សាលាដំបូងខេត្តបន្ទាយមានជ័យ មិនឱ្យសមាជិកគណបក្សភ្លើងទៀន លោក ចៅ វាសនា បាននៅក្រៅឃុំតាមការស្នើសុំរបស់មេធាវីការពារក្តីឡើយដោយ សំអាងលើអង្គហេតុពាក់ព័ន្ធលើការគូសសន្លឹកឆ្នោត និងការបង្ហោះរូបភាពបោះឆ្នោត កាលពីថ្ងៃទី២៣ខែកក្កដាថ្មីៗនេះ។
លោក ចៅ វាសនា ត្រូវបានសមត្ថកិច្ចចាប់ខ្លួននៅថ្ងៃបោះឆ្នោត បន្ទាប់មកតុលាការខេត្តបន្ទាយមានជ័យ បង្គាប់ឱ្យឃុំខ្លួនបណ្តោះអាសន្នក្នុងពន្ធពន្នាគារខេត្តនេះ ចោទពីបទ «ញ៉ុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ករណីនេះ តាមរយៈមេធាវី លោក ចៅ វាសនា បានជំទាស់នឹងការចោទប្រកាន់ របស់ចៅក្រសមស៊ើបសួរហើយដាក់ពាក្យប្តឹងសុំនៅក្រៅឃុំ។
ប៉ុន្តែមេធាវី ការពារក្តីឱ្យលោក ចៅ វាសនា គឺលោក សំ សុគង់ បានឱ្យដឹងក្រោយចូលតទាំងក្តីនៅថ្ងៃទី៨សីហានេះថា ចៅក្រមបង្គាប់ឱ្យបន្តឃុំខ្លួនកូនក្តីបណ្តោះអាសន្ននៅក្នុងពន្ធនាគារដដែល ដើម្បីរង់ចាំសវនាការសាធារណៈដោយមិនទាន់កំណត់ពេល។
លោកថា៖«ទាក់ទងទៅនឹងការស្នើសុំឱ្យនៅក្រៅឃុំជាបណ្តោះអាសន្នហ្នឹងគឺលោកស្រីចៅក្រមគាត់បានសម្រេចបដិសេធ បានន័យថាគាត់មិនព្រមដោះលែងឱ្យនៅក្រៅឃុំជាបណ្តោះអាសន្ន»។
អ្នកនាំពាក្យគណបក្សភ្លើងទៀន លោក គឹម សួរភិរិទ្ធ សុំមិនអធិប្បាយស៊ីជម្រៅករណីនេះទេ តែថាឱ្យតែតុលាការចោទមន្ត្រីរបស់ខ្លួនគឺមិនដែលលើកលែងឱ្យនៅក្រៅឃុំនោះឡើយ។
លោកថា៖« […] តុលាការរាល់តែដងគេធ្វើអ៊ឹចឹងហើយហ្នឹង! និយាយរួមទៅយើងគ្មានសង្ឈឹមហ្មង ឱ្យតែគេចោទប្រកាន់អីមួយហើយ សុំនៅក្រៅឃុំមិនដែលបាន»។
ចំណែកអ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី យល់ថា ប្រព័ន្ធយុត្តិធម៌នៅកម្ពុជានៅតែបន្តដើរលើស្តង់ដារពីរ សម្រាប់ការអនុវត្តលើផ្លួវច្បាប់ និងនយោបាយ។
លោកថា៖«ក្នុងបរិបទនៃលំហនយោបាយនាពេលបច្ចុប្បន្ននេះ ឱ្យតែមានការចោទប្រកាន់បែបហ្នឹងហើយដូចជាមិនអាចមានដំណោះស្រាយល្អណាមួយទេ»។
បើតាមលោកមេធាវី សំ សុខគង់ ជុំវិញសំនុំរឿងចោប្រកាន់នេះ លោកបានដាក់ពាក្យបណ្តឹងទាស់ទៅកាន់សាលាឧទ្ធរណ៍រួចរាល់ហើយ ដើម្បីបន្តរកយុត្តិធម៌ឱ្យកូនក្តី។
កន្លងទៅតុលាការខេត្តបន្ទាយមានជ័យធ្លាប់កាត់ទោសលោក ចៅ វាសនា ឱ្យជាប់ពន្ធនាគារម្តងហេីយ ក្រោយគាត់ជាប់ឆ្នោតជាចៅសង្កាត់ប៉ោយប៉ែត អំឡុងនៃការបោះឆ្នោតឆ្នាំ២០១៧។
ពាក់ព័ន្ធនឹងលំហនយោបាយនៅកម្ពុជា អង្គការសហប្រជាជាតិ ទទួលបន្ទុកផ្នែកសិទ្ធិ បាននិយាយក្នុងសេចក្តីថ្លែងការណ៍ ចុះថ្ងៃទី២ខែសីហាឆ្នាំ២០២៣ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២ និងការបោះឆ្នោតសកលទើបបញ្ចប់ទៅថ្មីៗនេះ មិនអាចធានាបានពីសេរី ត្រឹមត្រូវ និងយុត្តិធម៌ទេ ដោយចាត់ទុកជាការរំលោភសិទ្ធិមនុស្សធ្ងន់ធ្ងរ រឹតត្បឹតលំហនយោបាយ ។
បញ្ហានេះ អង្គការសហប្រជាជាតិ បានទាមទារឱ្យរដ្ឋាភិបាលគោរពតាមសន្ធិសញ្ញាអន្តរជាតិនានា ដោយបើកផ្លូវឱ្យមានដំណោះស្រាយខាងនយោបាយ និងការគោរពសិទ្ធិមនុស្ស។