រដ្ឋបាលរាជធានីភ្នំពេញកោះហៅពលរដ្ឋដែលទិញផ្ទះពីក្រុមហ៊ុនបុរីពិភពថ្មីក្នុងខណ្ឌកំបូល មកជួបប្រជុំរកដំណោះស្រាយ ក្រោយពួកគេផ្ទុះការតវ៉ាប្រឆាំងនឹងការរឹបអូសលំនៅឋានពីក្រុមហ៊ុននេះអស់រយៈពេល១០ថ្ងៃកន្លងទៅ។
ការកោះហៅនេះ ធ្វើឡើងក្រោយប្រជាពលរដ្ឋប្រមាណ២០០នាក់ តវ៉ាជារៀងរាល់ថ្ងៃ នៅមុខការិយាល័យលក់ផ្ទះរបស់បុរីពិភពថ្មី ក្នុងខណ្ឌកំបូល ចាប់ពីថ្ងៃទី១៨ រហូតដល់ថ្ងៃទី២៨ ខែតុលា ឆ្នាំ២០២៣។កាតវ៉ានេះ ដោយពួកគេ អះអាងថា ក្រុមហ៊ុនបុរីពិភពថ្មី មិនបានគោរពតាមការសន្យាថា នឹងទិញផ្ទះត្រលប់វិញ ប្រសិនបើពួកគេអស់លទ្ធភាពបង់។
តាមរយៈការកោះអញ្ជើញដែលចេញដោយសាលារាជធានីភ្នំពេញនេះគ្រោងនឹងជួបជុំនៅថ្ងៃទី ៣១ ខែតុលា ឆ្នាំ២០២៣ នៅសាលារាជធានីភ្នំពេញ។នៅក្នុងខ្លឹមសារលិខិត ឱ្យដឹងថា ការប្រជុំរកដំណោះស្រាយឱ្យពលរដ្ឋដែលទិញលំនៅឋាននៅបុរីពិភពថ្មី ស្ថិតក្នុងភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ មានមន្រ្តីពាក់ព័ន្ធចូលរួមជិត២០នាក់។ក្រៅពីនេះ មានទាំងតំណាងពលរដ្ឋ និងតំណាងក្រុមហ៊ុនបុរីពិភពថ្មីចូលរួមដែរ។
គេហទំព័រ Newsroom Cambodia ពុំអាចសូមការអត្ថាធិប្បាយពី អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេ នៅថ្ងៃនេះដោយលោកប្រាប់ថា ជាប់រវល់ប្រជុំ។
តំណាងពលរដ្ឋមួយរូប ក្នុងចំណោមតំណាងពលរដ្ឋបីនាក់ ដែលមានឈ្មោះចូលរួមកិច្ចក្នុងប្រជុំ លោក ហេង តារា មានប្រសាសន៍ថា មានប្រជាពលរដ្ឋជាច្រើននាក់ដែលទិញលំនៅឋាននៅបុរីពិភពថ្មីនេះ បានធ្លាក់ចុះប្រាក់ចំណូលដោយសារបញ្ហាសេដ្ឋកិច្ច ជាហេតុបណ្ដាលឱ្យពួកគេលែងមានប្រាក់បង់រំលោះបន្តទៀត។
សម្រាប់ការប្រជុំនៅថ្ងៃស្អែកនេះ ក្នុងនាមជាតំណាងអតិថិជនបុរីពិភពថ្មីលោក តារា និយាយថា លោក នឹងទាមទារឱ្យក្រុមហ៊ុនរក្សាគោលការណ៍ ដោយប្រគល់ប្រាក់៥០ភាគរយនៃប្រាក់បង់រំលោះប្រចាំខែ និងប្រាក់ដើម(ប្រាក់កក់ទិញដំបូង) ឱ្យពលរដ្ឋដែលលែងមានលទ្ធភាពបង់បន្ត ទាំងដែលផ្ទះបានរឹបអូស និងកំពុងរឹបអូស។លោកបន្តស្នើឱ្យក្រុមហ៊ុនបុរីពិភពថ្មី បន្ថយអត្រាការប្រាក់ពី ១២ភាគរយ មក៧,៥ភាគរយក្នុងមួយឆ្នាំ ព្រមទាំងអនុគ្រោះពលរដ្ឋបង់រំលោះប្រចាំខែ៥០ភាគរយនៃប្រាក់សរុបក្នុងមួយខែ ដោយមានរយៈពេល៨ឆ្នាំ។
លោកបន្តថា៖ «យោងតាមសេដ្ឋកិច្ចពិភពលោក ដែលមានវិបត្តិកូវីដ និងមានសង្រ្គាមពិភពលោក ប្រជាពលរដ្ឋលោក បាត់បង់ចំណូលប៉ះពាល់ពីជីវភាពរបស់ប្រជាពលរដ្ឋរាល់ថ្ងៃនេះ ធ្វើឱ្យប្រជាពលរដ្ឋយើងបាត់បង់នូវប្រាក់ចំណូលច្រើន ខ្លះក៏បាត់បង់ការងារ ខ្លះរកស៊ីទៅមិនបាន ខាត ឬចំណូលបានតិច»។
បើតាមលោក តារា ជឿថា មានអតិថិជនបុរីពិភពថ្មីក្នុងខណ្ឌកំបូល អាចមានជាង១៥០០នាក់ ដែលរងផលប៉ះពាល់ពីការរឹបអូសលំនៅឋាននេះ ប៉ុន្តែលោក ថាមានប្រជាពលរដ្ឋជាង២០០នាក់ បាននាំគ្នាតវ៉ាប្រឆាំងនឹងក្រុមហ៊ុនជារៀងរាល់ថ្ងៃ។
ពលរដ្ឋមួយរូបដែលប្រឈមនឹងការរឹបអូសលំនៅឋានពីក្រុមហ៊ុនបុរីពិភពថ្មីដែរ គឺអ្នកស្រី ព្រាប ស្រីខួច និយាយថា អ្នកស្រីបានខកខានក្នុងការបង់រំលោះផ្ទះចំនួន៤ខែមកហើយ ដែលស្ថិតក្នុងបុរីកំបូល២ ក្រោយប្រាក់ចំណូលអ្នកស្រី ធ្លាក់ចុះរហូតដល់ពាក់កណ្ដាល។
អ្នកស្រី បន្តថា ក្រោយអ្នកស្រីអស់លទ្ធភាពក្នុងការបង់បន្ត និងចង់លក់ផ្ទះទៅក្រុមហ៊ុនវិញ ភាគីក្រុមហ៊ុនបានអះអាងថា ក្រុមហ៊ុននេះលែងមានគោលការណ៍ក្នុងការទិញលំនៅឋានត្រលប់មកវិញពីប្រជាពលរដ្ឋទៀតក្នុងតម្លៃ៥០ភាគរយនៃប្រាក់បង់សរុបទៀតនោះទេ។ប្រភពដដែល ឱ្យដឹងថា អ្នកស្រី បង់ប្រាក់ចំនួន៤២៥ដុល្លារជារៀងរាល់ខែ និងអស់ប្រាក់សរុបជាង៤ម៉ឺន៤ពាន់ដុល្លារ ដែលមានរយៈពេល៥ឆ្នាំមកហើយ។
អ្នកស្រីបន្តថា៖ «ខ្ញុំទុកចិត្តលើបុរីពិភពថ្មី ព្រោះបុរីធំ គាត់មានឈ្មោះល្បីល្បាញ ទោះបីអត់មានចារក្នុងកិច្ចសន្យា [ទិញវិញ៥០ភាគរយនៃប្រាក់បង់សរុប] មែនតែយើងជឿជាក់លើបុរី ថាគាត់នឹងធ្វើបានតាមកិច្ចសន្យារបស់គាត់»។
ជុំវិញករណីនេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា មានប្រសាសន៍ថា រដ្ឋាភិបាល អាចស្នើទៅភាគីក្រុមហ៊ុនដើម្បីពន្យាពេលការរឹបអូសលំនៅឋានហើយរកដំណោះស្រាយតាមរយៈស្ថាប័នហិរញ្ញវត្ថុដែលមានអត្រាការប្រាក់ទាបជាងការបង់រំលោះពីបុរីដោយផ្ទាល់។
លោកបន្តថា៖«ស្នើទៅខាងបុរីកុំឱ្យទាន់មានការរឹបអូសទុកពេលវេលាដើម្បីការដោះស្រាយ រកច្រកតាមរយៈបុរី ឬក៏តាមធនាគារឬមីក្រូហិរញ្ញវត្ថុណាដែលមានកម្រៃការប្រាក់ទាបជាងជាដើម»។
កាលពីថ្ងៃទី០៩ ខែមិថុនា ឆ្នាំ២០២៣ លោក ហ៊ុន សែន ដែលកាលនោះជានាយករដ្ឋមន្រ្តីកម្ពុជា បានព្រមានពីវិបត្តិសេដ្ឋកិច្ចនៅកម្ពុជានឹងកើតមានឡើង ប្រសិនបើម្ចាស់បុរីសម្រេចរឹបអូសលំនៅឋានរបស់ប្រជាពលរដ្ឋណាដែលគ្មានលទ្ធភាពបង់ប្រាក់បន្ត។
ការព្រមាននេះធ្វើឡើង ស្របពេលមានការព្យាករណ៍ថាសេដ្ឋកិច្ចសកលនឹងដាំក្បាលចុះក្នុងឆ្នាំ២០២៣។
ទាំងអ្នកស្រាវជ្រាវ និងអតីតនាយករដ្ឋមន្រ្តីរូបនេះ បានលើកឡើងដូចគ្នាថា ផលប៉ះពាល់នៃជំងឺកូវីដ-១៩ សង្រ្គាមនៅអ៊ុយក្រែន និងការដាក់ទណ្ឌកម្មរបស់លោកខាងលិចទៅលើប្រទេសរុស្ស៊ី បានបណ្ដាលឱ្យប្រទេសជាច្រើនជួបប្រទះនឹងបញ្ហាសេដ្ឋកិច្ចរាប់ទាំងកម្ពុជាផងដែរ។
របាយការណ៍វាយតម្លៃចុងក្រោយរបស់ធនាគារពិភពលោក បង្ហាញថាកំណើនសេដ្ឋកិច្ចសកលត្រូវបានព្យាករណ៍ថានឹងថយចុះពី ៣,១% ក្នុងឆ្នាំ២០២២ មកត្រឹម ២,១% ក្នុងឆ្នាំ ២០២៣។
ទន្ទឹមនេះសារព័ត៌មានក្នុងស្រុកបានចេញផ្សាយកាលពីពេលថ្មីៗនេះថា រយៈពេល៤ខែនៃដើមឆ្នាំ២០២៣ ទំហំពាណិជ្ជកម្មអន្តរជាតិកម្ពុជាបានធ្លាក់ចុះ១៤,១% បើប្រៀបធៀបក្នុងរយៈពេលដូចគ្នាកាលពីឆ្នាំមុន៕
