ក្រសួងបរិស្ថាន នឹងធ្វើការបំពាក់ឧបករណ៍ស្វ័យប្រវត្តិនៅតាមបណ្តារោងចក្រសហគ្រាស សម្រាប់ការត្រួតពិនិត្យគុណភាពទឹកមុននឹងបង្ហូរចេញ ដើម្បីជាការរួមចំណែកកាត់បន្ថយការបង្ហូរកាកសំណល់រាវកខ្វក់ទៅក្នុងទឹកទន្លេ និងជាផ្នែកមួយនៃយុទ្ធនាការសម្អាតទន្លេរបស់ក្រសួងផងដែរ។
អ្នកនាំពាក្យក្រសួងបរិស្ថាន លោក ខ្វៃ អាទិត្យា បានថ្លែងឱ្យដឹងនៅថ្ងៃទី២៣ ខែមេសា ឆ្នាំ២០២៤នេះថា ឧបករណ៍ដែលត្រៀមនឹងបំពាក់នៅតាមរោងចក្រសហគ្រាសនេះ មានឈ្មោះថា «ឧបករណ៍ស្វ័យត្រួតពិនិត្យ» ដែលមានសមត្ថភាពត្រួតពិនិត្យទឹកកខ្វក់ដែលអាចហូរចូលទៅក្នុងទន្លេ។
លោកមានប្រសាសន៍ថា៖ «វាអាចត្រួតពិនិត្យការបញ្ចេញទឹកកខ្វក់ចូលទៅក្នុងទឹកទន្លេតាមរយៈអូរ ប្រឡាយនានា។ […] នេះគឺជាផ្នែកមួយនៃយុទ្ធនាការសម្អាតទន្លេ ដែលដាក់ចេញក្រោមគំនិតផ្តួចផ្តើមរបស់រដ្ឋមន្ត្រី ដើម្បីធានាឱ្យមានទឹកស្អាតជានិច្ច នៅក្នុងការបម្រើសេចក្តីត្រូវការរបស់ប្រជាពលរដ្ឋប្រកបដោយសុខភាពល្អ»។
លោកបន្តថា ក្រសួងក៏បានរៀបចំឱ្យរោងចក្រសហគ្រាស ជាពិសេសរោងចក្រដែលប្រើប្រាស់ទឹកច្រើន ដូចជា រោងចក្របោកគក់ ជ្រលក់ក្រណាត់ និងរោងចក្រវាយនភណ្ឌមួយចំនួនទៀត ត្រូវតែដាក់បំពាក់ឧបករណ៍នេះ។
លោកថា៖ «យើងលើកទឹកចិត្តឱ្យរោងចក្រទាំងអស់បំពាក់ឧបករណ៍ទាំងនេះ ដោយសារតែវាមានតម្លៃថោកសមរម្យ ជាមួយនឹងគុណប្រយោជន៍ដ៏ច្រើនដល់សង្គមជាតិ ជាពិសេសចូលរួមកាត់បន្ថយការបំពុកនានា ដែលធ្វើឱ្យកម្ពុជាស្អាតទាំងអស់គ្នា។ […] ទិន្នន័យដែលបានផ្តល់ដោយឧបករណ៍នេះ គឺផ្តល់ឱ្យឃើញជាក់ស្តែង នៅក្រសួងបរិស្ថាន យើងអាចមើលឃើញអំពីកំហាប់នៃគុណភាពទឹក មុននឹងអនុញ្ញាតឱ្យបង្ហូរចេញ»។
ពាក់ព័ន្ធនឹងកិច្ចការនេះដែរ លោក ខ្វៃ អាទិត្យា បន្តថា ឧបករណ៍ស្វ័យប្រវត្តិនេះ នឹងជួយសម្រួលដល់ក្រុមការងារជំនាញផងដែរ ដោយមិនទាមទារឱ្យមានការចុះអធិការកិច្ចជាប្រចាំនៅតាមរោងចក្រសហគ្រាសទៀតនោះទេ ខណៈម្ចាស់រោងចក្រ ក៏មិនចាំបាច់ធ្វើរបាយការណ៍ជាប្រចាំជូនដល់ក្រសួងតាមតម្រូវការនីតិវិធីទៀតនោះទេ។
លោកបន្តទៀតថា កិច្ចការនេះស្ថិតក្នុងមុំមួយក្នុងចំណោមមុំទាំងបីនៃយុទ្ធសាស្ត្រចក្រា ដែលផ្តោតសំខាន់លើភាពស្អាត ភាពបៃតង និងចីរភាព។ ភាពស្អាតទៀតសោតនោះ សំដៅលើបីផ្សេងៗគ្នារួមមាន ភាពស្អាតលើគោក ភាពស្អាតក្នុងទឹក និងភាពស្អាតលើអាកាស។
លោកមានប្រសាសន៍ថា៖ «កន្លងមកនេះ យើងបានតម្រូវឱ្យរោងចក្រសហគ្រាស ធ្វើការគ្រប់គ្រងនិងបញ្ចេញទឹកកខ្វក់តាមរយៈការរៀបចំជាបទដ្ឋានបច្ចេកទេស ដើម្បីធ្វើឱ្យការបន្សុតប្រតិកម្មក្លាយជាទឹកស្អាត ហើយបានយើងបញ្ចេញតាមរយៈការសាងសង់អាងបច្ចេកទេសអីជាដើម ដែលមានការបំពាក់ឧបករណ៍ត្រួតពិនិត្យមួយចំនួនដែរ ប៉ុន្តែយើងត្រូវពង្រឹងបន្ថែមទៀត»។
អ្នកនាំពាក្យក្រសួងបរិស្ថានរូបនេះ ក៏បានអំពាវនាវ និងលើកទឹកចិត្តដល់ប្រជាពលរដ្ឋទូទៅ ជាពិសេសម្ចាស់រោងចក្រសហគ្រាស ចូលរួមគិតគូទៅលើបញ្ហាបរិស្ថាន និងធនធានធម្មជាតិ ដោយគ្រប់គ្រងឱ្យបានល្អនៅក្នុងការបញ្ចេញកាកសំណល់ ការទុកដាក់សំរាម និងសហការជាមួយក្រសួងបរិស្ថាននៅក្នុងការបំពាក់ឧបករណ៍ស្វ័យត្រួតពិនិត្យ ដើម្បីបញ្ជៀសការបង្ហូរទឹកបំពុលចូលទៅក្នុងទឹកទន្លេ។
គួរឲ្យដឹងផងដែរថា បន្ទាប់ពីទទួលបានជោគជ័យក្នុងជំហានទី១នៃការកាត់បន្ថយសំណល់ប្លាស្ទិកនៅលើគោក កាលពីថ្ងៃទី១ ខែមីនា ឆ្នាំ២០២៤កន្លងទៅ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានប្រកាសដាក់ចេញនូវយុទ្ធនាការសំអាតបឹងទន្លេសាប ដើម្បីការពារត្រីដែលជាប្រភពអាហារូបត្ថម្ភដ៏សំខាន់ ដែលបានផ្គត់ផ្គង់អាហារដល់ប្រជាជនកម្ពុជាប្រមាណ ៧លាននាក់។
បើតាមការឱ្យដឹងពីរដ្ឋមន្ត្រីក្រសួងបរិស្ថាន កន្លងមក ទន្លេសាប បានទទួលរងការបោះសំរាម-ប្លាស្ទិកចូលយ៉ាងច្រើន។ ការលើកឡើងបែបនេះ គឺបន្ទាប់ពីលោកបានចុះត្រួតពិនិត្យមើល សកម្មភាពសម្អាតដងទន្លេសាប នៅមុខព្រះបរមរាជវាំង រាជធានីភ្នំពេញ ដោយម៉ាស៊ីនប្រមូលសំរាមលើផ្ទៃទឹក របស់ក្រុមហ៊ុន Everwave កាលពីថ្ងៃទី២០ ខែកុម្ភៈ ឆ្នាំ២០២៤។
លោក អ៊ាង សុផល្លែត មានប្រសាសន៍ថា៖ «យុទ្ធនាការសម្អាតលើផ្ទៃទឹក គឺសម្អាតថង់ប្លាស្ទិកលើផ្ទៃទឹក ទប់ស្កាត់មិនឱ្យហូរចូលទន្លេសាប តែម្តង ដែលជាអាទិភាពចម្បង។ […] ក្រសួងបរិស្ថាន ចង់ឱ្យត្រីជាប្រភពប្រូតេអ៊ីនរបស់ប្រជាជនយើង ដែលអាចចិញ្ចឹមជីវិតបានប្រមាណ ៧លាននាក់ នៅគង់វង្ស»។
នាយកប្រតិបត្តិនៃបណ្តាញយុវជនកម្ពុជា លោក ហេង គីមហុង សាទរចំពោះវិធានការនេះ ប៉ុន្តែលោកក៏បានបង្ហាញការព្រួយបារម្ភដែរថា អាចនឹងមានចន្លោះប្រហោងដែលមន្ត្រីខិលខូចអាចនៅតែឆ្លៀតឱកាសនៅក្នុងការប្រព្រឹត្តិអំពើពុករលួយ ដើម្បីទាញយកផលប្រយោជន៍បុគ្គល។
លោកថា៖ «វិធានការហ្នឹងល្អ ដើម្បីចូលរួមការពារកុំឱ្យមានការហូរសាយភាយសារធាតុគីមីអីចូលទៅក្នុងទឹក វាល្អក្នុងការការពារទប់ស្កាត់បម្រែបម្រួលសុខុមាលភាពទន្លេ ហើយនឹងប្រព័ន្ធអេកូឡូស៊ីនៅក្នុងទន្លេផងដែរ។ […] ប៉ុន្តែទន្ទឹមជាមួយនឹងឧបករណ៍ហ្នឹង ក៏ត្រូវតែធានាឱ្យបានពីគុណភាពមន្ត្រីដែរ កុំឱ្យមន្ត្រីរបស់យើងគាត់ កន្លែងណាមានការបង្ហូរទឹកដែលគាត់ដឹងទៅ វាទៅជាឱកាសនៅក្នុងការប្រព្រឹត្តិអំពើពុករលួយអីផ្សេងៗ ត្រូវតែមានការអនុវត្តកាតព្វកិច្ចដោយអាក់ខានពុំបានអាហ្នឹងបានល្អ»។
លោកក៏បានអំពាវនាវឱ្យមានការចាត់វិធានការឱ្យបានល្អ និងមិនលើកលែងដល់បុគ្គលទាំងឡាយណាដែលប្រព្រឹត្តិផ្ទុយនឹងច្បាប់ ដែលមិនអនុញ្ញាតឱ្យនរណាម្នាក់ឆ្លៀតយកឪកាសនៃការអនុវត្តគោលនយោបាយល្អប្រសើររបស់រាជរដ្ឋាភិបាល ទៅធ្វើជាឧបករណ៍បម្រើផលប្រយោជន៍ផ្ទាល់ខ្លួន។
ចំណែក លោក អាត់ ធន់ ប្រធានសហភាពការងារកម្ពុជា (CLC) ក៏បានបង្ហាញពីការគាំទ្ររបស់លោកចំពោះការដាក់ចេញនូវគ្រោងការសកម្មភាពទប់ស្កាត់ការបំពុលប្រភពទឹក ខណៈលោកបានកត់សម្គាល់ឃើញថាកន្លងមកមានការបំពុលច្រើន។
លោកថា៖ «ខ្ញុំគិតថា វាជាការល្អដែលក្រសួងបានដាក់ចេញនូវវិធានការមួយនេះ ព្រោះកន្លងមកមានក្រុមហ៊ុនផ្ដេសផ្តាសច្រើនណាស់ ដែលបានបង្ហូរទឹកកខ្វក់ចូលទៅក្នុងប្រភពទឹក ដែលហូរចូលទៅក្នុងទន្លេ ហើយបង្កឱ្យមានការបំពុលទឹក ហើយវាមានការប៉ះពាល់បរិស្ថានខ្លាំងណាស់»។
លោកក៏បានជំរុញ និងលើកទឹកចិត្តឱ្យរោងចក្រសហគ្រាសទាំងអស់ ចូលរួមក្នុងការការពារប្រភពទឹកស្អាត តាមរយៈការសហការនៅក្នុងការបំពាក់ឧបករណ៍ស្វ័យត្រួតពិនិត្យ ដើម្បីធានាឱ្យបាននូវសុខុមាលភាពទឹកស្អាតសម្រាប់ការប្រើប្រាស់ប្រកបដោយចីរភាព។
សូមបញ្ជាក់ផងដែរថា យុទ្ធនាការសម្អាតទន្លេនឹងអូសបន្លាយរហូតដល់ឆ្នាំ២០២៨ ដែលរួមមានប្រតិបត្តិការសំអាតតាមដងទន្លេមេគង្គ ទន្លេសាប និងទន្លេបាសាក់ ព្រមទាំងកម្មវិធីអប់រំដែលផ្តោតលើការយល់ដឹងអំពីការទុកដាក់សំរាមរបស់ប្រជាពលរដ្ឋក្នុងមូលដ្ឋាន ក្នុងភូមិសាស្រ្តចម្បងរបស់រាជធានីភ្នំពេញ និងខេត្តជាប់ដងទន្លេ។
កាលពីឆ្នាំ២០២២ កម្ពុជាក៏បានអនុវត្តយុទ្ធនាការសម្អាតទន្លេមេគង្គ ដើម្បីសោភណភាពទីក្រុង ដោយប្រើប្រាស់ទូកប្រមូលសំរាម បំពាក់បច្ចេកវិទ្យាថ្មីរបស់អាល្លឺម៉ង់ ដែលមានសមត្ថភាពអាចប្រមូលទិន្នន័យទីតាំងដែលមានសំរាមបានរហ័ស តាមរយៈដ្រូន និងកាមេរ៉ា ដែលមានសមត្ថភាពប្រមូលសំរាមក្នុងទឹកបានប្រមាណ ២០តោនក្នុងមួយថ្ងៃ៕
