំងនេះ ដោយការទទួលស្គាល់ និងការគោរពសិទ្ធិមនុស្ស ដូចមានចែងក្នុងសន្ធិសញ្ញាអន្តរជាតិ ដោយចែងថា ប្រជាពលរដ្ឋខ្មែរគ្រប់រូបមាន «ភាពសិទ្ធិស្មើគ្នាចំពោះមុខច្បាប់ មានសិទ្ធិសេរីភាព និងករណីយកិច្ចដូចគ្នាទាំងអស់» ដោយមិនគិតពីឋានៈសង្គមផ្សេងគ្នា ហើយ «មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ»។
អង្គការសហប្រជាជាតិ បន្តថា បើទោះបីជាទំនាក់ទំនងផ្លូវភេទដូចគ្នា មិនត្រូវបានដាក់ជាទោសព្រហ្មទណ្ឌក្តី អ្នកស្រឡាញ់ភេទដូចគ្នាទាំងនោះ មិនត្រូវបានការពារ ឬទទួលស្គាល់ដោយច្បាប់កម្ពុជាដែរ។ ច្បាប់ដែលមានជាធរមានមិនបានហាមឃាត់ជាពិសេសលើការរើសអើង ដោយផ្អែកលើទំនោរផ្លូវភេទ និងអត្តសញ្ញាណយេនឌ័រ ហើយក៏មិនមានដែរនូវការដាក់ទណ្ឌកម្មចំពោះអ្នកដែលរំលោភសិទ្ធិមនុស្សរបស់មនុស្សស្រឡាញ់ភេទដូចគ្នា។
ដោយហេតុនេះហើយ ទើបជាញឹកញយ មនុស្សស្រឡាញ់ភេទដូចគ្នា ត្រូវប្រឈមនឹង «ស្លាកស្នាមទុយស៍ ការរើសអើង និងការផាត់ចេញ កម្រិតខ្ពស់ នៅកន្លែងផ្សេងៗ ដូចជា នៅលំនៅឋាន សាលារៀន កន្លែងធ្វើការ មណ្ឌលសុខភាព និងនៅទីសាធារណ»។
តែយ៉ាងណា កាលពីពេលថ្មីៗនេះ រដ្ឋាភិបាលកម្ពុជា បានបង្ហាញការប្តេជ្ញាចិត្ត និងគំនិតផ្តួចផ្តើម ដើម្បីរួមបញ្ចូលមនុស្សស្រឡាញ់ភេទដូចគ្នា ក្នុងផែនការ និងកម្មវិធីផ្សេងៗផងដែរ៕
