សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានជូនដំណឹងដល់សាស្ត្រាចារ្យ និងនិស្សិតថ្នាក់បរិញ្ញាបត្រឆ្នាំទី២ ទី៣ និង ទី៤ គ្រប់ផ្នែកទាំងអស់ថា ការចូលរៀនឡើងវិញនឹងចាប់ផ្តើមនៅថ្ងៃទី១០ ខែវិច្ឆិកា ឆ្នាំ ២០២០ខាងមុខនេះ។
ការសេចក្តីជូនដំណឹង ដែលចុះថ្ងៃទី១០ ខែកញ្ញា ឆ្នាំ២០២០ ដោយសាកលវិទ្យាធិការរង លោក សឿន សោភ័ណ បានធ្វើឲ្យនិស្សិតប្រុស ស្រី មានការសប្បាយរីករាយជាខ្លាំងពីព្រោះពួកគាត់អាចនឹងមានទំនាក់ទំនង និងការរៀនសូត្រឡើងវិញ។
តាមរយៈតាមទូរស័ព្ទ កញ្ញា សាត ស៊ីវន និស្សិតនៃសាកលវិទ្យាល័យភូមិន្ទនីតិសាស្ត្រ និង វិទ្យាសាស្ត្រសេដ្ឋកិច្ច និងជានិស្សិតរៀនជំនាញ រដ្ឋបាលសាធារណៈ បាននិយាយថា៖ «ខ្ញុំមានអារម្មណ៍សប្បាយចិត្ត ក្នុងការបានបង្កើតទំនាក់ទំនងជាមួយ និស្សិត និងសាស្ត្រាចារ្យ ឡើងវិញ»។
កញ្ញា សាត ស៊ីវន បានបន្តថា ការចូលរៀនក្នុងថ្នាក់ឡើងវិញក៏មានភាពងាយស្រួល ដូចជាការ សាកសួរលោកគ្រូផ្ទាល់ៗតែម្តង ក៏ប៉ុន្តែកញ្ញា នៅតែមានការព្រួយបារម្ភអំពីការរីករាលដាល នៃជំងឺកូវីត ១៩ ហើយសន្យាថានឹងរក្សាអនាម័យ តាមការណែនាំរបស់ក្រសួងសុខាភិបាល និងគោរពតាមគោលការណ៍របស់សាលាផងដែរ។
ចំណែកនិស្សិតផ្សេងទៀត កញ្ញា ពេញ ស្រីពេជ្រ និង កញ្ញា រុន សុភា និស្សិត នៃ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច រៀនផ្នែករដ្ឋបាលសាធារណៈ ឆ្នាំទី ២ បាននិយាយរៀបរាប់ អំពី អារម្មណ៍រំភើបដែលបានលឺ និងឃើញសេចក្តីជូនដំណឹងរបស់សាលាក្នុងការចូលរៀនវិញ។
កម្ពុជាបានប្រកាសឲ្យបើកសាលារៀនឡើងវិញជាបណ្តើរៗហើយ ក្នុងរយៈពេលប៉ុន្មានសប្តាហ៏ចុងក្រោយនេះ បន្ទាប់ពីបានបិទអស់រយៈពេលជិត៧ខែ ដោយសារតែជំងឺកូវីដ ១៩។
គិតត្រឹមថ្ងៃទី២៤ ខែកញ្ញា ឆ្នាំ២០២០នេះ អ្នកព្យាបាលជាសះស្បើយពីកូវីដ ១៩ មានចំនួនសរុប២៧៤នាក់ នៅទូទាំងប្រទេស ដោយមានអ្នកកំពុងសម្រាកព្យាបាលនៅមន្ទីពេទ្យ ចំនួន០១។ នេះយោងតាមក្រសួងសុខាភិបាល៕
