គណបក្សនៅក្រៅរដ្ឋាភិបាល រកឃើញពីភាពមិនប្រក្រតីមួយចំនួនបានកើតឡើង នៅអំឡុងពេលយុទ្ធនាការឃោសនាស្វែងរកសំឡេងគាំទ្រ បម្រើឱ្យការបោះឆ្នោតជ្រើសរើសក្រុមប្រឹក្សាអាណត្តិទី៤ ខណៈដែលស្ថាប័នជាតិរៀបចំការបោះឆ្នោត អំពាវនាវឱ្យគ្រប់ភាគីពាក់ព័ន្ធ នៅក្នុងដំណើរការបោះឆ្នោតនេះ រក្សាភាពស្ងប់ស្ងាត់ នៅថ្ងៃចុងក្រោយនៃយុទ្ធនាការនៅចំថ្ងៃបិទបញ្ចប់ការឃោសនានេះ។
អគ្គលេខាធិការ នៃគណបក្សភ្លើងទៀន លោក លី សុធារ៉ាយុត្តិ អះអាងថាមួយរយៈពេលនៃយុទ្ធនាការឃោសនា សម្រាប់ការបោះឆ្នោតជ្រើសរើសក្រុមប្រឹក្សា រាជធានី ស្រុក ខណ្ឌ ខេត្ត ក្រុង នេះអង្គបោះឆ្នោតរបស់គណបក្សភ្លើងទៀន ត្រូវបានលួងលោម បញ្ចុះបញ្ចូល និងអូសទាញក្នុងគោលបំណងទិញទឹកចិត្តពីសំណាកមន្រ្តីមានឥទ្ធិពលនៅតាមគោលដៅខ្លះ។ជាងនេះទៀត អង្គបោះឆ្នោតមួយចំនួនក៏ទទួលរង់ការបំភិតបំភ័យពីបុគ្គលមានអំណាចដូចគ្នាដែរ។មិនតែប៉ុណ្ណោះ អង្គបោះឆ្នោតខ្លះត្រូវបង្ខំចិត្តភៀសខ្លួនរកកន្លែងមានសុវត្ថិភាពដោយសារតែតុលាការចេញដីកាឱ្យនាំខ្លួនជាដើម។
លោកបន្តថា៖ «ចាប់ពីដើមឆ្នាំខែមករា ២០២៤ មក សកម្មជន និងសមាជិក១៨ រូប (បេក្ខជន និងអង្គបោះឆ្នោត)ត្រូវបានចាប់ និងឃុំខ្លួននៅពន្ធនាគារ ។ ការចាប់ខ្លួនបេក្ខជន និងអង្គបោះឆ្នោតរបស់គណបក្ស វាបានធ្វើឲ្យប៉ះពាល់ដល់ដំណើរការប្រជាធិបតេយ្យ និងដំណើរការនៃការរៀបចំការបោះឆ្នោតនេះ និងប៉ះពាល់ដល់លទ្ធផលបោះឆ្នោតរបស់គណបក្ស» ។
ប្រហាក់ប្រហែលគ្នានេះដែរ សមាជិកព្រឹទ្ធសភា កូតាមកពីគណបក្សឆន្ទ:ខ្មែរ លោក គង់ មូនីកា ក៏ឯកភាពដែរថា ក្នុងរយៈពេលប្រមាណ៨ថ្ងៃកន្លងទៅនេះ មានរូបភាពមួយចំនួន បានកើឡើងចំពោះអង្គបោះឆ្នោត របស់គណបក្សក្រៅរដ្ឋាភិបាល។លោកបន្តថា របាយការណ៍ពីក្រុមប្រឹក្សាឃុំ សង្កាត់បានផ្តល់ឱ្យបង្ហាញថា រូបភាពនៃការបំភិតបំភ័យ និងប្រើវិធីអូសទាញគ្រប់រូបភាព កំពុងកើតឡើងចំពោះអង្គបោះឆ្នោត របស់គណបក្សភ្លើងទៀន។
បើតាមលោក គង់ មូនីកា នៅចំពោះមុខនេះ ការវាយតម្លៃពីដំណើរការបោះឆ្នោតថាប្រព្រឹត្តទៅមានភាពល្អប្រសើរ ឬយ៉ាងណានោះ វាហាក់ប្រញាប់ប្រញាល់ពេក។ក្នុងន័យនេះ គឺត្រូវរង់ចាំរហូតដល់ក្រោយការបោះឆ្នោតបិទបញ្ចប់សិន ទើបអាចដឹងពីភាពត្រឹមត្រូវ និងសុក្រឹត្យភាពបាន។បើទោះជាបែបណា សម្រាប់អ្នកនយោបាយរូបនេះ ទទួលស្គាល់ថា ដំណើរការបោះឆ្នោតលើកនេះ ហាក់មានភាពល្អប្រសើរលើផ្នែកខ្លះ
លោកបន្តថា៖«ខ្ញុំកំពុងប្រមូលព័ត៌មានគ្រប់ជ្រុងជ្រោយដើម្បីបញ្ជាក់ថារហូតមកដល់ពេលនេះមានស កម្មភាពអ្វីខ្លះបាទដែលក្រុមប្រឹក្សាជាប់ឆ្នោតរបស់យើងបានជួបប្រទះ យើងនឹងធើ្វការពិនិត្យមើលវាយតម្លៃ ចំពោះដំណើរការបោះឆ្នោតនេះនៅក្រោយបន្ទាប់ពីការបោះឆ្នោតហើយបាទ ចំពោះការចាប់ខ្លួនរបស់យើងកន្លងមក។យើងឃើញបេក្ខជនដែលឈរលេខរៀង ខាងលើពេញសិទ្ធិយើងមានការចាប់ខ្លួនជាបន្តបន្ទាប់នេះ ដូចជា៧រូបហើយថ្មីៗនេះមានការចាប់ខ្លួនថែម២រូបទៀត នៅក្នុងខេត្តកំពង់ចាម។ ដូច្នេះហើយយើងកំពុងឆ្លៀតឪកាសសូមអំពាវនាវដល់អាជ្ញាធរមានសម្ថតកិច្ចសូមមេត្តាទម្លាក់ចោលរាល់បទចោទប្រកាន់ទាំងឡាយដើម្បីឲ្យពួកគាត់អាចចូលរួមដំណើរប្រកួតប្រជែងដោយសេរីត្រឹមត្រូវ យុត្តិធម៌ មួយក្នុងគោលបំណងក៏សាងលទ្ធិប្រជាធិបតេយ្យសេរីពហុបក្ស» ។
ដូចគ្នានេះដែរ ទីប្រឹក្សាគណបក្សកម្លាំងជាតិ លោក រ៉ុង ឈុន យល់ស្របថា បរិយាកាសនៅមុនការបោះឆ្នោតនេះ ហាក់មិនអំណោយផលសម្រាប់បក្សក្រៅរដ្ឋាភិបាលទេ។បន្ថែមពីលើនេះ មេដឹកនាំគណបក្សនយោបាយ សហជីព សហគមន៍ និងសកម្មជននយោបាយត្រូវសមត្ថកិច្ចចាប់ខ្លួនជាបន្តបន្ទាប់។បញ្ហានេះ លោក រ៉ុង ឈុន ចាត់ទុកថា ធើ្វឲ្យប៉ះពាល់បរិយាកាសនៃការបោះឆ្នោត និងអង្គបោះឆ្នោត ដែលជារូបភាពមួយបង្ហាញពីការគំរាមគំហែងទៅដល់អង្គបោះឆ្នោត។
មិនត្រឹមតែប៉ុណ្ណោះ នៅមុនថ្ងៃបោះឆ្នោតមកដល់នេះ លោកទទួលបានដំណឹងពីអង្គបោះឆ្នោតមួយចំនួនត្រូវរង់ការសម្លុត និងធ្វើទុក្ខបុកម្នេញ ជាពិសេសការទិញទឹកចិត្តឲ្យទៅគាំទ្រគណបក្សនេះ ឬគណបក្សនោះ។ហើយករណីនេះ បានកើតឡើងជាញឹកញាប់ជាពិសេសនៅមុនពេលថ្ងៃបោះឆ្នោតមកដល់។
លោកបន្តថា៖«ចំាពោះគណបក្សកម្លាំងជាតិមកដល់ពេលនេះពេលការចាប់ខ្លួន៣នាក់ចំពោះប្រធានគណបក្សមួយ អគ្គហិរញ្ញគណបក្សក៏ដោយជាមានអនុប្រធានក្រុមការងារគណបក្សខេត្តកំពង់ចាម ស្រុកមានតែ៣រូបហ្នឹងទេបាទ ខ្ញុំមិនចាំថ្ងៃបានទេ ចន្ធី ចុះយន្តហោះកាលពីព្រឹកថ្ងៃទី០៩ ខែឧសភា នៅ២នាក់ទៀតខ្ញុំអត់ចាំថ្ងៃទេបាទ»។
លោកបន្ថែមថា៖«ក្នុងនាមគណបក្សកម្លាំងជាតិគ្រាន់ចង់ជម្រាបទៅដល់អង្គបោះឆ្នោត សំរេចចិត្តទៅតាមឧត្តមគតិ គោរពទៅតាមម្ចាស់ឆោ្នតបានប្រជាពលរដ្ឋទៅបោះឆ្នោតឲ្យចឹងសូមឲ្យអង្គបោះឆ្នោតគឺទាំងអស់គឺត្រូនតែធើ្វការសំរេចដោយមិនភ័យខ្លាច មិនក្រោមការគាបសង្កត់ ពីព្រោះការបោះឆ្នោតគឺជាការបោះដោយសម្ងាត់គ្មានអ្នកណាដឹងពីការសំរេចចិត្តរបស់យើងនោះទេ។ជាចុងក្រោយសូមអង្គបោះឆ្នោតចូលរួមបោះឲ្យគណបក្សកម្លាំងជាតិដែលឈរតាមក្រុង និងខេត្ត លេខរៀងទី៣» ។
នៅចំថ្ងៃចុងក្រោយ នៃយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាសម្រាប់នីតិកាលទី៤ នៅថ្ងៃសុក្រនេះ គ.ជ.ប បានចេញសេចក្តីប្រកាសរបស់ខ្លួន ដោយអំពាវនាវឱ្យគ្រប់តួអង្គ ជាពិសេសគណបក្សនយោបាយដែលចូលរួមប្រកួតប្រជែងការបោះឆ្នោត រក្សាបាននូវភាពស្ងប់ស្ងាត់។
ប្រភពបន្តថា៖«សេចក្តីអំពាវនាវរបស់គណ: កម្មាធិការជាតិរៀបចំការបោះឆ្នោតបានចេញថ្ងៃទី២៤ខែឧសភា ឆ្នាំ២០២៤ ជូនដល់គណបក្សនយោបាយបេក្ខជន ភ្នាក់ងារគណបក្សនយោបាយ សមាជិក និងអ្នកគាំទ្រគណបក្សនយោបាយ រួមនឹងប្រព័ន្ធផ្សព្វផ្សាយព័ត៌មានគ្រប់ប្រភេទ ត្រូវរក្សាភាពស្ងប់ស្ងាត់ ចាប់ពីម៉ោង ១០:00 យប់ថ្ងៃទី២៤ ខែឧសភា រហូតដល់ម៉ោង ១២:០០ យប់ថ្ងៃទី២៦ ខែឧសភា ឆ្នាំ២០២៤ »។
បន្ថែមលើសេចក្តីប្រកាសព័ត៌មាននេះ លោក ហង្ស ពុទ្ធា អ្នកនាំពាក្យ គ.ជ.ប ចាត់ទុកថា ប្រសិនបើមានបញ្ហាទិញទឺកចិត្ត ឬរូបភាពនៃការគំរាមកំហែងបែបនេះ នោះមានន័យថាជាករណីប្រព្រឹត្តិផ្ទុយពីគោលការណ៍ច្បាប់ហើយ។លោកបន្តថា នៅចំពោះមុខនេះ វិវាទកើតចេញពីភាពមិនប្រក្រតីនេះ លោកទទួស្គាល់ថាមានការកើតឡើងខ្លះៗ ប៉ុន្តែស្ថាប័នជំនាញក៏ពុងដោះស្រាយហើយដែរ។
លោកបន្ថែមថា៖«បើមានរឿងបែបនេះ នោះចាត់ទុកជាភាពប្រក្រតីហើយប៉ុន្តែបើមានយុទ្ធនាការនៃគ.ជ.ប គឺត្រូវដោះស្រាយតាយរយៈពេលពាក្យបណ្តឹងហើយមិនមានពាក្យបណ្តឹងណាដែលពាក់ព័ន្ធនឹងបញ្ហានឹងទេ ឃើញមានពាក្យបណ្តឹង ២នៅក្នុងខេត្តព្រះវិហារ នឹងខេត្តស្វាយរៀងគឺបណ្តឹងនោះមានលក្ខណៈការ ជេរប្រមាថបរិហារកេរ្តិ៍ ជាលក្ខណៈបុគ្គលតាមរយៈតេឡេក្រាម ចឹងបើសិនស្តាប់រវាងគូរភាគី ជេរប្រមាថរឿងមួយដូចជាធំដុំណាស់បាទ។ប៉ុន្តែបើសិនជាបំណែកនៃទិដ្ឋភាពច្បាស់នឹងអ្វីកើតឡើងគឺគ្មានអ្វីជាផលប្រកួតសំរាប់ធើ្វការដោះស្រាយនោះទេ ចឹងសំរាប់ គ.ជ.ប ធើ្វលិខិតជូនដំណឹងទៅម្ចាស់បណ្តឹងរួចទៅហើយបាទ»។
ការបោះឆ្នោតជ្រើសរើសក្រុមប្រឹក្សា សម្រាប់នីតិកាលទី៤ តាមបែបអសកលនេះ មានគណបក្សនយោបាយចំនួនប្រាំ បានចុះឈ្មោះចូលរួមប្រកួតប្រជែង។
គេហទំព័រ Newsroom Cambodia មិនអាចស្នើសុំការបំភ្លឺជុំវិញរឿងនេះ ពីលោក ហង្ស ពុទ្ធា អ្នកនាំពាក្យ គជប បានទេនៅថ្ងៃទី២៤ ខែឧសភា នេះ។
ចំណែក អ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធក្នុងការផ្តល់ព័ត៌មានលម្អិតដោយលោកអះអាងថា មិនសូវទទួលបានព័ត៌មានគ្រប់គ្រាន់ទេ ក្រោយពីលោកត្រូវសម្រាកលំហែកាយមួយរយៈពេលកន្លងទៅនេះ។បើតាមអ្នកនាំពាក្យរូបនេះ គឺមានតែស្ថាប័នអ្នកនាំពាក្យរដ្ឋាភិបាលទេ ដែលអាចក្តាប់រឿងជុំ។
លោកបន្តថា៖ «សួរអ្នកនាំពាក្យរាជរដ្ឋាភិបាលទៅ ឬមួយក៏អ្នកនាំពាក្យសាលាក្រុងពាក់ព័ន្ធក្រុង បើខេត្តពាក់ព័ន្ធខេត្តសួរខេត្តទៀតអ្នកនាំពាក្យរាជរដ្ឋាភិបាលគាត់ក៏មិនអាចនិយាយច្រើនដែលព្រោះការងារបក្សខ្ញុំបានសំរាក ១ខែហើយមិនទាន់ក្តោបបានទើបមកដល់»។
បដិសេធនឹងការឆ្លើយតបករណីនេះ អ្នកនាំពាក្យរដ្ឋាភិបាលលោក ប៉ែន បូណា បាននិយាយដោយខ្លីនៅថ្ងៃនេះថាលោកមិនអាចផ្តល់ការអត្ថាធិប្បាយដោយលម្អិតបានទេ ដោយសារលោកជាអ្នកនាំពាក្យរបស់រដ្ឋាភិបាល មិនមែនស្ថិតនៅក្នុងក្របខណ្ឌនៃបក្សនយោបាយ។
លោកបន្តថា៖ «ទី១ គ.ជ.ប ប្រកាសជូនរាល់ថ្ងៃអំពីស្ថានភាពឃោសនាបោះឆ្នោត ទី២ គ្រាន់តែលេខរៀងគណបក្សមិនចាំបាច់សួរអ្នកនាំពាក្យរាជរដ្ឋាភិបាលទេព្រោះជាព័ត៌មានសាធារណដែលគេដឹងគ្រប់គ្នាឱ្យតែបានតាមដាននិងយល់ពីនីតិវិធីនៃការបោះឆ្នោត។ អរគុណ » ។
ផ្ទុយពីអ្វីដែលគណបក្សក្រៅរដ្ឋាភិបាលមួយចំនួន ប្រឈមនឹងបញ្ហា ចំពោះលោក ញឿន រ៉ាដែន អ្នកនាំពាក្យគណបក្សរាជានិយម ហ្វុនស៊ិនប៉ិច វិញ អះអាងថាក្នុងអំឡុងពេលយុទ្ធនាការឃោសនាបោះឆ្នោត ស្វែងរកសំឡេងគាំទ្រនេះ អង្គបោះឆ្នោត និងបេក្ខភាពរបស់គណបក្សរាជានិយម មិនមានបញ្ហាណាមួយកើតឡើងទេ។ជាងនេះទៀត សកម្មភាពឃោសនា ក្នុងរយៈពេល៨ថ្ងៃនេះ ប្រព្រឹត្តទៅដោយភាពស្ងប់ស្ងាត់ និងគ្មានបាតុភាពណាមួយកើតឡើងនោះទេ។
លោកបន្តថា៖«គណបក្សហ៊្វុន ស៊ិនប៉ិច យើងមែនទែនទៅការដាក់ឈ្មោះនេះមិនមែនលេខរៀងទីប៉ុន្មា ន ទេគ្រប់គណបក្សគឺឈរដូចជាបានដាក់សើ្ទរតែគ្រប់រាជធានីខេត្តបាទ» ។
លោកបន្ថែមថា៖ «ចុងក្រោយខ្ញុំសូមសំណូមពរតែដល់អង្គបោះឆ្នោតទាំងអស់ជាក្រុមប្រឹក្សាឃុំ សង្កាត់ ដែលមានសិទ្ធិបោះឆ្នោតអញ្ចើញទៅបោះឆ្នោតគ្រប់ៗគ្នាហើយជួយគណបក្សហ៊្វុន ស៊ិនប៉ិច ដើម្បីទុកលទ្ធភាពធើ្វយ៉ាងណាគណបក្សហ៊្វុន ស៊ិនប៉ិចក្រោមព្រះអង្គម្ចាស់ ចក្រា វុធ នឹងជួយបងប្អូននាពេលអនាគតបាទ»។
ប្រតិទិនដែលចេញគណៈកម្មាធិការជាតិរៀបចំការបោះឆ្នោត បានបញ្ជាក់ថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់នីតកាលទី៤នេះ នឹងប្រព្រឹត្តទៅ នៅថ្ងៃទីអាទិត្យទី២៦ ខែឧសភា ឆ្នាំ២០២៤៕
ថ្លៃងនៅព្រឹកថ្ងៃទី២៤ ខែឧសភា ឆ្នាំ២០២៤ នេះ ថ្នាក់ដឹកនាំគណបក្សកម្លាំងជាតិលោក រ៉ុង ឈុន បានប្រាប់គេហទំព័រ Newsroom Cambodiaថាជុំវិញដំណើរការបោះឆ្នោតនៅថ្ងៃទី២៦ ខែឧសភា ខាងមុខនេះយើងបានធើ្វការគត់សំគាល់នៅដែលឆ្នាំមុនថ្ងៃបោះឆ្នោតមកដល់។
