ក្រសួងបរិស្ថាន អំពាវនាវដល់ប្រជាពលរដ្ឋ ព្រះសង្ឃ គ្រូបង្រៀន និងសិស្សានុសិស្ស ចូលរួមយុទ្ធនាការមួយ ដោយការសម្អាតជុំវិញបរិវេណផ្ទះ សាលារៀន វត្តអារាម និងតាមទីសាធារណៈ ចំនួន ១៥នាទី នៅរៀងរាល់ថ្ងៃសៅរ៍ ដើម្បីកម្ពុជាមានបរិស្ថានស្អាត និងការរស់នៅមានផាសុខភាព។
ការអំពាវនាវនេះ ធ្វើឡើងកាលពីថ្ងៃទី១៥ ខែឧសភា ឆ្នាំ២០២៤ ក្នុងឱកាសដែលក្រសួងបរិស្ថានប្រកាសបើកយុទ្ធនាការ «កម្ពុជាស្អាត ខ្មែរធ្វើបាន» ដើម្បីទប់ស្កាត់ ការការពារប្រើប្រាស់ និងបោះចោលសំរាមប្លាស្ទិក នៅទីសាធារណៈ។ បើតាមក្រសួងបរិស្ថាន យុទ្ធនាការនេះ បានអំពាវនាវដល់សិស្សានុសិស្ស ព្រះសង្ឃ និងប្រជាពលរដ្ឋមួយភូមិ ឬមួយឃុំ ឬមួយស្រុក ឬមួយខេត្ត ចេញមកទាំងអស់គ្នា រើសសំរាមជុំវិញបរិវេណផ្ទះ សាលារៀន វត្តអារាម និងតាមទីសាធារណៈ ចំនួន១៥នាទី នៅរៀងរាល់ថ្ងៃសៅរ៍ ដោយប្រមូលទុកដាក់សំរាមឱ្យបានត្រឹមត្រូវ។
ក្នុងពិធីបើកយុទ្ធនាការ «កម្ពុជាស្អាត ខ្មែរធ្វើបាន» នៅទីស្តីការក្រសួងបរិស្ថាន លោក អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងថា យុទ្ធនាការនេះ គឺជាយុទ្ធនាការដែលបង្ហាញយ៉ាងច្បាស់អំពីការចួលរួមរបស់ប្រជាពលរដ្ឋខ្មែរទូទាំងប្រទេស ក្នុងការសំអាតបរិស្ថានជុំវិញកន្លែងរស់នៅ។
លោកបន្តថា ភាពស្អាត និងសុខភាពប្រជាពលរដ្ឋ ជាការងារអាទិភាពដែលរាជរដ្ឋាភិបាល ក្នុងអាណត្តិទី៧ បាននឹងកំពុងយកចិត្តទុកដាក់។
លោករដ្ឋមន្ត្រីបន្ថែមថា៖ «ការសម្អាតអនាម័យបរិស្ថាននៅតាមមូលដ្ឋាន ប្រមូលទុកដាក់សំរាម រួមទាំងការកាត់បន្ថយសំណល់ប្លាស្ទិក ដែលឈានទៅបញ្ឈប់ការប្រើប្រាស់ប្លាស្ទិក ក្នុងចំណោមយុវជនជំនាន់ក្រោយ ធានាការគ្រប់គ្រងសំរាម ថែរក្សាអនាម័យបរិស្ថាន និងសុខុមាលភាពប្រជាពលរដ្ឋបានល្អប្រសើរ»។
អ្នកនាំពាក្យក្រសួងបរិស្ថាន លោក ខ្វៃ អាទិត្យា មានប្រសាសន៍ថា យុទ្ធនាការ «កម្ពុជាស្អាត ខ្មែរធ្វើបាន» នេះ គឺផ្តោតសំខាន់ទៅលើភាពស្អាត ដែលជាមុំយុទ្ធសាស្រ្តមួយ ក្នុងចំណោមមុំផ្សេងទៀតនៃយុទ្ធសាស្ត្រចក្រាក្នុងវិស័យបរិស្ថាន ក្នុងនោះមានភាពស្អាត បៃតង និងចីរភាព។
ករណីនេះ លោកបានអំពាវនាវឱ្យប្រជាពលរដ្ឋ និងអ្នកពាក់ព័ន្ធ ចូលរួមនៅក្នុងការសំអាតបរិស្ថានតាមរយៈយុទ្ធនាការនេះ ដោយការចូលរួមសម្អាតបរិវេណជុំវិញផ្ទះចំនួន ១៥នាទី នៅរៀងរាល់ថ្ងៃសៅរ៍។
លោកថ្លែងថា៖ «ខ្ញុំស្នើសុំឱ្យប្រជាពលរដ្ឋ ក៏ដូចជាអ្នកពាក់ព័ន្ធទាំងអស់ ចូលរួមទាំងអស់គ្នា ដើម្បីឱ្យកម្ពុជាយើងស្អាតចូលរួមប្រមូលទុកដាក់សម្អាតអនាម័យតាមភូមិឋាន ឱ្យបានត្រឹមត្រូវ។ ភាពស្អាតនេះ មិនមែនត្រឹមតែជួយឱ្យក្រុមគ្រួសារ ឬក៏បុគ្គលរបស់ខ្លួនមានស្ថានភាព មានសម្រស់ មានសុខភាពល្អនោះទេ គឺជួយឱ្យពិភពលោកកាត់បន្ថយបាននូវការប្រែប្រួលអាកាសធាតុ ក៏ដូចជាពិភពលោកគ្មានការបំពុលដោយប្លាស្ទីកនេះផងដែរ»។
បើតាមអ្នកនាំពាក្យរូបនេះ ជំហានបន្ទាប់របស់ក្រសួងបរិស្ថាន គឺនឹងមានការចែកធុងសំរាមទៅតាមសាលារៀន មណ្ឌលសុខភាព និងទីតាំងសាធារណៈផ្សេងទៀត សម្រាប់ការទុកដាក់សំរាមឱ្យបានត្រឹមត្រូវ ព្រមទាំងមានការរៀបចំឱ្យមានបច្ចេកទេសបន្ថែមទៀត ទៅលើការទុកដាក់សំរាមកែច្នៃ សំរាមធ្វើជាជីកំប៉ុស និងការបង្កើនចំណូលសម្រាប់ក្រុមការងារ ក៏ដូចជាប្រជាពលរដ្ឋ ដែលបានប្រមូលទុកដាក់សារធាតុប្លាស្ទីកផងដែរ។
លោក ហេង រត្តនា ជានិស្សិតនៅសកលវិទ្យាល័យភូមិន្ទនីតិសាស្រ្ត និងវិទ្យសាស្រ្តសេដ្ឋកិច្ច សាទរចំពោះយុទ្ធនាការនេះ ដោយថា លោកនឹងចូលរួមនៅក្នុងការសម្អាតបរិស្ថានរយៈពេល ១៥នាទី ដើម្បីបរិស្ថានស្អាត។
លោកថ្លែងថា៖ «ខ្ញុំយល់ឃើញថាល្អ ព្រោះដើម្បីជួយឱ្យបរិស្ថានយើងវាស្អាត កុំឱ្យមានសំរាម ខ្ញុំគិតថា បើយើងធ្វើអញ្ចឹងបាន អាចជួយឱ្យពលរដ្ឋយល់ដឹងអំពីបញ្ហាបរិស្ថានកាន់តែច្រើន និងអាចជួយអប់រំឱ្យក្មេងជំនាន់ក្រោយ ពិសេសកូនៗមានទម្លាប់សម្អាតពីតូចទៅ ដល់ពេលគាត់ធំមិនពិបាក ឱ្យគាត់មានទម្លាប់ល្អ ក្នុងការសម្អាតបរិស្ថាន»។
ព្រះតេជគុណ យ៉ន សុខហេង គង់នៅវត្តមួយក្នុងខណ្ឌចំការមន រាជធានីភ្នំពេញ ក៏បានគាំទ្រចំពោះយុទ្ធនាការនេះផងដែរ។ ព្រះតេជគុណមានសង្ឃដីកាថា ការចំណាយរយៈពេល ១៥នាទី ជារៀងរាល់ថ្ងៃសៅរិ៍នេះ ជារឿងល្អ និងអាចធ្វើឱ្យបរិស្ថានស្អាត និងទាក់ទាញភ្ញៀវទេសចរចូលមកទស្សនានៅកម្ពុជា។
ព្រះតេជគុណមានសង្ឃដីកាបន្ថែមថា៖ «យុទ្ធនាការនេះល្អ ដោយសារតែនៅប្រទេសកម្ពុជានេះ គឺសំរាមមានច្រើន ដោយសារការបរិភោគ និងការប្រើប្រាស់ប្លាស្ទីកចោលតាមផ្លូវ»។
ប្រធានសមាគមបណ្តាញយុវជនកម្ពុជា លោក ហេង គឹមហុង យល់ថា ការធ្វើយុទ្ធនាការនានារបស់ស្ថាប័នរដ្ឋ ជាការបង្ហាញឱ្យឃើញនៅការចូលរួមរបស់រដ្ឋ ជាពិសេសក្រសួងបរិស្ថាន និងក្រសួងពាក់ព័ន្ធ។
តែយ៉ាងណា លោកថា៖ «ប៉ុន្តែអ្វីដែលខ្ញុំយល់ គឺថារដ្ឋ ក្រសួងបរិស្ថាន ធ្វើយុទ្ធនាការនេះ គួរតែប្រគល់ទៅឱ្យក្រសួងអប់រំអ្នកធ្វើ ផ្ទុយទៅវិញក្រសួងជំនាញគួរតែបង្កើននូវការពង្រីក និងពង្រឹងវិធានការច្បាប់ និងរៀបចំគោលនយោបាយដែលមានលក្ខណៈមានប្រសិទ្ធិភាពខ្ពស់ និងបន្ស៊ីជាមួយនឹងស្ថានភាពសង្គមជាក់ស្តែង វាមានសារៈសំខាន់ជាង ជាជាងគ្រាន់តែធ្វើមួយផ្នែកនៃការអប់រំ»។
បើតាមក្រសួងបរិស្ថាន យុទ្ធនាការ «កម្ពុជាស្អាត ខ្មែរធ្វើបាន» ជាយុទ្ធនាការបន្តថ្មីមួយទៀត ដែលដើរទន្ទឹមគ្នាជាមួយយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលត្រូវបានដាក់ចេញកាលពីថ្ងៃទី១ ខែកញ្ញា ឆ្នាំ២០២៣ ដោយមានការចូលរួមពីសំណាក់សិស្សានុសិស្ស ព្រះសង្ឃ និងប្រជាពលរដ្ឋប្រមាណជាង ៨លានអង្គ/នាក់ នៅទូទាំងប្រទេសកម្ពុជា។
អនុលោមតាម «យុទ្ធសាស្រ្តបញ្ចកោណ» ដំណាក់កាលទី១ ក្រសួងបរិស្ថាន បានរៀបចំ «យុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨» ដែលផ្តោតលើមុំយុទ្ធសាស្រ្តចំនួន៣ គឺភាពស្អាត ភាពបៃតង និងចីរភាព ក្នុងគោលបំណងតម្រង់ទិស និងចង្អុលបង្ហាញការងារជាអាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ឆ្លើយតបទៅនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង៕
