ភរិយាជំទប់ទី២ កូតាមកពីគណបក្សភ្លើងទៀន ប្រចាំខេត្តបាត់ដំបង អះអាងថា ការចាប់ខ្លួនស្វាមីរបស់អ្នកស្រីក្រោមបទចោទ «រួមគំនិតក្បត់» នេះគឺជារឿងមួយដែលមិនសមហេតុផល និងគ្មានមូលដ្ឋានផ្លូវច្បាប់ណាមួយទេ ដោយសារស្វាមីរបស់អ្នកស្រី មិនបានប្រព្រឹត្តបទល្មើសដូចការចោទប្រកាន់របស់តុលាការឡើយ។
ថ្លែងប្រាប់គេហទំព័រ Newsroom Cambodia នៅថ្ងៃទី២០ ខែឧសភា ឆ្នាំ២០២៤ នេះ អ្នកស្រី ប៊ុន ស្រេន និយាយថា តាមពិតទៅស្វាមីរបស់ខ្លួនគឺលោក ប្រាក់ ឈន មិនបានប្រព្រឹត្តបទល្មើសដូចការចោទប្រកាន់ណាមួយរបស់តុលាការទេ។មិនតែប៉ុណ្ណោះ ស្វាមីរបស់អ្នកស្រី មិនបានចេញធ្វើសកម្មភាពណាមួយ ដែលផ្ទុយនឹងច្បាប់ ក្រៅពីការងារប្រចាំថ្ងៃក្នុងឋានៈជាមន្រ្តីជាប់ឆ្នោតរបស់ឃុំនោះទេ។
អ្នកស្រីបន្តថា៖ «គេចោទប្តីខ្ញុំថារួមគំនិតក្បត់តែគាត់មិនដែល ទៅណាផងតាំងពីថ្ងៃទី០៧ ខែវិច្ឆិកាមកគាត់មិនដែលទៅណាទេគាត់នៅតែផ្ទះកាលហ្នឹងខ្ញុំធើ្វការនៅភ្នំពេញខ្ញុំជំពាក់លុយគេខ្ញុំធើ្វការរោងចក្រខ្លួននៅផ្ទះតែម្នាក់ឯងនេះជាពាក្យចោទប្រកាន់មិនមានទង្វើដែលធើ្វខុស» ។
ចៅក្រមស៊ើបសួរនៃតុលាការខេត្តបាត់ដំបង បានចេញដីកាឃុំខ្លួនបណ្តោះអាសន្នលោក ប្រាក់ ឈន ភ្លាមៗនៅក្នុងពន្ធនាគារខេត្ត ក្រោយសមត្ថកិច្ចចាប់ខ្លួនកាលពីថ្ងៃទី១៧ ខែឧសភា ឆ្នាំ២០២៤។លោក ប្រាក់ ឈន រង់ការចោទប្រកាន់បីបទ «រួមគំនិតក្បត់ » ទាក់ទងព្រឹត្តិការណ៍ថ្ងៃ ៩វិច្ឆិកា ២០១៩ ក្នុងពេលដែលលោក សម រង្ស៊ី អតីតប្រធានគណបក្សសង្រ្គោះជាតិ ដែលត្រូវបានតុលាការរំលាយ ប្រកាសវិលចូលប្រទេសវិញ។
ដីកាបង្គាប់ឲ្យចូលខ្លួន ដែលចេញដោយសាលាដំបូងខេត្តបាត់ដំបង កាលពីថ្ងៃទី១៧ ខែឧសភា ឆ្នាំ២០២៤ ហើយគេហទំព័រ Newsroom Cambodia ទើបទទួលបាននៅថ្ងៃទី២០ ខែឧសភា នេះបានលើកឡើងថា តុលាការបង្គាប់ឱ្យជនត្រូវឈ្មោះ ប្រាក់ ឈន ភេទប្រុស ចូលឆ្លើយបំភ្លឺនៅថ្ងៃនេះ នៅចំពោះមុខចៅក្រមស៊ើបសួរ នៃសាលាដំបូងខេត្តបាត់ដំបង។លិខិតបន្តថា អង្គហេតុនេះជនត្រូវចោទមានជាប់ពាក់ព័ន្ធនឹងបទល្មើស «រូមគំនិតក្បត់» តាមបញ្ញត្តិមាត្រា៤៥៣ នៃក្រមព្រហ្មទណ្ឌ ដែលបានប្រព្រឹត្ត នៅភូមិប្រឡាយ១៨ ឃុំស្តុកប្រវឹក ស្រុករុក្ខគិរី ខេត្តបាត់ដំបង កាលពីថ្ងៃទី០៧ ខែវិច្ឆិកា ឆ្នាំ២០១៩។
ប្រភពបន្តថា៖ «សំណុំរឿងព្រហ្មទណ្ឌនេះកកស្ទះតាំងពីឆ្នាំ២០១៩ មកម្ល៉េះពាក្យសុំពន្យាពេលចុះថ្ងៃទី១៣ ខែឧសភា ឆ្នាំ២០២៤ របស់ជនត្រូវចោទឈ្មោះ ប្រាក់ ឈន ចៅក្រមស៊ើបសួរមិនអនុញ្ញាតពន្យាពេលបានឡើយ» ។
បន្ថែមពីលើដីកាបង្គាប់នេះព្រះរាជអាជ្ញារង នៃអយ្យការអបសាលាដំបូងខេត្ត លោក ដួង សារ៉េន ឆ្លើយតបថា សំណុំរឿងនេះលោកនៅមិនទាន់ដឹងព័ត៌មានលម្អិតនៅឡើយទេ ដោយសារសំណុំរឿងព្រហ្មទណ្ឌនេះ មិនស្ថិតនៅក្នុងដៃរបស់អយ្យការ។
លោកបន្តថា៖ «ប្អូនស្រីដោយសារខ្ញុំអ្នកនាំពាក្យនៅអយ្យការហើយចាប់ពីចៅក្រមស៊ើប ដល់ចៅក្រមជម្រះមានអ្នកនាំពាក្យមួយទៀតដែលគាត់ជាប្រធានលេខាដ្ឋានគឺលោកស្រី រស្មី សូមប្អូនទាក់ទងទៅខាងគាត់វិញ » ។
គេហទំព័រ Newsroom Cambodia មិនអាចស្នើសុំការបកស្រាយលម្អិតជុំវិញរឿងនេះ ពីលោកស្រី ជា ច័ន្ទរស្មី អ្នកនាំពាក្យសាលាដំបូងខេត្ត និងលោក មាន ឡាយ ជាម្ចាស់ពាក្យបណ្តឹងបានទេ នៅថ្ងៃទី២០ ឧសភា នេះ។បច្ចុប្បន្ន លោក ប្រាក់ ឈន គឺជាប្រធានប្រតិបត្តិ និងជាជំទប់ទី២ ឃុំស្តុកប្រវឹក ស្រុករុក្ខគិរី ខេត្តបាត់ដំបង។
បើតាមអ្នកស្រី ប៊ុន ស្រេន ដែលត្រូវជាភរិយាលោក ប្រាក់ ឈន ឱ្យដឹងថា ការចាប់ខ្លួននេះគឺធ្វើឡើងនៅនឹងផ្ទះតែម្តង។ក្រោយចាប់ខ្លួន ស្វាមីរបស់អ្នកស្រីត្រូវគេបញ្ជូនទៅសាលាដំបូងខេត្ត មុននឹងចៅក្រមចេញដីកាឃុំខ្លួនបណ្តោះអាសន្ននៅពន្ធនាគារខេត្ត ក្នុងថ្ងៃតែមួយ។មិនតែប៉ុណ្ណោះ ភ្លាមៗ បន្ទាប់ពីចាប់ខ្លួនអ្នកស្រីអះអាងថា ស្វាមីរបស់ខ្លួនមិនមានមេធាវីការពាសិទ្ធិទេ ទើបតែមាននៅពេលនេះ។ហើយការដោះស្រាយបែបណានោះ ត្រូវរង់ចាំដល់ចុងខែឧសភា។
ចំណែកលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង បដិសេធក្នុងការផ្តល់ព័ត៌មានលម្អិតជុំវិញសំណុំរឿងនេះ ដោយលោកបង្វែរឲ្យសួរនាំទៅខាងតុលាការវិញ។
លោកបន្តថា៖ «រឿងហ្នឹងសួរទៅខាងចៅក្រម សំណុំរឿងនៅលើចៅក្រមអ្នកចេញដីកា សួរខាងតុលាការចង់ដឹងសួរគេទៅគេបំភ្លឺហើយដូចមានព័ត៌មានខាងតុលាការ» ។
មិនខុសគ្នាទេ នាយប៉ុស្តិ៍នគរបាលរដ្ឋបាលរដ្ឋបាលឃុំស្តុកប្រវឹក លោក អ៊ុក សម្ជស្ស បដិសេធថាសំណុំរឿងនេះមិនស្ថិតក្នុងដៃរបស់រដ្ឋបាលឃុំទៀតទេ។ហើយម្យ៉ាងវិញទៀត រូបលោកបានផ្លាស់ប្តូរការងារនេះជាងមួយឆ្នាំទៅហើយ។
លោកបន្តថា៖ «ខ្ញុំប្តូរកន្លែងការងារមកធើ្វអធិការរងមួយឆ្នាំជាងហើយ រឿងនេះឆ្នាំ២០១៩គឹពាក់ព័ន្ធដីសហគមន៍នឹងគណបក្សប៉ុន្តែចាប់ខ្លួន២០២៤ខ្ញុំអត់ដឹងទេ ខ្ញុំក៏មិនស្គាល់លេខនាក់ថ្មីដែល» ។
យ៉ាងនេះក្តីអ្នកសម្របសម្រួល អង្គការការពារសិទ្ធិមនុស្ស លីកាដូ (Licadho) ប្រចាំខេត្តបន្ទាយមានជ័យ លោក អ៊ិន គង់ជិត សង្កេតឃើញថាតាមពិតទៅរឿងក្តីនេះ តុលាការបានកប់ទុកអស់ពេលជាច្រើនឆ្នាំមកហើយ។ម្យ៉ាងវិញទៀត ជនត្រូវចោទក៏មិនបានគេចខ្លួនទៅណាដែរ មានន័យថាមន្រ្តីបក្សរូបនេះ ហាក់បង្ហាញការសហការជានិច្ចជាមួយអាជ្ញាធរ។មិនតែប៉ុណ្ណោះទាំងអាជ្ញាធររដ្ឋ និងស្ថាប័នជំនាញគួរទម្លាក់ចោលបទចោទប្រឆាំងរូបគេ ព្រោះលោក ប្រាក់ ឈន មិនបានបង្កឱ្យមានអំពើព្យះសនកម្មណាមួយកើតឡើង ដូចការចោទប្រកាន់តាមផ្ឡុវតុលាការដែរ។
លោកបន្តថា៖ «រឿងនេះវាគួរតែកប់ចោទហើយតុលាការគួរតែទម្លាក់ការចោទប្រកាន់ទៅលើគាត់ ពីព្រោះគាត់ពុំមានសម្ថតភាពនឹងដើរញះញង់ឲ្យមានការបោះប៉ាវប្រឆាំងនឹងរាជរដ្ឋាភិបាលទេហើយគាត់នៅក្នុងស្រុកយូរហើយគាត់អត់មានគេចខ្លួនទេបាទ គាត់រស់នៅក្នុងស្រុកមានន័យថាគាត់គោរពអាជ្ញាធរ គាត់ចូលរួមគោរពច្បាប់ហើយគាត់ចូលរួមសហការជាមួយក្រុមប្រឹក្សាឃុំទាំងមូលទៀតដើម្បីអភិវឌ្ឍន៍ភូមិ ឃុំ នៅស្រុកប្រវឹកហ្នឹង» ។
លោក លី សុធារ៉ាយុត្តិ អគ្គលេខាធិការគណបក្សភ្លើងទៀន ធ្លាប់ប្រាប់កាសែតក្នុងស្រុកថា គិតចាប់ពីឆ្នាំ២០២៣មក មានមន្រ្តីគណបក្សជំទាស់មួយនេះ ត្រូវចាប់ខ្លួនចំនួន១២នាក់មកហើយ។បើតាមមន្រ្តីជាន់ខ្ពស់រូបនេះ ការចាប់ខ្លួនពួកគេធ្វើឡើងក្រោមហេតុផលនយោបាយ។គេសង្កេតឃើញថា ការចាប់ខ្លួនជាបន្តបន្ទាប់ទៀតនេះ ជាពិសេសក្នុងអំឡុងពេលនៃការបោះឆ្នោតជ្រើសរើសក្រុមប្រឹក្សា សម្រាប់នីតិកាលទី៤ កាន់តែខិតជិតមកដល់នេះ នាំឱ្យតួលេខនៃអ្នកនយោបាយមកពីបក្សជំទាស់ មានការកើនឡើង៕
