មន្ទីរពេទ្យសហភាពខ្មែរសូវៀត បានធ្វើការស្រាយបំភ្លឺ និងច្រានចោលចំពោះការបង្ហោះសាររបស់គ្រួសារជនរងគ្រោះដែលបានស្លាប់បាត់បង់ជីវិត ខណៈបញ្ជូនទៅព្យាបាលជំងឺនៅមន្ទីរពេទ្យនេះ ដោយថាជាការអះអាងដែលមានខ្លឹមសារមិនពិត។
កាលពីថ្ងៃទី២៨ ខែមករា ឆ្នាំ២០២៤នេះ គណនីហ្វេសប៊ុកឈ្មោះ Sreypich Thou ដែលអះអាងថាជាកូនស្រីរបស់ជនរងគ្រោះដែលបានស្លាប់ បានបង្ហោះសារមួយដែលមានខ្លឹមសារថា «មន្ទីរពេទ្យមិត្តភាពខ្មែរ-សូវៀតសម្លាប់ប៉ាខ្ញុំ! តើមានបងប្អូនខ្មែរប៉ុន្មាននាក់ទៀតដែលត្រូវជួបរឿងបែបនេះ?”។
សាររបស់គណនីហ្វេសប៊ុកដដែលនោះ បានបង្ហាញពីការមិនសុខចិត្តដែលឪពុករបស់ខ្លួន បានស្លាប់បាត់បង់ជីវិត ដោយសារតែភាពយឺតយ៉ាវនៅក្នុងការបំពេញតួនាទីរបស់ពេទ្យ ដោយទាមទារឱ្យមានការបង់ប្រាក់ជាមុន ហើយដំណើរការនេះត្រូវរងចាំរយៈពេលយូរ។
គណនីហ្វេសប៊ុក ស្រីពេជ្រ បានបន្តថា៖ រឿងដែលហួសចិត្តជានេះទៅទៀត នៅពេលដែលខ្ញុំពេទ្យយកប៉ាចេញទៅព្យាបាលបន្ត នៅវៀតណាមខាងឡានសាមុយពេទ្យរ៉ុស្សី បានស្កាក់ឡានសាមុយដែលមកយកប៉ាខ្ញុំ ដោយមិនឱ្យចូល ដោយនិយាយថាមន្ទីរពេទ្យ មិនអនុញ្ញាតឱ្យឡានខាងក្រៅដឹកអ្នកជំងឺចេញទេ ទាំងដែលខ្ញុំផ្តិតមេដៃ សុំអនុញ្ញាតយកប៉ាចេញព្យាបាលទៅជាមួយហើយក៏ដោយ»។
ជុំវិញករណីនេះ មន្ទីរពេទ្យខ្មែរសូវៀត បានចេញលិខិតបំភ្លឺ នៅល្ងាចថ្ងៃទី២៩ ខែមករា ឆ្នាំ២០២៤ ដោយច្រានចោលការលើកឡើងរបស់គណនីហ្វេសប៊ុកឈ្មោះ SreyPich Thou (Laboon) និងសារព័ត៌មាន RFI ដែលបានចុះផ្សាយខ្លឹមសារព័ត៌មានមិនពិតលើករណីអ្នកជំងឺដែលត្រូវបានក្រុមគ្រួសារបញ្ជូនមកផ្នែកសង្គ្រោះបន្ទាន់ នៃមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២៦ ខែមករា ឆ្នាំ២០២៤ វេលាម៉ោង២:៣៧នាទី រំលងអធ្រាត្រ ដោយអ្នកជំងឺមានសភាពធ្ងន់ធ្ងរខ្លាំង។
លិខិតបំភ្លឺដដែលបន្តថា ក្រុមគ្រូពេទ្យបានព្យាយាមជួយសង្គ្រោះអស់ពីលទ្ធភាព ក្រោយពីបានធ្វើការពិនិត្យ និងវិភាគ អមវេជ្ជសាស្ត្រទៅតាមលក្ខណៈបច្ចេកទេស ដើម្បីរកមូលហេតុឱ្យបានច្បាស់លាស់រួចមក លទ្ធផលបានបង្ហាញថា អ្នកជំងឺមានដាច់សរសៃឈាមខួរក្បាលបណ្តាលឱ្យហូរឈាមក្នុងខួរក្បាលធ្ងន់ធ្ងរ។
លិខិតបំភ្លឺ បានគូសបញ្ជាក់ថា៖ «ក្រុមគ្រូពេទ្យផ្នែកសង្គ្រោះបន្ទាន់ បានពិភាក្សាជាមួយក្រុមគ្រូពេទ្យផ្នែកឯកទេសវះកាត់ខួរក្បាល និងបានពន្យល់អំពីស្ថានភាពធ្ងន់ធ្ងររបស់អ្នកជំងឺ ដែលហួសពីលទ្ធភាពក្នុងការជួយសង្គ្រោះតាមមធ្យោបាយវេជ្ជសាស្រ្តផ្សេងៗ រួមទាំងការវះកាត់ខួរក្បាលផងដែរ»។
លិខិតបំភ្លឺបន្ថែមថា ខាងមន្ទីរពេទ្យ ក៏បានជួយសម្របសម្រួលអនុញ្ញាតឱ្យចេញទៅព្យាបាលបន្តនៅប្រទេសវៀតណាម ដោយប្រើប្រាស់សេវារថយន្តសង្គ្រោះបន្ទាន់ខាងក្រៅ ដោយខ្លួនឯងផងដែរ។
គេហទំព័រ Newsroom Cambodia មិនអាចសុំការបញ្ជាក់បន្ថែមពីប្រធានមន្ទីរពេទ្យមិត្តភាពសហភាពខ្មែរ-សូវៀត លោក ងី ម៉េង បានទេ ដោយលោកប្រាប់ថាជាប់ប្រជុំ។
អ្នកនាំពាក្យក្រសួងសុខាភិបាល លោក កុយ វណ្ណី បានបញ្ជាក់តាមបណ្តាញសង្គមតេឡេក្រាមថា កិច្ចការនេះ ត្រូវបានត្រួតពិនិត្យ និងបន្តពិនិត្យគ្រប់ជ្រុងជ្រោយ ដោយក្រុមការងារក្រសួងសុខាភិបាល។ លោកបង្ហាញការសោកស្តាយចំពោះការបាត់បង់អាយុជីវិតរបស់ជនរងគ្រោះ ដោយសារតែស្ថានភាពអ្នកជំងឺ ដែលចូលទៅព្យាបាលមានសភាពធ្ងន់ធ្ងរលើសពីអ្វីដែលវេជ្ជសាស្ត្រ អាចជួយសង្គ្រោះបាន។
លោកថា៖ «ការឈឺចាប់នៃសមាជិកគ្រួសារ យើងទាំងអស់គ្នាពិតជាបានយល់ ជ្រួតជ្រាបយ៉ាងជាក់ច្បាស់។ ក្រុមការងារមន្ទីរពេទ្យនៅបន្តព្យាយាមពាំនាំការពន្យល់អំពីភាពធ្ងន់ធ្ងរនៃជំងឺ។ កិច្ចការផ្សេងៗនៅសេសសល់ខ្លះៗ ដែលគិតថាជាកិច្ចការដែលត្រូវបន្តអភិវឌ្ឍន៍ និងកាន់តែត្រូវធ្វើឱ្យបានកាន់តែប្រសើរ ក៏យើងមិនដែលធ្វេសប្រហែសទេ។ រាល់បុគ្គលដែលអនុវត្តការងារតែងតែត្រូវបានវាយតៃម្លដោយក្រុមការងារ និងទទួលការកែលម្អទៅតាមភារកិច្ចការងារ»។
កញ្ញា ធូ ស្រីពេជ្រ បានបដិសេធផ្តល់បទសម្ភាសន៍មកកាន់គេហទំព័រ Newsroom Cambodia នៅថ្ងៃទី៣០ ខែមករានេះ ដោយថា កញ្ញាជាប់រវល់នៅក្នុងការដោះស្រាយជាមួយខាងមន្ទីរពេទ្យ។
តែយ៉ាងណា កញ្ញា ស្រីពេជ្រ បានលើកឡើងក្នុងបណ្តាញសង្គមហ្វេសប៊ុកនៅថ្ងៃទី៣០ ខែមករានេះថា៖ «ក្នុងមានខ្ញុំជាក្រុមគ្រួសារសព ក៏ដូចជាប្រជាជនខ្មែរម្នាក់ក្នុងចំណោមរាប់ម៉ឺននាក់អ្នកដែលជួបរឿងនេះ ពិតជាមានការឈឺចាប់ណាស់។ ស្ថាប័ននៅតែគាំទ្របុគ្គលិក និងកិត្តិយសស្ថាប័នខ្លួន ជាជាងទទួលយកការពិត មិនឃើញទទួលស្គាល់ហើយយកមកកែតម្រូវ ព្រោះតែការមានៈនេះហើយ ទើបបងប្អូនអស់ជំនឿចិត្ត និងមានជនរងគ្រោះច្រើនបែបនេះ (បើទោះបីមានការសង្គ្រោះច្រើន ក៏ប្រជាជនដែលត្រូវរងគ្រោះក៏មិនតិចដែរ)»។
កញ្ញាបានរៀបរាប់ដោយភ្ជាប់មកជាមួយនូវអំណះអំណាងច្បាស់ៗថា មន្ទីរពេទ្យមិនមានអ្នកប្រចាំការគ្រប់គ្រាន់ ធ្វើការយឺតយ៉ាវ ពុំមានការសង្គ្រោះបឋមត្រឹមត្រូវ និងប្រើពាក្យពេចន៍ខ្វះសុជីវធម៌ និងក្រមវិជ្ជាជីវៈជាពេទ្យជាដើម។
តាមរយៈសារភ្ជាប់ជាមួយនឹងរូបភាពដែលបង្ហោះដោយកញ្ញា ធូ ស្រីពេជ្រ បានធ្វើឱ្យអ្នកប្រើប្រាស់បណ្តាញសង្គម មានការចាប់អារម្មណ៍ និងអាណិតអាសូរ ព្រមទាំងបានជួយចែករំលែកជាបន្តបន្ទាប់ផងដែរ ក្នុងនោះមានអ្នកប្រើប្រាស់បណ្តាញសង្គមមួយចំនួន ក៏បានបញ្ចេញមតិរិះគន់លើមន្ទីរពេទ្យ និងវិស័យសុខាភិបាលផងដែរ។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ មានប្រសាសន៍ថា សេវាសុខាភិបាលនៅកម្ពុជាមិនអន់ទេ បើសិនជាមានកំណែទម្រង់បានត្រឹមត្រូវ។
លោកថា៖ «សេវាសុខភាពកម្ពុជា វាមិនអន់ទេ បើសិនជាមានការកំណែទម្រង់បានល្អទៅលើវិស័យនេះ ជាពិសេសគឺក្រមសីលធម៌របស់គ្រូពេទ្យ និងការយកចិត្តទុកដាក់ទៅលើការផ្តល់សេវាសុខភាពទៅដល់សាធារណជន […] កន្លងមក ក៏មានការរិះគន់ច្រើនដែរ ហើយអ្នកមានទ្រព្យធន មន្ត្រីមួយចំនួននាំគ្នាទៅព្យាបាលជំងឺនៅខាងក្រៅ [បរទេស] ដែលនេះធ្វើឱ្យមានការបាត់ទំនុកចិត្តទៅលើសេវាសុខភាពក្នុងស្រុក»។
តែយ៉ាងណា លោកបានជំរុញឱ្យមានការស្រាវជ្រាវអំពីរឿងនេះ ដើម្បីស្វែងរកចំណុចកណ្តាលមួយ និងដើម្បីស្វែងរកយុត្តិធម៌មួយដ៏ត្រឹមត្រូវជូនទៅដល់អ្នករងគ្រោះ។ លោកក៏បានទទូចឱ្យក្រសួងសុខាភិបាល ចាត់នូវវិធានការតឹងរឹងចំពោះបុគ្គលិកសុខាភិបាលទាំងឡាយណា ដែលមិនគោរពតាមក្រមសីលធម៌ វិជ្ជាជីវៈជាអ្នកផ្តល់សេវាសុខភាព ដើម្បីធានាកុំឱ្យមានករណីបែបនេះកើតឡើងតទៅទៀត។
លោកថា៖ «ពេលមានជម្លោះអ៊ីចឹង ភាគីសងខាងដណ្តើមយកត្រូវ ជាពិសេសក្រុមគ្រួសារដែលមានអ្នកស្លាប់ គឺមានការតូចចិត្ត ហើយគាត់មានការរិះគន់ច្រើន […] ក្រសួងសុខាភិបាល គួរតែស៊ើបអង្កេតទៅលើរឿងនេះឱ្យបានត្រឹមត្រូវ មិនមែនតែលាងភាពស្អាតស្អំទេ ប៉ុន្តែឱ្យមានយុត្តិធម៌សម្រាប់ភាគីទាំងសងខាង»៕
