គណបក្សក្រៅរដ្ឋាភិបាលដែលទើបលេចពន្លក បានទាមទារឱ្យស្ថាប័នជាតិរៀបចំការបោះឆ្នោត អនុវត្តឱ្យប្រសិទ្ធិភាពចំពោះបទបញ្ជា និងនីតិវិធីបម្រើឱ្យការបោះឆ្នោតជ្រើសរើសក្រុមប្រឹក្សា ក្នុងអាណត្តិទី៤នេះ ប្រព្រឹត្តទៅដោយតម្លាភាព និងអាចជឿទុកចិត្តបាន។
តាមរយៈគេហទំព័រហ្វេសប៊ុកផ្លូវការរបស់ខ្លួន គណបក្សកម្លាំងជាតិ បានបង្ហោះសារនៅថ្ងៃនេះថា សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ ដែលនឹងមកដល់នៅចុងខែឧសភាខាងមុខនេះ គណបក្សក្រៅរដ្ឋាភិបាលមួយនេះ ចង់ឃើញបទបញ្ជា និងនីតិវិធីអនុវត្តដោយពេញលេញ ដើម្បីធានាពីសេរី ត្រឹមត្រូវ និងយុត្តិធម៌ ជាពិសេសរក្សាការសម្ងាត់របស់អង្គបោះឆ្នោត សម្រាប់ការបោះឆ្នោតនៅក្នុងអាណត្តិទី៤នេះ។
ប្រភពបន្តថា៖«គណបក្សកម្លាំងជាតិបានដាក់សំណើរសុំ គ.ជ.ប សុំអនុវត្តច្បាប់បោះឆ្នោត និងបទបញ្ជា និងនីតិវិធីសម្រាប់ការបោះឆ្នោតឱ្យមានប្រសិទ្ធិភាព ដើម្បីធានាការសម្ងាត់សម្រាប់ការបោះឆ្នោតអសកល ថ្ងៃទី២៦ ខែឧសភា ឆ្នាំ២០២៤ ខាងមុខនេះ »។
បន្ថែមលើលិខិតអំពាវនាវរបស់ខ្លួន ទីប្រឹក្សាគណបក្សកម្លាំងជាតិ លោក រ៉ុង ឈុន និយាយដោយខ្លីនៅថ្ងៃទី១៧ ខែឧសភា ឆ្នាំ២០២៤នេះថា លោកមិនអាចផ្តល់ព័ត៌មានល្អិត ចំពោះការស្នើឡើងដោយគណបក្សរបស់ខ្លួនបានទេ ដោយជាប់រវល់។
លោកបន្តថា៖ «ខ្ញុំជាប់ប្រជុំ» ។
ជាការឆ្លើយតបចំពោះកង្វល់ ដែលលើកឡើងដោយ គណបក្សក្រៅរដ្ឋាភិបាល នៅពេលនេះ ចំពោះស្ថានប័នជាតិរៀបចំការបោះឆ្នោត បានឆ្លើយតបភ្លាមៗ តាមរយៈលិខិតផ្លូវការរបស់ខ្លួន កាលពីថ្ងៃទី១៣ ឧសភា។គ.ជ.ប បានបញ្ជាក់ជំហរនៅក្នុងលិខិតចំហនោះថា ស្ថាប័នជាតិរៀបចំការបោះឆ្នោតមួយនេះ បានអនុវត្តសមត្ថកិច្ចរបស់ខ្លួន ប្រកបដោយឯករាជ្យ និងអព្យាក្រឹត្យ។បន្ថែមពីលើលិខតនេះ គណៈកម្មាធិការជាតិរៀបចំការបោះឆ្នោត ក៏បានភ្ជាប់នូវលិខិតដាច់ដោយឡែកមួយទៀត ដែលនិយាយពីសេចក្តីណែនាំស្តីពី ការពង្រឹងសន្តិសុខ សណ្តាប់ធ្នាប់ និងរបៀបរៀបរយ ក្នុងការិយាល័យបោះឆ្នោត និងការិយាល័យរាប់សន្លឹកឆ្នោត ដែលស្របតាមគោលការណ៍ប្រជាធិបតេយ្យ និងសេរីពហុកបក្ស។
លិខិតបន្តថា៖«សូមជម្រាបជូនលោកប្រធានស្តីទីគណបក្សកម្លាំងជាតិជ្រាប់ថា គ.ជ.ប បានទទួលរួចហើយនូវលិខិតដូចក្នុងយោងខាងលើ។គជបសូមបញ្ជាក់ថា គ.ជ.បបានអនុវត្តសមត្ថកិច្ចរបស់ខ្លួន ប្រកបដោយឯរាជ្យ និងអព្យាក្រឹតដើម្បីធានាឱ្យការបោះឆ្នោតប្រព្រឹត្តទៅ សេរី ត្រឹមត្រូវ និងយុត្តិធម៌ »។
ចំណែក លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ ឯកភាពចំពោះការស្នើឡើងពីគណបក្សកម្លាំងនេះ។លោកចាត់ទុកថា អ្វីដែលគណបក្សរដ្ឋាភិបាលទាមទារនេះ វាជាជម្រើសដែលល្អ សម្រាប់អង្គបោះឆ្នោត ដែលពួកគេអាចសម្រេចចិត្តដោយគ្មានសម្ពាធ និងស្ថិតក្នុងការគំរាមកំហែងខាងនយោបាយណាមួយ។ប៉ុន្តែលោក សេក សុជាតិ យល់ឃើញថា សំណើរនៅពេលនេះ របស់គណបក្សកម្លាំងជាតិ អាចជារឿងប្រថុយប្រថានទៅវិញ ស្របពេលដែលការសម្រេចចិត្តធ្វើឡើង ដោយគ្មានសំឡេងចម្រុះ ហើយស្ថានភាពនយោបាយ ហាក់មិនអំណោយផលផងនោះ។
លោកបន្តថា៖ «ចំពោះខ្ញុំការស្នើសុំរបស់គណបក្សកម្លាំងជាតិទៅកាន់ គ.ជ.ប ហើយនឹងចង់ឲ្យ គ.ជ.ប អនុវត្តន៍ច្បាប់ដើម្បីរក្សាការសម្ងាត់ក៏ដូចជាការប្រព្រឹត្តទៅនៅក្នុងការបោះឆ្នោតអសកលនៅប៉ុន្មានថ្ងៃខាងមុខនេះឲ្យ វាមានភាពល្អប្រសើរឡើយដូច្នេះសុំស្នើរបស់គណបក្សកម្លាំងអាចនឹងមានចំណុចពីរដែលយើង មើលឃើញពីបញ្ហាប្រឈមនៃស្នើសុំរបស់គាត់ហ្នឹង» ។
ប្រតិទិនដែលចេញដោយ ស្ថាប័នជាតិរៀបចំការបោះឆ្នោត បានកំណត់យកថ្ងៃទី២៦ ខែឧសភា ឆ្នាំ២០២៤ ជាកាលបរិច្ចេទនៃការបោះឆ្នោតជ្រើសរើសក្រុមប្រឹក្សា តាមបែបអសកល សម្រាប់នីតិកាលទី៤នេះ។
ចំណែក អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្រែ្វល (Comfrel) លោក កន សាវាង្ស លើកឡើងថា ស្ថាប័នរបស់លោកមិនបានត្រៀមលក្ខខណៈសម្បត្តិ និងមិនបានចូលរួមអង្កេតនៅក្នុងដំណើរការនៃការបោះឆ្នោត អសកលដែលគ្រោងនឹងរៀបចំ នៅចុងខែឧសភា ខាងមុខនេះទេ។
បើតាមអ្នកជំនាញកិច្ចការបោះឆ្នោតរូបនេះ អ្វីដែលគណបក្សកម្លាំងជាតិបង្ហាញក្តីបារម្ភចំពោះការរក្សាការសម្ងាត់របស់អង្គបោះឆ្នោត វាគឺជារឿងដែលចាំបាច់ នៅក្នុងប្រព័ន្ធបោះឆ្នោតនេះ។
លោកបន្តថា៖ «ខ្ញុំយល់ស្របចំពោះការអំពាវនាវរបស់គណបក្សកម្លាំងជាតិព្រោះថា វាច្បាប់ដែលត្រូវការពារ ដល់ម្ចាស់ឆ្នោត និងរក្សាការសង្ងាត់របស់ពួកគេ រួមទាំងការពារសិទ្ធិរបស់ពួកជៀសផុតពីការរំលោភបំពាន» ។
សម្រាប់លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍផ្នត់គំនិត នៅតែយល់ឃើញថា ការស្នើឡើងដោយគណបក្សនយោបាយនៅពេលនេះ វាគួរមានការឆ្លើយតបដោយវិជ្ជមាន និងទទួលខុសត្រូវដោយហ្មត់ចត់ពីស្ថាប័នជាតិរៀបចំការបោះឆ្នោត។លោក កន សាវាង្ស ក៏ឯកភាពដែរថា ការមិនអាចរក្សាភាពសម្ងាត់ណាមួយ ចំពោះអង្គបោះឆ្នោតបាន អ្នកធ្វើឱ្យបែកធ្លាយភាពសម្ងាត់នោះ ត្រូវទទួលទោសតាមបញ្ញត្តិមាត្រា១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត៕
