ពលរដ្ឋម្នាក់សន្លប់ និងច្រើននាក់​ទៀតរង​របួសក្នុង​ករណីប៉ះទង្គិចគ្នារវាងអាជ្ញាធរខណ្ឌ​ព្រែកព្នៅ និងសហគមន៍

ភ្នំពេញ៖ ការប៉ះទង្គិចគ្នារវាង​អាជ្ញាធរខណ្ឌ​ព្រែកព្នៅប្រមាណ​ជា​២០០​នាក់ ​ និងសហគមន៍សំរោង​ត្បូង​ជាប់​ផ្ទៃ​បឹង​តាមោក កាលពីព្រឹក​ថ្ងៃអង្គារ ទី២៧ ខែកុម្ភៈ ដែលបង្កឲ្យមាន​កុមារីម្នាក់​របួស​ ​ស្រ្តីម្នាក់​សន្លប់​ និង​ស្ត្រីមួយចំនួនទៀតរង​របួស កើតមាន​ឡើង​ក្រោយមានសកម្មភាព​​​​ឈូសឆាយដីដែលកាន់កាប់ដោយសមាជិក​សហគមន៍។​

យោងតាមអត្ថបទខ្លីរបស់អង្គការលីកាដូចេញផ្សាយ ថ្ងៃទី២៧ ខែកុម្ភៈ ឆ្នាំ ២០២៤ បានឲ្យដឹងថា ការប្រឈមមុខដាក់គ្នាពាក់ព័ន្ធនឹងជម្លោះ​ដី​ធ្លីរ៉ាំរ៉ៃនៅតំបន់បឹងតាមោក គឺកើតឡើងនៅពេលដែលគ្រឿងចក្រឈូសឆាយចំនួន៣គ្រឿង ជាមួយនិងសន្តិសុខចំនួន១០នាក់ ត្រូវបានដាក់ពង្រាយដើម្បីឈូសឆាយដីនៅតំបន់នោះ។​

ការប៉ះទង្គិចគ្នានេះ កើតឡើងក្រោយខណ្ឌព្រែកព្នៅចេញសេចក្តីជូនដំណឹងមួយចុះថ្ងៃទី១៨ ខែកុម្ភៈ ឆ្នាំ២០២៤ ដោយបានអះអាងថាតំបន់នោះគឺជាដីរបស់រដ្ឋ ហើយ​បង្គាប់ឱ្យពលរដ្ឋបញ្ឈប់ការតាំងលំនៅ និងចូលរួមសហការជាមួយអាជ្ញាធរក្នុងការឈូសឆាយតំបន់នោះ។

អ្នកស្រី ស៊ា ដាវី អាយុ៤២ឆ្នាំ ជាតំណាងប្រជាពលរដ្ឋនៅសហគមន៍សំរោងត្បូង បានប្រាប់ញូវស៍រូមខេមបូឌាថា ការប្រើប្រាស់អំពើហិង្សាមកលើប្រជាពលរដ្ឋជា​ទង្វើរំលោភសិទ្ធិមួយយ៉ាង​សាហាវ​ព្រៃផ្សៃមកលើស្ត្រី និងកុមារ។

អ្នកស្រីបានថ្លែងថា៖ «ពួកបងជាស្រីៗ កុមារដែលចុះទៅទប់គ្រឿងចក្រហ្នឹង ហាមឃាត់គ្រឿងចក្រ​ដើម្បីស្វែងរកដំណោះស្រាយសិន ហើយត្រូវពួកគាត់ប្រើហិង្សាយ៉ាងសាហាវ យ៉ាង​កម្រោលលើ​ពួក​បង ច្រានត្រឡប់ត្រឡិន វាយអុកកែងអី ដូចពួកបងជាអ្នកប្រដាល់។ តែពួកបងគ្មានកម្លាំងអីទៅទប់ទល់ជាមួយ​​ពួកគាត់ទេ ធ្វើអោយសន្លប់ស្រ្តីម្នាក់ហើយគាត់ថា[យើង]សម្ដែង»។​

អ្នកស្រីបានថ្លែងទៀតថា៖ «ពួកគាត់មានតួនាទីជាអ្នកការពារ និងបម្រើបែរជាមកប្រើហិង្សា បំពានទាំងកម្រោល ទាំងបំពានច្បាប់មកលើប្រជាពលរដ្ឋ»។

លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ យល់ថាការប្រើប្រាស់អំពើហិង្សានេះ គឺមិនមានផលចំណេញអ្វីនោះទេ។ ផ្ទុយទៅវិញ លោកថា អំពើហិង្សានេះ ​មានតែបង្កផលលំបាកដល់​​​ភាគី​ទាំង​សងខាង ជាពិសេសគឺប្រជាសហគមន៍ដែល​មានបញ្ហា​ដីធ្លីមិនទាន់មានដំណោះស្រាយ​នៅឡើយ ហើយត្រូវទទួលរងអំពើហិង្សាបន្ថែមទៀត។

លោក អំ សំអាត ថ្លែងថា៖ «បញ្ហាដីធ្លីមិនគួរយកវិធានការណ៍ ឬក៏យន្តការផ្លូវច្បាប់ ឬតាម​ប្រព័ន្ធ​តុលាការការប្ដឹងផ្ដល់ ឬក៏ចោទប្រកាន់ចាប់ខ្លួនដីធ្លីតទៅទៀតដែល ពីព្រោះវាមិនមែនជា​ដំ​​ណោះស្រាយល្អទេ ផ្ទុយទៅវិញបញ្ហាទាំងអស់នឹងអាចនាំឲ្យមានការរិះគន់»។

លោកបន្តថា អាជ្ញាធរគួរតែសិក្សាឲ្យបានច្បាស់លាស់ និងស្វែងរកដំណោះស្រាយមួយ​ឲ្យ​បានសមស្រប​ ដើម្បីជៀសវាងការប្រើប្រាស់ហិង្សា។

លោកថ្លែងបន្ថែមថា៖ «យើងជាអង្គការសង្គមសុីវិល យើងនៅតែទទូចសុំអោយបញ្ឈប់ទៅ រាល់ការប្រើប្រាស់អំពើហិង្សា ឬការប៉ះទង្គិចដោយអំពើហិង្សា ទោះបីជាភាគីណាមួយក៏ដោយ គួរណាតែស្វែងរកដំណោះស្រាយដោយសន្តិវិធី»។​

លោក យង់ គិមអេង ប្រធានមជ្ឍមណ្ឌលប្រជាពលរដ្ឋដើម្បីអភិវឌ្ឍន៍លើកឡើងថា ប្រសិនបើ​ការ​តវ៉ារបស់សហគមន៍ធ្វើឡើង​ដោយ សន្តិវិធី អាជ្ញាធរមាន​សមត្ថកិច្ច​គួរធ្វើការស៊ើបអង្កេតច្បាស់លាស់​ពី​ករណីដែលបង្កឲ្យមានរបួសស្នាមដល់​សមាជិកសហគមន៍នេះ ចៀសវាង​​ប្រើវិធានការ​ទប់ទល់ដែល​ហួសប្រមាណ។

លោកថ្លែងថា៖ «ប្រជាពលរដ្ឋដែលភាគច្រើនជាស្រ្តី និងកុមារ រហូតដល់អ្នកខ្លះមានសន្លប់ជាដើម ហើយក្មេងស្រីគ្នារលាកភ្លើងជាដើមហ្នឹង គួរតែធ្វើការស៊ើបអង្កេតជុំវិញបញ្ហានឹង ពីព្រោះ​មិនអាច​នឹងប្រើវិធានការទប់ទល់ដែលហួសប្រមាណដែលធ្វើអោយប៉ះពាល់ទៅដល់រូបរាងកាយរបស់ពួកគាត់ ដែលធ្វើអោយពួកគាត់ទទួលរងនូវរបួសស្នាមបែបនឹងទេ»។

Newsroom Cambodia បានទាក់ទងទៅ លោក ធឹម សំអាន អភិបាលខណ្ឌព្រែកព្នៅ នៅព្រឹកថ្ងៃ​ពុធនេះ ប៉ុន្តែលោក​មិនអាចផ្ដល់បទសម្ភាស៍បានដោយសារលោកកំពុងមានកិច្ចប្រជុំ។

រហូតមកទល់ពេលនេះ រាជរដ្ឋាភិបាល​បានកាត់ផ្ទៃបឹងតាមោកចំនួន ៨០ក្បាលដីរួចទៅហើយ ដែលគ្របដណ្ដប់ប្រមាណជិត ៧៥%នៃផ្ទៃបឹងទាំងមូល។ បឹងនេះ គឺជាបឹងធំបំផុតចុងក្រោយ​នៅក្នុងរាជធានីភ្នំពេញ៕