តុលាការខេត្តកំពង់ស្ពឺបានកំណត់បើកការជំនុំជម្រះជាថ្មីទៀត នាចុងខែឧសភាខាងមុខនេះ នៅក្នុងសំណុំរឿងប្រធានសហជីពមូលដ្ឋាន ប្រចាំនៅរោងចក្រ វីង ស្តារស៊ូ(Wing Star Shoeos) ដែលក្រុមសហជីពចាត់ទុករឿងក្តីនេះថាជាចេតនាមិនចង់ឱ្យមាន សហជីពជួយការពារផលប្រយោជន៍របស់កម្មករ នៅក្នុងរោងចក្រផលិតស្បែកជើងមួយនេះ។
អ្នកនាំពាក្យសាលាដំបូងខេត្តកំពង់ស្ពឺលោក ផេង ស៊ីភ័ណ បានប្រាប់គេហទំព័រ Newsroom Cambodia នៅថ្ងៃនេះថាចៅក្រមជំនុំជម្រះ បានកំណត់ថ្ងៃនៃការបើកសវនាការឡើងវិញរួចហើយ គឺនៅចុងខែឧសភាខាងមុខនេះ។បន្ថែមពីលើនេះ ការផ្អាកសវនាការកន្លងទៅ គឺដោយសារមានការស្នើសុំលើកពេល ជំនុំជម្រះ ពីមេធាវីការពារសិទ្ធិឱ្យជនសង្ស័យ ក្រោមហេតុផលខ្វះសាក្សីដែលផ្តល់សក្ខីកម្ម ដោះបន្ទុកឱ្យជនជាប់ចោទ ក្នុងសំណុំរឿងព្រហ្មទណ្ឌមួយនេះ។
លោកបន្តថា៖ «សំណុំរឿងខាងលើ ដាក់កម្មវិធីជម្រះថ្ងៃទី២៩ ខែឧសភា ឆ្នាំ២០២៤ ព្រឹក មេធាវីការពារសិទ្ធឲ្យជនជាប់ចោទឈ្មោះ ជា ចាន់ ជាអ្នកស្នើសុំលើកពេល ព្រោះសាក្សីសំខាន់ម្នាក់អវត្តមាន ហើយជនជាប់ចោទក៏បានឯកភាពផងដែរ »។
លោក ជា ចាន់ ត្រូវបានកម្លាំងនគរបាលខេត្តកំពង់ស្ពឺ ចាប់ខ្លួនកាលពីថ្ងៃទី១៤ កុម្ភៈ ឆ្នាំ២០២៣។ការចោទប្រកាន់ប្រឆាំងលោក ជា ចាន់ ធ្វើឡើងក្រោយពីលោកត្រូវបានកម្មករផ្តល់សេចក្តីទុកចិត្ត តាមរយៈការបោះឆ្នោតឱ្យធ្វើជាប្រធានសហជីពមូលដ្ឋាន ប្រចាំនៅក្នុងរោងចក្រ វីង ស្តារស៊ូ នេះ។
ភ្លាមៗពីបន្ទាប់លោក ជា ចាន់ ត្រូវចាប់ខ្លួន សហព័ន្ធសហជីពកម្ពុជា បានចេញសេចក្តីថ្លែងការណ៍មួយដែរ ដោយចាត់ទុករឿងក្តីនេះស្ថិតក្រោមមន្ទិលថា មានចេតនារៀចំផែនកាទុកជាមុនរវាងថៅកែ និងអាជ្ញាធរ ដើម្បីកម្ទេចសហជីពមូលដ្ឋានដែលហៅថា CTU ប្រចាំនៅក្នុងរោងចក្រ វីង ស្តារស៊ូ នេះចេញ។
របាយការណ៍ដែលចេញដោយ សហព័ន្ធសហជីពកម្ពុជា បង្ហាញថា រោងចក្រដែលកំពុងមានភាពចម្រូងចម្រាស់ជាមួយកម្មករនេះគឺជារោងចក្រផលិតស្បែកជើងនៅចេញទៅជប៉ុន ដែលមានក្រុមហ៊ុន ASICS ជាអ្នកបញ្ជាទិញ។រោងចក្រ វីង ស្តារស៊ូ ស្ថិតនៅក្នុងឃុំមហាឬស្សី ស្រុកគងពិសី ខេត្តកំពង់ស្ពឺ។
ចំណែក ប្រធានសម័្ពន្ធសហជីពកម្ពុជា អ្នកស្រី យ៉ាង សោភ័ណ្ឌ យល់ឃើញថា ការចោទប្រកាន់ប្រឆាំងលោក ជា ចាន់ នេះហាក់មិនសមហេតុផលអ្វីនោះទេ។អ្នកស្រីបន្តថា ក្នុងនាមសហជីពការពារផលប្រយោជន៍សម្រាប់កម្មករ អ្នកស្រីស្នើឱ្យដោះលែង ប្រធានសហជីពមូលដ្ឋាន ប្រចាំរោងចក្រ វីង ស្តារស៊ូ នេះដោយគ្មានលក្ខខណ្ឌ។ម្យ៉ាងវិញទៀត ការយកចម្លើយដោយផ្អែកលើការដាក់បន្ទុករបស់ជនណាមួយ ដែលគ្មានតម្រុយអ្វីសោះ គឺមិនមានមូលដ្ឋាន គ្រប់គ្រាន់តាមផ្លូវច្បាប់ទេ។
អ្នកស្រីបន្តថា៖«បានពួកបងស្នើសុំអោយមានការដោះលែង អោយគាត់នៅក្រៅឃុំហើយស្នើសុំអោយតុលាការលើកលែងចោទប្រកាន់ទៅលើគាត់ ជាទូទៅខ្ញុំចង់បញ្ជាក់ឡើងវិញថាគណនីដែលចោទលោក ជា ចាន់គឺអត់ទាន់មានបទល្មើសដែលចាប់ជនដៃដល់នឹងបានទេ គ្រាន់តែជនម្នាក់ឆ្លើយដាក់ក៏ចាប់ដាក់ពន្ធធនាគារខ្ញុំថារឿងនេះអត់សមស្រប បើយើងមើលរឿងឡើងវិញជាការសមគំនិតរបស់ក្រុមហ៊ុនសុទ្ធសាធ»។
អ្នកស្រីបន្តថា៖«ដោយទីមួយនៅពេលដែលយើងបានរៀបចំចងក្រងក្នុងដើមខែមករា គឹខាងក្រុមហ៊ុនបានមកនិយាយជាមួយលោកជា ចាន់ ថាមិនអោយមានសហជីពនៅក្នុងរោងចក្រទៀតទេហើយបន្ទាប់មកគាត់អត់ព្រម ហើយខាងក្រុមហ៊ុនព្យាយាមមកជួបខ្ញុំខ្លួនឯងហើយបន្ទាប់មកយើងអត់យល់ស្របទៅគំនិតរបស់ក្រុមហ៊ុនដែលព្រោះសើ្នសុំមិនអោយមានសហជីពអត់បានទេ ត្រឡប់មកវិញមកដល់ពេលហ្នឹងថ្ងៃដែលគេចាប់លោកជា ចាន់ បានយើងដឹងថានេះជាការរៀបចំរបស់ក្រុមហ៊ុនសុទ្ធសាធព្រោះក្រុមហ៊ុនបានប្រហើរសំលេងតាំងពីដំបូង» ។
លោក ជា ចាន់ ត្រូវរង់ការចោទប្រកាន់ពីបទ«សមគំនិតក្នុងអំពើលួច »។បើទោះបែបណា សហជីពលើកឡើងថា ការចាប់ខ្លួនជនសង្ស័យនេះ ធ្វើឡើងដោយគ្មានដីកាពីតុលាការថែមទៀតផង។ចំណែក អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អន បានប្រាប់សារព័ត៌មានថា ករណីលោក ជា ចាន់ នេះវាហួសពីសមត្ថភាពរបស់ក្រសួង ដែលត្រូវដោះស្រាយហើយ។ប៉ុន្តែប្រសិនបើ ជនសង្ស័យមានតម្រូវការមេធាវីការពារផ្នែកច្បាប់ អាចដាក់សំណើរបាន ហើយក្រសួងនឹងរៀបចំមេធាវីការពារក្តីជូន។
បើទោះជាបែបណា សវនាការដែលបង្ខំចិត្តឱ្យតុលាការលើកពេល កាលពីថ្ងៃទី២៩ ខែមេសា ឆ្នាំ២០២៤ នៅមានភាពខ្វែងគំនិតគ្នា រវាងក្រុមការពារជនសង្ស័យ និងភាគីតុលាការ។ខាងតុលាការសំអាងហេតុថា ការលើកថ្ងៃជំនុំជម្រះ នៅពេលនោះ ដោយសារមេធាវីការពារសិទ្ធិឱ្យជនត្រូវចោទស្នើសុំពន្យាពេល។ប៉ុន្តែទាំងសហជីព និងភរិយាលោក ជា ចាន់ វិញ បានប្រាប់អ្នកកាសែតថា ការផ្អាកសវនាការនៅគ្រានោះ ដោយសារសាក្សីខាងភាគីដើមបណ្តឹង ដែលប្តឹងជនសង្ស័យ អវត្តមានទៅវិញទេ។
