fbpx
Home Blog Page 2

ក្រសួងធម្មការហាម​មិន​ឱ្យ​លេង​ល្បែង​​ងាយ​បង្កគ្រោះថ្នាក់​នៅ​គ្រប់​វត្តអារាម​​ក្នុង​ពិធីបុណ្យចូលឆ្នាំ​ខ្មែរ

ក្រសួងធម្មការ និងសាសនាណែនាំ​គ្រប់​វត្តអារាម​ទាំងអស់​មិ​ន​ឱ្យលេងល្បែងស៊ីសង និង​ល្បែង​​ផ្សេងៗ​ដែល​ងាយបង្កគ្រោះថ្នាក់ក្នុងអំឡុងពេលចូលឆ្នាំថ្មីប្រពៃណីជាតិខ្មែរ​។​

​ក្នុង​សេចក្ដីណែនាំរបស់ក្រសួង​ធម្មការ​​ស្ដីពីការរៀបចំពិធីបុណ្យចូលឆ្នាំថ្មីប្រពៃណីជាតិ ចេញ​នៅថ្ងៃទី២០​ ខែ​មីនា ឆ្នាំ២០២៤ បញ្ជាក់ថា ក្នុងអំឡុង​ពិធី​បុណ្យ​ចូលឆ្នាំថ្មី​ខ្មែរ​​​ខាងមុខនេះ នៅ​តា​​ម​បណ្ដា​វត្តអារាម​ទាំងអស់​មិនត្រូវ​លេង​ល្បែង​ណាដែ​លប​ង្កឱ្យមានគ្រោះថ្នាក់​  គឺ​ត្រូវ​ងាក​មក​លេង​​ល្បែងប្រជាប្រិយខ្មែរ។

ក្រសួងបន្ថែមថា៖ ​«គ្រប់វត្ត​អារាម​មិនត្រូវ​ឱ្យ​មានការ​លេង​ល្បែង​ដែលអាច​បង្ក​ឱ្យ​មាន​គ្រោះ​ថ្នាក់​ដូច​ជា​ បាញ់ទឹក​ ជះ​ទឹក​ ប៉ាត​ម្សៅ​ ល្បែង​ស៊ីសង​ និងគ្រឿង​ផ្ទុះ​ជាដើម​»​។

ក្រសួង​បញ្ជាក់ទៀត​ថា​៖ «គ្រប់វត្តអារាម​រៀបចំ​លេង​ល្បែង​ប្រជា​ប្រិយ​នានា​ដូចជា​ ចោលឈូង បោះ​អង្គញ់​ ទាញ​ព្រ័ត្រ លាក់កន្សែង​ ដណ្ដើមស្លឹកឈើ […] និងរបាំប្រជាប្រិយខែ្មរដូចជា រាំវង់ រាំក្បាច់​ សារ៉ាវ៉ាន់ ឡាំលាវ​ ឆៃយ៉ាំ ត្រុដិ​ជាដើម ហើយរាល់ការលេងល្បែង ​និង​របាំប្រជាប្រិយ​ឱ្យត្រឹមត្រូវ​តាមក្បួនខ្នាត​លក្ខណៈ​ប្រពៃណីជាតិខ្មែរ និង​ប្រកបដោយ​សុវត្ថិភាព»។

ក្រសួង​បន្ថែម​ថា គ្រប់វត្តអារាមមានការសហការរៀបចំតុបតែង​សម្អាត និងប្រារព្ធពិធីបុណ្យ​តាមប្រពៃណីជាតិខ្មែរ និង​ត្រូវដាក់​តាំងព្រះឆាយាលក្ខណ៍ សម្ដេច​ព្រះមហា​សង្ឃ​រាជ ទេព វង្ស ផងដែរ។

ញូសន៍រូមខេមបូឌា (Newsroom Cambodia) ​មិនអាចទាក់ទង​សុំការ​បន្ថែម​ពី​លោក សេង សុមុនី អ្នក​នាំ​ពាក្យ​ក្រសួង​ធម្មការ ​និង​សាសនា​បានទេ។

គួរបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិ​ខ្មែរ​នៅ​ឆ្នាំ​នេះ នឹង​ប្រារព្ធឡើង​រយៈបេល​បួន​ថ្ងៃ ចាប់ពី​ថ្ងៃទី​១៣ ដល់ថ្ងៃទី​១៦ ខែមេសា ឆ្នាំ​២០២៤៕

នាយករដ្ឋមន្ត្រីបញ្ជាឱ្យក្រសួងពាក់ព័ន្ធទប់ស្កាត់រថយន្តដឹក​លើសទម្ងន់កំណត់​​បើកបរ​លើផ្លូវ​ជន​បទ

លោកនាយករដ្ឋមន្ត្រី ហ៊ុន ម៉ាណែត បញ្ជាឱ្យក្រសួងពាក់ព័ន្ធ និងអាជ្ញាធរដែនដី ទប់ស្កាត់សកម្មភាពដឹកជញ្ជូន​លើស​ទម្ងន់​កំណត់​របស់យានយន្តគ្រប់ប្រភេទនៅ​លើផ្លូវជនបទ និងត្រូវអប់រំផ្សព្វផ្សាយដល់ប្រជាពលរដ្ឋរស់នៅតាមសងខាងផ្លូវជនបទ ឱ្យបញ្ឈប់ការលុបប្រឡាយរំដោះទឹក​នៅ​សងខាងផ្លូវ​ដែល​ធ្វើ​ឱ្យ​ប៉ះពាល់ដល់​​គុណភាពផ្លូវ។

ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងអភិវឌ្ឍន៍ជនបទនៅរសៀលថ្ងៃទី២០ ខែមីនា ឆ្នាំ២០២៤ លោកនាយករដ្ឋមន្ត្រី ហ៊ុន ម៉ាណែត មានប្រសាសន៍ថា ការ​​​រស់នៅរ​​បស់ប្រជាពលរដ្ឋនៅ​ជនបទ បច្ចុប្បន្ន គឺជាគន្លឹះសម្រាប់ធានានូវចីរភាព​ និង​​ភាព​ធន់​នៃ​ការអភិ​វឌ្ឍ​​សេដ្ឋកិច្ច​ និង​សង្គម ដូច្នេះ​បាន​ជា​រាជរដ្ឋាភិបាលអាណត្តិទី៧នេះ ដាក់ចេញ​នូវ​វិធានការគន្លឹះមួយចំនួន​​ដើម្បី​ពង្រឹងនៅ​មូលដ្ឋាន ដោយធ្វើ​យ៉ាង​ណា​កាត់បន្ថយគម្លាត​​រវាងក្រុង និង​ជនបទ។

ចំណែកហេដ្ឋារចនាសម្ព័ន្ធផ្លូវថ្នល់នៅមូលដ្ឋានវិញ​ លោកថា ផ្លូវ​នៅមិនទាន់គ្របដណ្តប់​ទៅដោយ​បេតុង និងកៅស៊ូទាំងអស់នៅឡើយ ដោយសារនៅមានផ្លូវជាច្រើនជាផ្លូវលំដីក្រហមនៅឡើយ ដែល​ទាម​ទារ​ឱ្យ​មានការ​យកចិត្តទុកដាក់លើការអភិវឌ្ឍ និងពង្រឹងគុណភាពផ្លូវ​ជាដើម។

ករណីនេះ លោកនាយករដ្ឋមន្ត្រី ហ៊ុន ម៉ាណែត បាន​បញ្ជាឱ្យ​ក្រសួងស្ថាប័នពាក់ព័ន្ធ ទប់ស្កាត់​រថយន្តគ្រប់ប្រភេទ​ដែលដឹកជញ្ជូនលើសទម្ងន់កំណត់ ចរាចរណ៍នៅ​​លើផ្លូវជនបទ ដែលជាផ្នែកមួយនៃអនុសាសន៍​ក្នុងការអភិវឌ្ឍនៅថ្នាក់​មូលដ្ឋាន។

លោកមានប្រសាសន៍ថា៖ «យើងនឹងបន្តគ្របដណ្ដប់ ប្រែក្លាយពីមុនដែល​អត់មានអី គឺ​ជាភ្លឺស្រែ ទៅជាផ្លូវដីក្រហម ថ្ងៃក្រោយ​មាន​លទ្ធភាព​ពីដីក្រហមទៅជាផ្លូវ​កៅស៊ូ ឬ​ផ្លូវបេតុង ហើយកន្លែងខ្លះនៅផ្លូវជនបទ គាត់អត់​សុំ​ផ្លូវ​កៅស៊ូទេ សុំផ្លូវបេតុងតែម្តង ដោយសារ​អាហ្នឹងវាធន់ ហើយ[ប្រើប្រាស់បាន]យូរ [] ក្រសួងស្ថាប័នពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ ត្រូវចូលរួមទប់ស្កាត់ឱ្យបាននូវរាល់សកម្មភាពដឹកជញ្ជូនលើសទម្ងន់កម្រិតកំណត់របស់យានយន្តគ្រប់ប្រភេទនៅលើផ្លូវជនបទ និងត្រូវសហការអប់រំ និងផ្សព្វផ្សាយដល់ប្រជាពលរដ្ឋនៅតាមសងខាងផ្លូវជនបទ ឱ្យបានបញ្ឈប់ការលុបប្រឡាយរំដោះទឹកនៅសងខាងផ្លូវ ដែលធ្វើឱ្យប៉ះពាល់គុណភាពផ្លូវ»។

ទន្ទឹមនឹងនេះ លោកក៏បានណែនាំ​ឱ្យក្រសួងអភិវឌ្ឍន៍​ជនបទ រៀបចំធ្វើវិសោធនកម្ម អនុក្រឹត្យលេខ១៤១ ស្តីពីការបង្កើតគណៈកម្មាធិការដឹកនាំការត្រួតពិនិត្យយានយន្តដឹកជញ្ជូន លើសទម្ងន់កម្រិតកំណត់ ក្នុងគោលដៅការពារផ្លូវថ្នល់​សម្រាប់សាធារណជនប្រើប្រាស់បានយូរអង្វែង និងធ្វើ​វិសោធនកម្មអនុក្រឹត្យលេខ១៩៧ ស្តីពីការគ្រប់គ្រងដីចំណីតាមបណ្តាញផ្លូវជាតិ និងផ្លូវរថភ្លើងដោយបញ្ចូលបន្ថែម​នូវដីចំណីផ្លូវតាមបណ្តោយផ្លូវខេត្ត និងផ្លូវជនបទ ក្នុងគោលដៅរក្សាដីចំណីផ្លូវគ្រប់ប្រភេទសម្រាប់ការអភិវឌ្ឍ និងបម្រើផលប្រយោជន៍ជូនប្រជាពលរដ្ឋ​នៅពេលអនាគត។

លោកថ្លែងបន្តថា៖ «ខ្ញុំសូមលើកទឹកចិត្តឱ្យក្រសួងអភិវឌ្ឍន៍​ជនបទ បន្តយកចិត្តទុកដាក់ពង្រឹងគុណភាពផ្លូវជនបទ តាមរយៈការខិតខំសិក្សា​ស្រាវ​ជ្រាវ និងអភិវឌ្ឍន៍​ការងារស្ថាបនា ជួលជុស និងកែលម្អផ្លូវជនបទតាមរយៈបច្ចេកវិទ្យាថ្មីៗ ជាពិសេសយកចិត្តទុក​ដាក់​លើ​ការ​ស្ថាបនា​ និងកែលម្អផ្លូវជនបទធន់នឹងការប្រែប្រួលអាកាសធាតុ និងគ្រោះមហន្តរាយផ្សេងៗ ដើម្បីធានាគុណភាពនៃការប្រើប្រាស់យូរអង្វែង»។

អ្នកនាំពាក្យក្រសួងអភិវឌ្ឍន៍​ជនបទ លោក ពិត ករុណា បានលើកឡើង​ថា បច្ចុប្បន្ន សេដ្ឋកិច្ចនៅកម្ពុជាមានការរីកចម្រើន ដែល​ធ្វើឱ្យ​ជនមួយចំនួន ឆ្លៀតឱកាស​ដឹកទំនិញលើសទំងន់កំណត់នៅតាម​ផ្លូវ​ជនបទ ស្រប​ពេល​ដែលផ្លូវ​ជាតិ​មានការ​រឹតបន្តឹង​ទៅករណីនេះ។ លោកបន្តថា តាមរយៈអនុសាសន៍របស់នាយករដ្ឋមន្ត្រីនេះ ក្រសួង និងស្ថាប័នពាក់ព័ន្ធ រួមទាំងអាជ្ញាធររាជធានី-ខេត្ត នឹងពង្រឹងបន្ថែមទៀតនូវការ​ទប់ស្កាត់​ការដឹកទំនិញ​លើសកំណត់​ ដើម្បីថែរក្សាផ្លូវជនបទឱ្យ​ប្រើប្រាស់បានយូរអង្វែង សម្រាប់ជាប្រយោជន៍ដល់​ប្រជាពលរដ្ឋ​ក្នុងមូលដ្ឋាន។​

លោកថ្លែងថា៖ «មានជនឆ្លៀតឱកាសដឹកលើសទម្ងន់​ផ្ទុយពីច្បាប់កំណត់  ធ្វើឱ្យផ្លូវជនបទរបស់យើងរងខូចខាត ដូចជាការដាច់ និងបាក់ស្រុតផ្លូវជាដើម[…] អនុសាសន៍របស់សម្តេចមហាបវរធិបតីនាពេលនោះ គឺចង់ឱ្យផ្លូវជនបទមានភាពធន់ប្រើប្រាស់បានយូរ ដើម្បីសម្រួលដល់ជីវភាពរបស់ប្រជាពលរដ្ឋ។ ម៉្យាងវិញទៀត ការលុបប្រឡាយរំដោះទឹកនៅសងខាងផ្លូវ គឺអាចធ្វើឱ្យទឹកជន់លិចលើផ្លូវធ្វើ​ឱ្យ​ផ្លូវឆាប់​រងការខូចខាត»។

អភិបាលស្រុកបរកែវ ខេត្តរតនគិរី លោក ហេង ប៊ុននី លើកឡើងថា នៅក្នុងមូលដ្ឋាននៃស្រុកនេះ មិន​មានផ្លូវខូច ដោយសារការដឹកជញ្ជូនលើសទំងន់នោះទេ ព្រោះមានការត្រួតពិនិត្យទម្ងន់​ត្រឹមត្រូវ។

លោក​ថា៖ «តាមខ្ញុំមើលទៅ មិនមានការដឹកលើសទម្ងន់​ទេ ប្រសិនបើមានខ្ញុំក៏បានណែនាំ​កងសមត្ថកិច្ចយើង​ឃ្លាំ​មើល ត្រួត​ពិនិត្យ​តាមដាន​ដើម្បី​កុំ​ឱ្យ​ខូច​ផ្លូវ»។

ប្រធាន​មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គឹមអេង យល់ថា ផ្លូវនៅជនបទភាគច្រើន ឆាប់ខូចបណ្តាលមកពីមានការដឹកជញ្ជូនច្រើនលើសកំណត់ និងមិនមានទីតាំង​​ថ្លឹងទម្ងន់ និងត្រួតពិនិត្យយានយន្ត​​ទៅតាមលក្ខណៈបច្ចេកទេសឱ្យបានត្រឹមត្រូវ ដូចតាមបណ្តាផ្លូវជាតិមួយចំនួន​។

លោកថ្លែងថា៖​ «ផ្លូវជនបទភាគច្រើន គឺថាការដឹក​ គឺគ្មាននរណាថ្លឹងអីស្រួលបួលទេ ការដែលដឹកហ្នឹងគឺច្រើនលើសលុប ហើយ​ផ្លូវជន​បទ ជួន​កាល​ធ្វើ​មិន​ដល់​មួយ​ឆ្នាំផងខូចអស់ហើយ ដូច្នេះហើយវាធ្វើឱ្យខាតបង់ការប្រើប្រាស់ធនធាន […] យើងដឹងហើយថាផ្លូវជនបទមិនជាផ្លូវរឹងមាំខ្លាំងជាងផ្លូវជាតិទេ ដូច្នេះវាមានកម្រិត​ធន់រ​បស់​វា អញ្ចឹង​បើសិ​ន​ជា​មាន​ការដឹកលើសចំណុះ លើសទម្ងន់​ផ្ទុក វានឹងឆាប់ខូចខាតយ៉ាងលឿន យើងឈើញហើយថាផ្លូវជនបទកន្លែងណាស្អាតឆាប់ទៅហើយ ក្រឡិក​ក្រឡុក ខូចអស់ទៅវិញ ខ្ញុំថាត្រូវតែត្រួតពិនិត្យគុណភាព​ផ្លូវ​ហ្នឹង​ដែរ ព្រោះថាគុណភាពរបស់វាមិនបានទៅតាមស្តង់ដារកំណត់»។

លោកជំរុញ​ឱ្យអាជ្ញាធរដែនដី​គ្រប់លំដាប់ថ្នាក់ និងអ្នកពាក់ព័ន្ធ ត្រូវសហការគ្នា ទប់ស្កាត់កុំឱ្យមានការដឹកទំនិញ​លើសចំណុះ និងតាមដានការធ្វើផ្លូវ​តាំងពី​ដំណើរការដំបូងរហូតដល់បញ្ចប់។ បើតាម​ច្បាប់​ស្តីពី​ផ្លូវថ្នល់ ដែលកម្ពុជាអនុម័តកាលពីឆ្នាំ២០១៤ គឺ​ប្រភេទ​ផ្លូវថ្នល់​ត្រូវ​​បាន​បែង​ចែង​ជា​៦​ប្រភេទ រួមមាន ផ្លូវ​ល្បឿន​លឿន,​ ផ្លូវជាតិ, ផ្លូវ​ខេត្ត, ផ្លូវ​ជនបទ, ផ្លូវ​រាជធានី ផ្លូវ​ក្រុង និង​ផ្លូវ​ទីប្រជុំជន​ និង​​​ផ្លូវ​ផ្សេងៗ​​ទៀត​ដែល​កំណត់ដោយ​រាជរដ្ឋាភិបាល​។ ផ្លូវជាតិ សំដៅ​ដល់​ផ្លូវ​ដែល​ចរាចរណ៍​ច្រើន ពោលគឺ​ផ្លូវ​ត​ភ្ជាប់​​ពី​រាជធានី​ភ្នំពេញ ឆ្ពោះទៅកាន់​ទី​រួម​ខេត្ត​នីមួយៗ​នៅ​ទូទាំងប្រទេស​ ខណៈ​​ផ្លូវ​ខេត្ត សំដៅ​ដល់​ផ្លូវ​ដែលមាន​ចរាចរណ៍​មធ្យម ដូចជា ផ្លូវ​ភ្ជាប់​ចេញពី​ក្រុង​នៃ​ខេត្ត​មួយ ឆ្ពោះទៅកាន់​ទីរួមស្រុក ខណ្ឌ ផ្លូវបែក​ចេញពី​ផ្លូវជាតិ ឆ្ពោះទៅកាន់​ផ្លូវ​ខេត្ត ផ្លូវបែក​ចេញពី​ផ្លូវ​ខេត្ត ឬ​ផ្លូវ​ប្រជុំជន​នានា​ក្នុង​ខេត្ត​ទៅកាន់​តំបន់​សំខាន់ៗជាដើម។ ចំណែក​​ ផ្លូវ​ជនបទ គឺ​សំដៅ​ដល់​ផ្លូវ​ដែល​ភ្ជាប់​ពី​ផ្លូវជាតិ ផ្លូវ​ខេត្ត ឆ្ពោះទៅកាន់​ក្រុង ទីរួមស្រុក ខណ្ឌ ទីប្រជុំជន​ឃុំ សង្កាត់ និង​ភូមិ ឬ​ជា​ផ្លូវ​ដែល​ភ្ជាប់ ពី​ភូមិ ទៅ​ភូមិ -​ផ្លូវ​ក្នុងភូមិ​៕

តុលាការ​សម្រេច​​ឃុំខ្លួនមនុស្ស​​២នាក់ទៀត ពីបទ​ ឆបោក និងសម្អាតប្រាក់ ពាក់ព័ន្ធ​​​ក្រុមហ៊ុន​​ប្រ៊ីលាន​​​ស៊ី​ធី​​​វើលដ៍

ចៅក្រមស៊ើបសួរនៃសាលាដំបូងខេត្តសៀមរាប បានសម្រេច​ឃុំខ្លួនជាបណ្តោះអាសន្ន​នូវ​​ជន​ត្រូវ​ចោទ​ចំនួន ​២នាក់បន្ថែម​​ទៀត ដែល​ជាស​មាជិក​របស់​ក្រុមហ៊ុន ប្រ៊ីលាន ស៊ីធី វើលដ៍ ពីបទ ឆបោក និង​សម្អាតប្រាក់​។

សេចក្តីថ្លែងការណ៍របស់អ្នកនាំពាក្យ​​សាលា​ដំបូងខេត្ត​សៀមរាប ចុះថ្ងៃទី២១ ខែមីនា ឆ្នាំ២០២៤ បាន​ឱ្យដឹងថា ចៅក្រមស៊ើបសួរ បានចេញដីកាបង្គាប់ឱ្យ​នាំខ្លួន​​​ជនត្រូវចោទចំនួន​ ២នាក់ រួម​មាន ឈ្មោះ​ អ៊ឹម ស្រីវុទ្ធ ភេទស្រី អាយុ ៣២ឆ្នាំ និងឈ្មោះ សយ កុសល ភេទប្រុស អាយុ ៣៤ឆ្នាំ ដើម្បីសួរចម្លើយពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» តាមបញ្ញត្តិមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ និង​បទ «សម្អាតប្រាក់» តាមមាត្រា​៣៨ នៃច្បាប់ស្ដីពីការប្រឆាំងការសម្អាតប្រាក់និងហិរញ្ញវត្ថុភេរវកម្ម។

ប្រភពដដែលបន្តថា បន្ទាប់ពីបានសួរចម្លើយជនត្រូវចោទ និងពិនិត្យភស្តុតាង​ក្នុងសំណុំរឿង​ ព្រមទាំងពិចារណា​អង្គហេតុ​ និងអង្គច្បាប់រួច ចៅក្រមស៊ើបសួរ​បានសម្រេចឃុំខ្លួន​ជនត្រូវចោទ​ទាំង ២រូប ជាបណ្តោះអាសន្ននៅពន្ធនាគារ​ខេត្តសៀមរាប ដើម្បីបន្តការ​ស៊ើបសួរ​តាមនីតិ​វិធី​ច្បាប់។

ព្រះរាជអាជ្ញារងអមសាលា​ដំបូង​​ខេត្តសៀមរាប លោកស្រី សាត ធីតា មានប្រសាសន៍ថា ក្នុងសំណុំរឿងនេះ ក្រៅពីអតីត​​ឧកញ៉ា ឡេង ចាន់ណា និង​សមាជិកដែលត្រូវបានចាប់ខ្លួន​កន្លងមក តុលាការក៏បានទទួលបណ្តឹងពីពលរដ្ឋរងគ្រោះ ដែលប្តឹង​សមាជិកដទៃទៀតនៅក្នុងក្រុមហ៊ុន​ ប្រ៊ីលាន ស៊ីធី វើលដ៍ នោះ​ដែរ ហើយ​តុលាការ​កំពុងមានចំណាត់ការបន្តបន្ទាប់ទៀត។

លោកស្រីថា៖ «ពាក់​ព័ន្ធ​នឹង​បណ្តឹង [ទៅលើសមាជិកដទៃ] យើងបានទទួលហើយ តែចំណាត់ការបន្តលើអ្នកណាទៀត ខ្ញុំអត់ទាន់អាចឆ្លើយជូនបានទេ» 

លោកស្រី​បន្ត​ថា ចំពោះ​ដំណោះ​ស្រាយ​ឱ្យ​​ប្រជាពលរដ្ឋយ៉ាងណានោះ ចៅក្រមស៊ើបសួរកំពុងធ្វើការ និង​ស៊ើប​អង្កេត។

លោក នួន នឿត ដែល​អះអាងថាជាជន​រងគ្រោះ ដោយសារ​ការចាញ់បោកការវិនិយោគរបស់ក្រុមហ៊ុន ប៊្រីលាន ស៊ីធី បង្ហាញ​ក្តីសង្ឃឹមថា សំណុំរឿងនេះ នឹង​ឆាប់​ទទួល​​បា​​ន​ដំណោះស្រាយ ខណៈ​តុលាការ និងស្ថាប័នពាក់ព័ន្ធ បាននិងកំពុងចាត់វិធានការ​ជាបន្តបន្ទាប់ទៅលើ​អ្នកពាក់ព័ន្ធនឹងករណីឆបោកនេះ។​​

យ៉ាងណា​ក៏​ដោយ លោកនៅតែទទូចដល់​តុលាការបន្តចំណាត់ការ​​ឃាត់ខ្លួនអ្នកពាក់ព័ន្ធ​ទាំង​​អស់​ដែល​លោកអះអាងថាមានចំនួន​​សរុប ២៥នាក់ មកសួរចម្លើយរកប្រភពទ្រព្យសម្បត្តិដែលបោក​ប្រាស់​ពីប្រជាពលរដ្ឋ ដើម្បីយកមកលក់សងឱ្យ​​ពួកគាត់វិញ។

លោក នួន នឿត និយាយ​ថា៖ «ប៉ុន្តែខ្ញុំចង់ឱ្យ​​ចាប់ទាំង​មេ​ ២៥[នាក់] ទាំង​អស់​ហ្នឹង​​ឃុំ ឃាត់ខ្លួនទុកសិន​ដើម្បីសួរ​នាំ​តើទ្រព្យសម្បត្តិ ឡេង ចាន់​ណា [អគ្គនាយិកាក្រុមហ៊ុន​]ហ្នឹងនៅកន្លែងណាខ្លះៗ […] តើគេមានទ្រព្យសម្បត្តិអីខ្លះដែលយើងអាចរំលោះ​ខ្លះអ៊ីចឹង បើឱ្យ​ទុកនៅក្រៅឃុំ វាអត់បានប្រយោជន៍[ព្រោះគ្មានដំណោះស្រាយ]»។ គួរបញ្ជាក់ថា ពាក់ព័ន្ធនឹងសំណុំរឿងនេះដែរ​ នាយិកាក្រុមហ៊ុនប្រ៊ីលាន ស៊ីធី វើលដ៏ ឯ.ក អ្នក​ស្រី​ ឡេង ចាន់ណា ដែលជាអតីត​ឧកញ៉ាដែរនោះ រួម​និង​អគ្គនាយករង ២នាក់ទៀត គឺ​លោក ចាន់ ឃីន​ និង​លោក ផុន សាមាន​ ក៏​ត្រូវបាន​សាលាដំបូងខេត្តសៀម​រាប សម្រេច​​​ចោទ​ប្រកាន់ពីបទ ឆបោកមានស្ថានទម្ងន់ទោស បទចេញមូលប្បទានប័ត្រគ្មានសាច់ប្រាក់​ និងបទសម្អាតប្រាក់ កាល​ពីថ្ងៃទី១៣ ខែមីនា ផងដែរ ដោយបច្ចុប្បន្ន ជនត្រូវចោទទាំង ៣រូប កំពុងជាប់ឃុំនៅពន្ធនាគារ​ខេត្តជាបណ្តោះអាសន្ន ដើម្បីឱ្យចៅក្រម​បន្ត​ការស៊ើបសួរ​តាមនីតិវិធីច្បាប់៕

Voxpop៖ ទស្សនៈ​ពល​រដ្ឋចំពោះ​ការនាំ​ចូល​ផលិតផលកសិកម្ម​ពីក្រៅប្រទេស​

ការនាំចូល​បន្លែ​សាច់ពីក្រៅប្រទេស​ ជាពិសេស​ពី​ប្រទេស​ជិតខាងដូចជាវៀតណាម និង​ថៃ នៅ​តែមាន​ចំនួន​ច្រើន។ ការណ៍នេះ នៅតែ​ជា​កង្វល់​​ស​ម្រាប់កសិករ​ខ្មែរ​​ដែល​​ធ្វើ​កសិកម្ម​​​ក្នុង​ស្រុក​។​

Newsroom Cambodia បាន​សម្ភាសន៍​ពលរដ្ឋ និងនិស្សិត​ចំនួន​៥នាក់​ អំពី​​ការ​យល់​ឃើញ​​​របស់​ពួក​​គេទាក់​ទង​នឹងការ​នាំចូល​ផលិតផល​កសិកម្ម​ក្រៅ​ស្រុក​​៖

អ្នកស្រី​ ជា ដាវី មានអាយុ​៥២ឆ្នាំ សព្វថ្ងៃ​រស់​នៅសង្កាត់​ដេប៉ូ២​ ខណ្ខទួលគោក​ រាជធានីភ្នំពេញ​ប្រកប​របរជា​អ្នកបោស​សម្អាតនៅ​​កន្លែង​ឯក​ជន​មួយ​​ និយាយថា ការ​នាំ​ចូល​ផលិត​ផល​កសិកម្ម​​​​ពី​ក្រៅ​ប្រទេស​​ អាច​ធ្វើឲ្យគាំង ​ឬងាប់សេដ្ឋកិច្ចក្នុង​ស្រុក​។​

អ្នកស្រី​បាន​ថ្លែង​ថា​៖ «​ការនាំ​ចូលផលិត​ផលក្រៅស្រុក​គឺ​មិនល្អទេ​​ បើយើង​ប្រើ​ក្នុង​ស្រុកល្អ​ជាង​​ រួមដៃគ្នាដាំ​ដុះ​ លក់ចែកចាយ​​ កែច្នៃ​​របស់​មាន​ស្រាប់​ឲ្យសេដ្ឋកិច្ចយើងរស់​។​ ក្នុង​នោះ​ដែរ​ត្រូវ​មាន​​ការ​គាំទ្រ​​ពី​រាជរដ្ឋា​​ភិបាល​​​​ ព្យាយាម​រក​ទីផ្សារ​ កុំអី​តិច​តួច​ក៏នាំចូល។​ ​ក្នុងនាមយើងជា​ប្រជា​ពលរដ្ឋក៏ដូចគ្នា​​ ​ ត្រូវ​ចេះ​ជួយទិញកសិករ​​គ្នា​ឯង ហើយ​ដំណាំ​ដែលដាំ​ខ្លួន​ឯងគឺវា​គ្មាន​ជាតិ​​គីមី មិន​ត្រឹម​តែ​ប៉ុណ្ណោះ​ជួយឱ្យ​សេដ្ឋ​កិច្ច​រីក​ចម្រើន​ផងដែរ​។ ​ប្រើរបស់​ក្នុងស្រុក​ឱ្យ​អស់​លទ្ធភាព​សិន​ បើ​ខ្វះ​ខាត​ចាំឆក់​កណ្តៀត​ពីប្រទេស​ជិតខាង»​។

អ្នកស្រី ជា ដាវី ជាអ្នកបោសសម្អាតនៅទីក្រុង​ភ្នំពេញ​ ( រូបភាព៖ ណឺ មិនា )

កញ្ញា​ ណៃ​ សំណាង មាន​អាយុ​២៣ឆ្នាំ​ ​ជានិស្សិត​ឆ្នាំទី​៣​ នៃសាកលវិទ្យាល័យភូមិន្ទ​នីតិសាស្រ្ត​និង​វិទ្យាសាស្រ្ត​សេដ្ឋកិច្ច​ លើកឡើង​ថា ​ការ​នាំ​ចូល​ទំនិញ​កសិកម្មពីក្រៅ​​ប្រទេស​មា​ន​​គុណ​វិបត្តិ​​ច្រើន​ គិត​ទាំងពន្ធ​ ហើយ​មានតែចំណាយ​គ្មាន​ចំណូលសម្រាប់​ប្រជាពល​រដ្ឋ​​។​​

កញ្ញា​បានថ្លែង​ថា​៖ «ការ​នាំចូល​ទំនិញ​កសិកម្ម​គឺធ្វើ​ឱ្យ​ប្រជាជន​បាត់បង់​ការងារ​ ដោយសារ​ប្រទេស​យើង​ប្រជាជនភាគច្រើន​ជាកសិករ​ ពួកគាត់ពឹងផ្អែក​លើ​វិស័យ​កសិកម្ម​​ហើយ​បើនាំ​ចូល​វា​មាន​តម្លៃ​ថ្លៃ​ដែល​ពួក​គាត់​មិនអាច​មាន​លទ្ធភាព​ទិញ»​។​

កញ្ញា​ ណៃ​ សំណាង ជនិស្សិត​នៃ​សកលវិទ្យាល័យភូមិន្ទ​និតិសាស្រ្ត​ និង​វិទ្យាសាស្រ្ត​សេដ្ឋកិច្ច​។ (រូបភាពផ្តល់ដោយ​កញ្ញា​ ណៃ សំណាង)​

លោក​ គឹម ភា ​អាយុ​២៤ឆ្នាំ​ ជាជនជាតិដើម​កួយ បច្ចុប្បន្ន​​សិក្សា​នៅសាកលវិទ្យា​ល័យ​ឯកជន​មួយ​ក្នុងរាជ​ធានី​ភ្នំពេញ​ ​យល់​​ថា ​ការ​នាំចូល​ទំនិញ​កសិកម្ម​ធ្វើឱ្យ​ប្រជា​ជនបាត់​បង់ការងារ​ និង​មិន​មាន​ទំនុក​ចិត្ត​ក្នុងការ​ដាំដុះ​បន្ត​។​

លោកបាន​បន្ថែមថា​៖ «ការ​នាំចូល​ទំនិញ​កសិកម្ម​ធ្វើ​ឱ្យកសិករនៅកម្ពុជា​រង​គ្រោះ​ព្រោះ​តែ​កសិករ​​កម្ពុជា​​យើង​​ប្រើ​​ជី​​ធម្មជាតិ​ភាគច្រើន​ ចំណែកដើមទុនក៏​ចំណាយ​ក្រែល ​​ដូច្នេះ​ត្រូវ​លក់​ចេញ​ក្នុង​តម្លៃ​សមរម្យ​ប៉ុន្តែ​បើ​យើងនាំចូល​​ពីខាងក្រៅគឺច្រើន​ប្រើជីគីមី​ដែល​មាន​តម្លៃ​ថោក​​ហើយ​ធ្វើច្រើនដងក្នុងមួយឆ្នាំ លក់​​ចេញ​នូវតម្លៃ​ថោក​ធ្វើឱ្យ​កសិករ​នៅ​កម្ពុជា​អាច​ដួល​រលំ ​ឬ​ក៏បោះបង់​ចោល​នូវ​ការ​ធ្វើ​កសិកម្ម​ ដាំដុះ ដំណាំផ្សេងៗ​និង​ការ​ចិញ្ចឹមសត្វ​ជាដើម​»។​

លោក​ គឹម ភា ជានិស្សិតសិក្សា​នៅសាកលវិទ្យា​ល័យ​ឯកជនមូយ។​ (រូបភាព​ផ្តល់​ដោយ​លោក​ លោក​ គឹម ភា)

អ្នកស្រី​ អៀង​ ដានី​​ មានអាយុ​២៨ឆ្នាំ​ ជាបុគ្គលិកក្នុង​ក្រុម​ហ៊ុន​ឯក​ជន​មួយ​នៅរាជធានី​ភ្នំពេញ​ និយាយ​​ថា ទំនិញ​កសិកម្ម​មិនថា​នាំចូល ​ឬជា​​របស់​ក្នុងស្រុក​មាន​ទាំង​ល្អ​ និង​មិនល្អ​។

អ្នកស្រី​បន្ថែម​​ថា​៖ «​ទំនិញ​ដែល​នាំ​ចូល​គឺគុណភាព​ល្អ​ ហើយមាន​រសជាតិឆ្ងាញ់ និង​មាន​ទំនុក​ចិត្ត​ក្នុង​​ការ​ទទួលទាន​ មិនដូច​ទំនិញ​របស់​ខ្មែរ​ខ្លះ​និយាយ​ថា​ល្អៗតែការពិត​ប្រើ​សុទ្ធតែជីគីមី​​ ធ្វើឱ្យគ្មានទំនុកចិត្ត​ចំពោះ​ទំនិញទាំងនោះ»។​

អ្នកស្រី​ អៀង​ ដានី​​ ​ជាបុគ្គលិកក្នុង​ក្រុម​ហ៊ុន​ឯក​ជន​មួយ​។​ (រូបភាព៖ ណឺ មិនា​)

អ្នកស្រី​បន្តថា​៖ «ខ្ញុំទទួលស្គាល់​​ទំនិញខ្មែរ​ភាគ​ច្រើន​​ល្អ​មែន​បើធ្វើ​តាម​បែបប្រពៃណី​ តែឥឡូវគឺ​ប្រើ​​សុទ្ធតែគីមី មិនគិតដល់​ខ្មែរគ្នាឯង»។

កញ្ញា​ ហៀល ម៉ាល់​ អាយុ២២ឆ្នាំ​ ជាអ្នកលក់​ដូរ​នៅ​ផ្សារ​មួយ​ក្នុង​រាជ​ធានី​ភ្នំពេញ​លើកឡើង​ថា​ ប្រទេស​កម្ពុជា​​មាន​​ផលិត​ផល​កសិកម្ម​​​ទាំង​អស់​នោះ​ស្រាប់ មិន​បាច់​នាំ​ចូល​ពី​ក្រៅ​ប្រទេស​នោះ​ទេ។​​

កញ្ញា​ ហៀល ម៉ាល់​ ជាអ្នកលក់​ដូរ​នៅ​ផ្សារ។​ (រូបភាព៖​ ណឺ មិនា)

កញ្ញាបន្ថែមថា​៖ «​ទំនិញ​ក្នុង​ស្រុកដាំដុះ​ខ្លួនឯង​វាល្អ​ចំពោះ​សុខភាព​ ហើយ​​យើងអាច​ដឹង​ប្រភពថាមកពី​តំបន់ណា​ មួយទៀត​​​ជួយឱ្យ​កសិករ​យើង​មាន​ការងារ​ធ្វើ​ ប៉ុន្តែ​បើ​របស់​នាំចូល​យើងមិនដឹងថា​ប៉ុន្មានថ្ងៃបានមកដល់​ហើយ​ដាក់​ថ្នាំគីមី​អី​ខ្លះ​​ទេច​គ្មាន​ប្រភព​ច្បាស់​លាស់»​៕

ក្រសួង​សាធារណការហាមការបំពាក់​ស៊ីផ្លេ និងភ្លើង​យានយន្ត​ខុស​បច្ចេកទេស​

ក្រសួង​សាធារណការ ​និង​ដឹក​ជញ្ជូន ហាមឃាត់​ការ​បំពាក់​​ស៊ីផ្លេ និង​ភ្លើង​បំភ្លឺ​ ឬភ្លើង​លម្អផ្សេងៗ​ក្រៅពីការ​កំណត់​លក្ខណៈបច្ចេកទេស​របស់​​​​យានយន្ត​។

ក្នុង​សេចក្តី​ជូន​ដំណឹង​​របស់​​ក្រសួង​សាធារណ​ការ ​និង​ដឹក​ជញ្ជូន​ ចេញនៅ​ថ្ងៃ​ទី១៩ ខែមីនា ឆ្នាំ២០២៤ បាន​យោង​មាត្រា​២៨ ​​និង​៣០ នៃច្បាប់​ស្តី​ពីចរាចរណ៍​ផ្លូវគោក ដោយបញ្ជាក់ថា ​​ការ​ប្រើប្រាស់​ស៊ីផ្លេ​គឺក្នុងគោល​បំណង​ទប់ស្កាត់​អនាធិបតេយ្យ​​ដែលប៉ះពាល់​ដល់​សណ្តាប់​ធ្នាប់​សង្គម ​និង​​បង្ក​ឱ្យមានគ្រោះ​ថ្នាក់​ជា​យថាហេតុ​។

សេចក្តី​ជូនដំណឹង​ដដែលបន្ថែមថា​៖ «យានយន្ត​គ្រប់ប្រភេទ​ប្រើប្រាស់ស៊ីផ្លេ​តែ​នៅ​ពេល​ថ្ងៃ​ដើម្បី​ឱ្យ​ដំណឹង​ដល់​អ្នក​ប្រើប្រាស់​ដទៃ​ទៀត ​និង​ជៀសវាង​គ្រោះ​ថ្នាក់​ជាយ​ថាហេតុ​។ នៅ​ពេលយប់​ត្រូវជំនួស​ដោយ​ការ​ស៊ីផ្លេ​មក​ហ្វា​កូត​ឆ្លាស់គ្នា​ សម្រាប់​ឱ្យ​ដំណឹង​ដើម្បី​ចៀសវាង​គ្រោះថ្នាក់​ និង​សុំជែង​។ ត្រូវ​ប្រើ​រយៈ​ពេល​ខ្លី​ក្នុងការ​ស៊ីផ្លេ​គឺមិន​យូរជាង​ការចាំបាច់​ឡើយ​លើកលែង​​តែ​មាន​ការ​ប្រកាស​អាសន្ន​ ហើយ​សំឡេង​ស៊ីផ្លេ​ត្រូវកំណត់​ពី​៩០dB(A) ទៅ​១០៥dB(A)។ ចំណែក​ស៊ីផ្លេខ្យល់​ ត្រូវបាន​ហាមឃាត់​ដូចជា​នៅទីក្រុង​ ទីប្រជុំជន ​និង​មន្ទី​ពេទ្យ​«។

ក្រសួង​សាធារណការ​បន្ថែម​ថា ​ការ​បំពាក់​សញ្ញា​សូរសព្ទ​ [សំឡេងរំខាន] ភ្លើង​បំភ្លឺ​ ឬភ្លើង​លម្អផ្សេងៗ​ក្រៅពីការ​កំណត់​របស់​យានយន្ត​ត្រូវបានហាមឃាត់»​។

សេចក្តីជូនដំណឹង​របស់​ក្រសួងសាធារណការ​ធ្វើ​ឡើង​​បន្ទាប់​ពី​​លោកនាយករដ្ឋមន្រ្តី ​​​​​ហ៊ុន​ ម៉ាណែត បញ្ជា​ឱ្យ​ត្រួតពិនិត្យ​ពីលក្ខណៈបច្ចេកទេស​ស៊ីផ្លេ​រថយន្ត​ ដើម្បី​ទប់​ស្កាត់​ភាព​អនាធិបតេយ្យ​​តាមដងផ្លូវ និង​ហានិភ័យ​សម្រាប់​ការធ្វើ​ដំណើរ ក្រោយ​ផ្ទុះសកម្មភាព​យុវជន និង​កុមារ​​រាំ​លេង​តាមដងផ្លូវ​ទៅ​តាម​ចង្វាក់​ស៊ីផ្លែ​បែបភ្លេង​របស់រថយន្ត​ធំៗ៕

អាជ្ញាធរ​ជាតិព្រះវិហារផ្អាកការឡើង​ប្រាសាទ​ប្រាង្គរយៈពេល​១៧ថ្ងៃ​ដើម្បីជួសជុល​

អាជ្ញាធរ​ជាតិព្រះវិហារ​ ប្រកាសផ្អាក​ការឡើង​ទស្សនា​ប្រាសាទ​ប្រាង្គ ឬប្រាសាទធំ​​ក្នុង​តំបន់កោះកេរ ​សម្រាប់​​​ភ្ញៀវទេសចរណ៍ជាតិ និងអន្តរជាតិ ដើម្បីជួសជុលជណ្តើរឈើចាស់ទ្រុឌទ្រោម​​រយៈពេល​១៧ថ្ងៃ។

យោងតាម​សេចក្តី​ជូនដំណឹង​សី្តពី «​ការផ្អាក​ជា​បណ្តោះ​អាសន្ន​ការឡើង​ទស្សនា​ប្រាសាទប្រាង្គ​នៅក្នុងរមណី​យដ្ឋាន​ប្រាសាទ​កោះកេរ​» ចេញផ្សាយ​នៅ​ថ្ងៃទី២០ ខែមីនា ឆ្នាំ២០២៤នេះ បញ្ជាក់ថា អាជ្ញាធរជាតិ​ព្រះវិហារ​​កំពុងជួសជុល​ជណ្តើរឈើ​ឡើងលើប្រាសាទប្រាង្គ ឬប្រាសាទធំ ដែលមាន​សភាព​ចាស់​ទ្រុឌ​ទ្រោម​ដើម្បីសុវត្ថិភាព​ភ្ញៀវ​ទេសចរមកទស្សនាលើ​ប្រាសាទ​។

សេចក្តីជូនដំណឹងដដែល​​បន្ថែមថា អាជ្ញាធរជាតិ​ព្រះវិហារ នឹងផ្អាកជាបណ្តោះអាសន្នការ​ឡើង​ទស្សនា​ប្រាសាទ​ប្រាង្គ​ ចាប់ពីថ្នាក់​ទី៥​ ដល់ថ្នាក់ទី​៧ ចាប់ពីថ្ងៃទី ២០ មីនា ដល់ថ្ងៃទី​៥​ ខែមេសា ឆ្នាំ​២០២៤ ខាងមុននេះ។

អាជ្ញាធរជាតិ​ព្រះវិហារ​បញ្ជាក់ក្នុង​សេចក្តីជូនដំណឹងនោះថា៖ «ក្រុម​ការងារ​បាន​ជួស​ជុល​ជជណ្តើរ​ថ្នាក់ទី​១ ដល់ថ្នាក់​ទី៤ រួច​រាល់​ ដោយ​ឡែក​ចាប់​​ពី​ថ្នាក់​ទី៥​ ដល់ថ្នាក់​ទី​៧​ ដោយទី​តាំង​មិន​អំណោយ​ផល​សម្រាប់​ការ​រៀប​ចំជណ្តើរ​ចល័ត​សម្រួល​ដល់ការ​ទស្សនា​ជូន​ភ្ញៀវ​​»។

ប្រាសាទប្រាង្គ មានរាងជាពីរ៉ាមីត​៧ជាន់ កម្ពស់៣៥ម៉ែត្រ​ស្ថិត​ក្នុង​ខេត្តព្រះវិហារ។ ប្រាសាទនេះ​​បានចូលជាបេតិកភណ្ឌវប្បធម៌ពិភពលោក កាលពី​ថ្ងៃទី១៧ ខែកញ្ញា ឆ្នាំ២០២៣៕​

ក្រសួងប្រកាសពីការ​​ផ្តល់ប្រាក់ឈ្នួលជូនកម្មកររោង​ចក្រ Y&W ស្របពេល​កម្មករ​​ផ្ទុះការតវ៉ាសារជាថ្មី

ក្រសួងការងារ និងបណ្តុះបណ្តាលវិជ្ជាជីវៈ ប្រកាសពីការផ្តល់​ប្រាក់​ឈ្នួល និងប្រាក់បំណាច់​ផ្សេង​ៗជូនកម្មករនិយោជិត​នៃក្រុមហ៊ុន​វ៉ាយ&ដាប់បែលយូ (Y&W) ហ្គាមេន​ ស្រប​ពេល​​​កម្មករ​ផ្ទុះការតវ៉ាជាថ្មី នៅថ្ងៃនេះ ដោយបិទកំណាត់ផ្លូវនៅមុខរោងចក្រ ទាមទារឱ្យភាគីពាក់ព័ន្ធពន្លឿន​ការ​ដោះស្រាយ។

យោង​តាម​សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី២០ ខែមីនា ឆ្នាំ២០២៤នេះ បានឱ្យដឹងថា​ យោងតាមដីការបស់​សាលាដំបូង ដែល​សម្រេចរឹបអូស​ជាបណ្តោះអាសន្ន​នូវទ្រព្យសម្បត្តិ និងសម្ភាររបស់ក្រុមហ៊ុនវ៉ាយ & ដាប់បែលយូ ហ្គាមេន និងដោយមានការតម្កល់ប្រាក់កក់របស់អ្នកដេញថ្លៃតាមនីតិវិធីដេញថ្លៃ ទ្រព្យសម្បត្តិ និងសម្ភាររបស់ក្រុមហ៊ុននោះ ក្រសួង​មានថវិកាដែលអាច​បើកផ្តល់ប្រាក់ឈ្នួល និងប្រាក់បំណាច់ផ្សេងៗជូនកម្មករ​បាន​។

សេចក្តីជូនដំណឹងបន្ថែមថា កម្មករនិយោជិត អាចទៅបើកប្រាក់ឈ្នួលបាននៅសាលាខណ្ឌ​ដង្កោ ចាប់ពីថ្ងៃ​ទី២៣ ខែមីនា ឆ្នាំ២០២៤នេះតទៅ តាមបញ្ជីឈ្មោះ និងលេខរៀងដែលក្រសួង​នឹងបិតនៅទីនោះ មុនបើកផ្តល់។

សេចក្តីជូនដំណឹងរបស់ក្រសួងការងារនេះ ធ្វើឡើង​ស្របពេល​ដែលកម្មករ​កម្មការិនី នៅរោង​ចក្រ​កាត់ដេរ Y&W ហ្គាមេន ប្រមាណ ១ ០០០នាក់ បាននាំគ្នាប្រមូលផ្តុំតវ៉ា​ជាថ្មី និងបានបិតកំណាត់ផ្លូវនៅមុខរោងចក្រ នៅព្រឹកថ្ងៃទី២០ ខែមីនានេះ។

លោក ស៊ុំ ឌីម ជាកម្មករ​ធ្វើការ​នៅ​​រោងចក្រ Y&W បានឱ្យដឹងថា ការដែលកម្មករ​តវ៉ា​​បិទផ្លូវនេះ គឺ​ដើម្បីទាមទារបើកប្រាក់ខែ ដែលក្រុមហ៊ុនមិនបើកឱ្យក្នុងខែកុម្ភៈ ខណៈបច្ចុប្បន្ន ​រូបលោក ក៏ដូចជាកម្មករ​មួយចំនួនទៀត កំពុងជួបការលំបាក​ក្នុងជីវភាពរស់នៅ។

លោក​ថា៖ «មានខ្លះ អត់ខ្លះ [អ្នកខ្លះរកបានការងារ អ្នកខ្លះមិនទាន់រកបាន] ណាមួយ​បង់​ផ្ទះ​ជួល​ផង បង់​អង្គ​ការផង​អីផង អញ្ចឹង​គាត់មកបាតុកម្ម ព្រោះអត់លុយបង់ផ្ទះជួលផ្ទះអី អ្នកខ្លះ គេដេញចេញអត់លុយបង់ផ្ទះជួល[…] ខ្ញុំសំណូមពរឱ្យសម្តេចពុក​ជួយមកដោះស្រាយឱ្យកម្មករផង»។

កម្មករ​រោង​ចក្រ Y&W ម្នាក់ទៀត អ្នកស្រី ម៉ិច សុខ បានត្អូញត្អែរដែរថា អ្នកស្រីកំពុងជួបបញ្ហាប្រ​ឈម​ជាច្រើនក្នុងជីវភាពរស់នៅ​ប្រចាំថ្ងៃ ដោយសារ​គ្មានប្រាក់​បង់​ថ្លៃផ្ទះ​ជួល ការចំណាយ​ប្រចាំថ្ងៃ និង​សងបំណុល​ធនាគា​រ​។​

អ្នកស្រី​ថា៖ «ខ្ញុំតវ៉ាដោយសារថាថ្ងៃនេះក្រសួងថាទម្លាក់លុយឱ្យ តែដល់ថ្ងៃក្រសួងថាគាត់អត់មានលុយទម្លាក់ឱ្យទេ អញ្ចឹង​ពួកខ្ញុំនាំគ្នាតវ៉ា ចង់ឱ្យគាត់មកជួយដោះស្រាយឱ្យឆាប់ៗ ព្រោះអីខ្ញុំនៅផ្ទះជួល គេក៏ទារលុយដែរ តែខ្ញុំសុំពន្យារគេថ្ងៃទី២០នេះ ពេលឥឡូវថ្ងៃទី២០ គេថាអត់មានលុយទៀត ដឹងសុំគេថាម៉េចទៀត[…] ខ្ញុំសុំឱ្យមានដំណោះស្រាយ ព្រោះអីជិតចូលឆ្នាំ ចាំលុយគាត់ ពិបាកចិត្តរាល់ថ្ងៃឡើងនិយាយលែងចង់ចេញ»។

ចំណែក អ្នកស្រី ស៊ឹម សុម៉ាលី ដែលជាកម្មការានីនៅ​រោងចក្រ Y&W មួយ​រូបទៀត មាន​ប្រសាសន៍ថា ពួកគាត់តវ៉ានេះគ្រាន់តែចង់បានដំណោះស្រាយឆាប់ៗប៉ុណ្ណោះ។ ប៉ុន្តែក្រោយពី​ការតវ៉ារបស់កម្មករ ក្រសួងបានផ្តល់ដំណឹងពីការបើកប្រាក់វត្ស និងសំណង​ផ្សេង​ៗជូនកម្មករ នៅចុងសប្តាហ៍នេះ ដូច្នេះអ្នកស្រី​សាទរ​ចំពោះចំណាត់ការរបស់ក្រសួងនា​ពេល​នេះ។​

អ្នកស្រីថ្លែងថា៖ « ក្រសួងចេញសេចក្តីប្រកាសមកហើយ ឱ្យបើកប្រាក់ឈ្នួលនៅខណ្ឌដង្កោ តែកម្មករស្នើសុំបើកប្រាក់ឈ្នួលនៅរោងចក្រវិញ ព្រោះធ្វើការនៅរោងចក្រ ហើយអរគុណដល់ក្រសួងដែរ ដែលរកដំណោះស្រាយឱ្យលឿនៗ»។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បាន​ស្នើ​ដល់កម្មករ​ទាំងអស់ រក្សាភាពអត់ធ្មត់ និងបញ្ឈប់ការតវ៉ា​ ខណៈក្រសួងបាន​និង​​កំពុងដោះស្រាយ​​បញ្ហានេះជូនកម្មករ​​។

លោកថ្លែងថា៖ «ខ្ញុំសូមអំពាវនាវ​ដល់បងប្អូនកម្មករនិយោជិត​ដែលកំពុងតវ៉ានៅថ្ងៃនេះ សូមមេត្តាកុំបំបែកទៅកាន់លំនៅដ្ឋានរៀងៗខ្លួន រង់ចាំដំណោះស្រាយដែលក្រសួងការងារ បានផ្តល់ជូនតាមអ្វីដែលបងប្អូនទាមទារ ដូច្នេះហើយ​ការញុះញង់ណាមួយ ឬបំភ្លើសណាមួយសូមកុំជឿ ហើយរង់ចាំនូវព័ត៌មានផ្លូវការដែលចេញដោយក្រសួងការងារដូចពេលនេះ»។

គួររំលឹក​​ថា កម្មករនិយោជិតនៃក្រុមហ៊ុន វ៉ាយ​​&ដាប់បែលយូ ហ្គាមេន បាន​នាំគ្នាធ្វើ​កូដកម្មចំនួន ២លើក​​រួចមកហើយ ដែលលើកទី១ ធ្វើឡើង​កាលពីថ្ងៃទី០៩ ខែមីនា ឆ្នាំ២០២៤ និងលើកទី២ នៅថ្ងៃទី១២ ខែមីនា ឆ្នាំ២០២៤ ដើម្បី​ទាម​ទារ​ឱ្យ​ថៅកែ​បើកប្រាក់​ខែ​ និងប្រាក់អត្ថប្រយោជន៍ផ្សេងៗ ព្រមទាំង​ស្នើឱ្យក្រសួងស្ថាប័នពាក់ព័ន្ធជួយអន្តរាគមន៍ដោះស្រាយវិវាទការងារនេះ ក្រោយពីថៅកែជនជាតិ​ចិន បានរត់ចោលរោង​ចក្រ ដោយ​​មិនទទួល​ខុសត្រូវ​បើកប្រាក់ខែមួយ​​ខែចុងក្រោយ និង​ប្រាក់អត្ថប្រយោជន៍ផ្សេងៗជូនកម្មករសរុបចំនួន ៤ ៨៤៩នាក់​​៕

នាយករដ្ឋមន្ត្រីណែនាំ​ឱ្យពង្រឹងគុណភាពថ្នាំ និងផ្គត់ផ្គង់ថ្នាំទៅមូលដ្ឋានឱ្យបានគ្រប់គ្រាន់

លោកនាយករដ្ឋមន្ត្រី ហ៊ុន​ ម៉ាណែត ណែនាំ​ទៅក្រសួង​សុខាភិបាល​ ឱ្យ​​ពង្រឹងគុណភាពថ្នាំ បរិមាណ​ថ្នាំ និង​​ឧបករណ៍​បរិក្ខារពេទ្យ​ឱ្យបានគ្រប់គ្រាន់​នៅតាមមណ្ឌល​សុខភាពនៅ​មូលដ្ឋាន ដើម្បីកុំឱ្យប្រជាពលរដ្ឋរស់នៅតំបន់ដាច់ស្រយាលពិបាក​ធ្វើដំណើរឆ្ងាយក្នុងការ​​ស្វែងរកសេវាព្យាបាល​សុខភាព។​

ថ្លែង​​ក្នុង​ពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសុខាភិបាល នៅរសៀលថ្ងៃទី១៩ ខែមីនា ឆ្នាំ២០២៤ លោក​នាយករដ្ឋមន្ត្រី ហ៊ុន ម៉ាណែត បាន​ជំរុញឱ្យមានការគិតគូរអំពី បញ្ហា​​បរិមាណ និងគុណភាពថ្នាំសង្កូវ និងបរិក្ខារពេទ្យ ថ្នាំព្យាបាលដែលសំខាន់ៗ ឱ្យមានគ្រប់គ្រាន់ នៅ​តាម​មូល​ដ្ឋាន ដើម្បីឱ្យប្រជាពលរដ្ឋងាយស្រួលប្រើប្រាស់។

លោកថ្លែងថា៖ «គិតគូរអំពីការពង្រឹងគុណភាពថ្នាំ និងបរិក្ខារពេទ្យ ដែលខ្ញុំបានឱ្យគោលការណ៍ទៅឯកឧត្តម ឈាង រ៉ា ដេញថ្លៃថ្នាំ ម៉េច​ក៏​ដោយ ធ្វើម៉េច​ឱ្យបានថ្នាំ​នេះ អ្នកដែល​ផ្គត់ផ្គង់​ធានា​នូវ​​គុណភាព បរិក្ខារ គុណភាព​ពេទ្យ និងតម្លៃសមរម្យ ធានាដើម្បីធ្វើយ៉ាងណាយើងជំរុញទៅដល់មូលដ្ឋានតែម្តង ហើយគិតគូរពីថ្នាំដែលសំខាន់ៗ ដូចជា ថ្នាំលើសឈាម ថ្នាំទឹកនោមផ្អែម ដែលអាចត្រូវបង្កើនបរិមាណមួយចំនួន ទៅឱ្យប្រជាពលរដ្ឋ ជាពិសេសនៅតំបន់ដាច់ស្រយាល កុំឱ្យគាត់ពិបាកធ្វើដំណើរឡើងចុះទៅយក»។

លោកបន្តថា ក្រសួងត្រូវបន្តពង្រឹងការផ្តល់សេវាសុខភាព​នៅតាមមណ្ឌលសុខភាព តាំងពីថ្នាក់ក្រោមរហូតដល់​លើ ដើម្បីធានាថាពលរដ្ឋ​ទទួលបាន​សេវាព្យាបាល​សុខភាព​ប្រកបដោយ​គុណភាព។

លោកមានប្រសាសន៍ថា៖ «តាមរយៈការពង្រឹងអង្គភាពសុខាភិបាល​ពីមូលដ្ឋានកម្រិតទាបទៅខ្ពស់ ដែលទិសដៅវិធាន​ទី១ គឺពង្រឹងមណ្ឌលសុខភាព យើងអាចភ្ជាប់ជាមួយប៉ុស្តិ៍​សុខភាព ពីមណ្ឌលសុខភាពឡើងទៅ​មន្ទីរពេទ្យបង្អែកស្រុក ទិសដៅរបស់យើងនៅក្នុងការពង្រឹង​ គឺពង្រឹងពីរពេលជាមួយគ្នា ទី១ គឺ​យើង​ពង្រឹង​ដោយផ្តោតទៅលើសេវាមូលដ្ឋាន សេវាបឋមសុខាភិបាល ដែលយើងផ្តោតពង្រឹងពីក្រោម​ឡើងលើ»។

អ្នកនាំពាក្យក្រសួង​សុខាភិបាល លោក កុយ វ៉ាន់នី មានប្រសាសន៍នៅថ្ងៃទី២០ ខែមីនានេះ​ថា បញ្ហា​កង្វះខាតថ្នាំ​សង្កូវ​នៅតំបន់​ដាច់ស្រយាល​អាច​មាន ប៉ុន្តែក្រសួងសុខាភិបាល​បាន​ខិត​ខំ​ប្រឹងប្រែង​ដោះស្រាយ​បញ្ហា​នេះបន្ថែមទៀត។

លោកថ្លែង​ថា៖ «សេចក្ដីតម្រូវការគឺមានធំធេង កង្វះតែងតែមានកង្វះហើយ​ទៅតាមទីតាំង ទីកន្លែងមួយចំនួន ប៉ុន្តែបងប្អូនយើង​នៅមណ្ឌល នៅមន្ទីរពេទ្យនេះ​មិនដែលថាទុកឱ្យ​ខាងគាត់មានបញ្ហា គឺថាគាត់ផ្ទេរថ្នាំគ្នា គាត់ផ្ទេរគ្នា គាត់ជួយគ្នា យកថ្នាំបញ្ជូនឱ្យ​​គ្នាម្ដង​ម្នាក់ ហើយ​គាត់​ខិតខំ​បំពេញ​តាម​គ្នា​ក្រោយ​មក ចឹងទេតាមន័យកង្វះហ្នឹង យើងខិតខំ យើងពិតជាចង់ឱ្យ​​បានទូលំទូលាយ សល់សម្បូរ​សប្បាយជាង​ហ្នឹង ក៏ប៉ុន្តែនេះ​គឺធ្វើទៅតាមមធ្យោបាយដែលយើងធ្វើទៅបាន ដែលសំខាន់គឺថ្នាំមានគុណភាព​ដែរ តម្លៃនៃការរកជាវថ្នាំនោះជាតម្លៃដែលទាប មានគុណភាពខ្ពស់អាចពង្រីកសេវាបានធំទូលាយ»។

លោកបន្ត​ថា ក្រសួងសុខាភិបាលបានខិតខំរកក្រុមហ៊ុនដែលផ្គត់ផ្គង់ថ្នាំ និង​សម្ភារៈ​បរិក្ខារពេទ្យនេះ ឱ្យកាន់​តែគ​ត់​ម៉ត់​ថែមទៀត ទាំងតម្លៃ និងគុណភាព ព្រមទាំងបង្កើនការ​ចុះទៅពិនិត្យ​គ្រប់ទីតាំង​មណ្ឌលសុខភាព ដើម្បី​ពង្រីក​សេវាព្យាបាល និងផ្តល់ថ្នាំ​​​ទឹកនោមផ្អែម និងលើសឈាម​ឱ្យបានគ្រប់មណ្ឌល ដែលជាការឆ្លើយ​តបទៅនឹងតម្រូវការរបស់ប្រជាពលរដ្ឋ។​

លោកថា៖ «ក្រសួងសុខាភិបាលយើង ឥលូវទទួលបានអនុសាសន៍ពីសម្តេចធិបតី[ហ៊ុន ម៉ាណែត​​]ថែមទៀតនេះ គឺជាការសំខាន់ ហើយថ្នាំពេទ្យនេះ​ ផ្តោតសំខាន់ទៅលើជំងឺមិនឆ្លង ជំងឺទឹកនោមផ្អែម ជំងឺលើសឈាម គឺជាអាទិភាពចម្បង»។

លោក យុន នឿន ជា​ប្រធានមណ្ឌលសុខភាពទឹកថ្លា ស្ថិតនៅ​ឃុំទឹកថ្លា ស្រុកស្វាយអន្ទរ ខេត្តព្រៃវែង សាទរ​ចំពោះការណែនាំរបស់នាយករដ្ឋមន្ត្រី ដោយលោកថា នៅមណ្ឌល​សុខ​ភាពនេះ នៅមិនទាន់មានថ្នាំសម្រាប់​​ព្យាបាល​​​ជំងឺឈើសឈាម និងទឹកនោមផ្អែមគ្រប់គ្រាន់ ដើម្បីឆ្លើយតបនឹងតម្រូវការរបស់​ប្រជាពលរដ្ឋ​នៅក្នុង​មូលដ្ឋាន​នៅឡើយ។

លោកថា៖ «មិនទាន់មាន ប៉ុន្តែបានបណ្តុះបណ្តាលរួចហើយ ប៉ុន្តែមិនទាន់បានឱសថព្យាបាលទេ​ […] ចង់បានប្រើ ប៉ុន្តែលឺថាដោះស្រាយពីក្រសួងមិនទាន់ចេញ ប្រធានការិយាល័យថាចាំមើលសិន ប៉ុន្តែយើងមិនទាន់បាន»

ចំណែក លោក ស៊ីន សុវណ្ណឌី ជាប្រធានមណ្ឌលសុខភាពនៅ​ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង លើកឡើងថា នៅមណ្ឌលសុខភាព មិនមានការ​ខ្វះខាតថ្នាំ​នោះទេ ហើយ​ក្នុងករណីមាន​ការ​ខ្វះខាតតិចតួច មណ្ឌលនេះគឺអាចដោះស្រាយបាន។

លោកបន្តថា៖ « ពីមុននៅថ្នាក់មូលដ្ឋានយើង មិនទាន់ពង្រឹងស៊ីជម្រៅទៅខាងទឹកនោមផ្អែម លើសឈាមទេ ទើបតែមួយរយៈក្រោយនេះ រាជរដ្ឋាភិបាលលោកគិតគូរខ្លាំង ជំរុញ​រហូតមានវគ្គបណ្តុះបណ្តាល​ជំនាញពីជំងឺទឹកនោមផ្អែម លើសឈាម ក្នុងរយៈចុងក្រោយនេះ។ ពីមុន​​មានដែរ​តែគ្រាន់ថា មិនទាន់បានទទួលនូវការបណ្តុះបណ្តាលទូលំទូលាយ»។

ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គឹមអេង មានប្រសាសន៍ថា ការគិត​គូរពី​ការសេវា​ព្យាបាល​​ជំងឺមិនឆ្លងនេះ គឺជារឿងសំខាន់ ព្រោះជាបញ្ហាដែលកម្ពុជាកំពុងប្រឈម ប៉ុន្តែបើគិតតែរឿងសេវា​​ព្យាបាល ដោយមិនមានវិធានការបង្ការទេ នោះនឹង​មិនមានប្រសិទ្ធភាពឡើយ។

លោកថ្លែងថា៖ «សម្តេចនាយករដ្ឋមន្ត្រី​លោកជំរុញបែបនេះ ជារឿងត្រឹមត្រូវ តែត្រូវគិតដល់កា​រ​ប្រយុទ្ធប្រឆាំង​ផង​ដែរ ធ្វើយ៉ាងណាកាត់បន្ថយ​គ្រោះថ្នាក់ដែលជាប់ពាក់ព័ន្ធនឹងគ្រឿងស្រវឹង ការប្រើប្រាស់ភេសជ្ជៈផ្អែមខ្លាំង ដែលអង្គការសុខភាពពិភព លោកថាមាន​ផលប៉ះពាល់ខ្លាំងចំនួនច្រើនទៅលើ​ជំងឺទឹកនោមផ្អែម លើសឈាមនេះ ប្រសិនបើយើងគិតតែព្យាបាល តែយើងអត់បង្ការទេ គឺយុទ្ធសាស្រ្តមិនជោគជ័យទេ»។

លោកបន្ថែម​ថា ក្រសួងសុខាភិបាល គួរតែពិនិត្យបន្ថែមចំពោះការផ្តល់ថ្នាំ​ទៅដល់គ្រប់មណ្ឌលសុខភាពឱ្យបានគ្រប់គ្រាន់៕

សង្គមស៊ីវិលបន្តបារម្ភពីសុវត្ថិភាពកម្មករ ក្រោយមានគ្រោះអគ្គិភ័យឆេះរោងចក្រជាថ្មីទៀត

អង្គការសង្គមស៊ីវិល និងសហជីព​ បន្តបារម្ភពីសុវត្ថិភាព និងកា​រប្រឈមរបស់​កម្មករ​និយោជិត ក្រោយ​មានករណីគ្រោះអគ្គិភ័យ​បានឆាបឆេះរោង​ចក្រ​ផលិត​ស្បែកជើង​ អ.ជី ហ៊្វូតវែរ។

កាលរសៀល​ពីថ្ងៃទី១៨ ខែមីនា ឆ្នាំ​២០២៤ មានករណីគ្រោះអគ្គិភ័យ​បានឆាបឆេះរោង​ចក្រ​ផលិត​ស្បែក​ជើង​ អ.ជី ហ៊្វូតវែរ ស្ថិតក្នុងភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល ដែលមានកម្មករនិយោ​ជិត​​ចំនួន ២ ២០៥នាក់ កំពុងបំពេញការងារ។ សមត្ថកិច្ច​កំពុងបន្តស៊ើបអង្កេត​រកមូលហេតុដែលបង្ក​ឱ្យ​មាន​អគ្គិភ័យនេះ ខណៈហេតុការណ៍នេះមិនបង្កឱ្យ​មាន​គ្រោះថ្នាក់ដល់កម្មករនិយោជិត​ឡើយ។ នេះបើតាមសេចក្តីប្រកាសរបស់ក្រសួងការងារ។

ជុំវិញករណីនេះ លោក ឃុន ថារ៉ូ អ្នកគ្រប់គ្រងកម្មវិធីការងារនៃអង្គការសង់ត្រាល់ បាន​លើកឡើង​នៅ​ថ្ងៃ​ទី​១៩ ខែមីនានេះ​ថា ករណី​ឆេះរោងចក្រ​ អ.ជី ហ៊្វូតវែរ នេះមិនមែនជាករណីទី១ទេ ដោយសារកន្លងមក ក៏​មាន​ករណីឆេះរោងចក្រ​បណ្តាលឱ្យមានកម្មករ​រង​គ្រោះ​ថ្នាក់ដល់អាយុជីវិតផងដែរ។ លោកបន្តថា នេះជា​ក្តីបារម្ភមួយរបស់សង្គមស៊ីវិល ដែល​ទាមទារឱ្យ​ក្រសួងស្ថាប័ន​ពាក់ព័ន្ធ​ បង្កើនការ​ពង្រឹង​បញ្ហា​សុវត្ថិ​ភាព ដូចជា​ ការចុះ​ធ្វីអធិការកិច្ចដោយមន្ត្រីជំនាញបច្ចេកទេសជាប្រចាំ ហើយត្រូវចូលរួមដោយភាគីពាក់ព័ន្ធព្រោះការសាងសង់អគារនិយាមសុវត្ថិ​ភាពជាកត្តាអទិភាព សម្រាប់កម្មករនិយោជិត។

លោកថា៖​ «សុវត្ថិ​ភាពនៅ​កន្លែង​ការ​ងារ​នេះ​សំខាន់​ណាស់ ព្រោះយើងដឹ​ង​ហើយ​ថា​រោង​ចក្រមួយចំនួន គឺមិន​បាន​គោរពទៅតាមនិយាមស្តង់ដាសុវត្ថិ​ភាពឱ្យបានត្រឹមត្រូវទេ ករណីនេះវាត្រូវតែមាននូវក្របខណ្ឌគោល​នយោបាយ ដើម្បីធានាឱ្យ​​មាននូវការតាមដានពិនិត្យជាប្រចាំក្នុងករណីដែលមានបញ្ហាហានិភ័យដែលអាចកើតមានឡើងឈានទៅដល់នៃការឆាបឆេះ ឬក៏មាននូវអស្ថេរភាពការងារ ឬក៏សុវត្ថិ​ភាព​ការ​ងារអីហ្នឹង»។

ប្រធានសហភាពការងារកម្ពុជា លោក អាត ធន់ ក៏បាន​បង្ហាញពីក្តីបារម្ភ​ទៅលើប្រព័ន្ធ​សុវត្ថិ​​ភាព​នៅក្នុងរោង​ចក្រនេះដែរ ដោយសារ​តែមានករណីគ្រោះអគ្គិភ័យឆេះរោង​ចក្រ​ បាន​កើត​ឡើង​ជា​បន្ត​បន្ទាប់។ ករណីនេះ លោក​​អំពាវនាវដល់​រោងចក្រនីមួយៗ គួរតែមានការត្រួតពិនិត្យប្រព័ន្ធស្តង់ដារសុវត្ថិភាពឱ្យ​​បានច្បាស់លាស់ និងត្រូវ​មានការ​​ធ្វើ​តេស្តសាកល្បង ដើម្បីធានាថាប្រព័ន្ធសុវត្ថិ​ភាព​អាចប្រើប្រាស់បានពេលមានបញ្ហា។

លោកថា៖ «កន្លងមក ក្រុមហ៊ុនខ្លះមាន [ប្រព័ន្ធការពារសុវត្តិភាព] តែដល់ពេលឆេះ អត់អាចប្រើបាន វាខូចឬក៏ប្រព័ន្ធវាអត់ល្អអញ្ចឹងទៅ វាធ្វើឱ្យមានបញ្ហាច្រើនណាស់ ទៅដល់កម្មករនិងក្រុមហ៊ុន»។

បើតាមលោក អាត់ ធន់ នៅពេលមានគ្រោះអគ្គិភ័យ​ឆេះរោង​ចក្រ​ម្តងៗ គឺ​​មិន​ត្រឹមតែផ្តល់ផលលំបាកដល់ក្រុមកម្មករទេ ខាងនិយោជកក៏ជួបបញ្ហាដែរ។

លោក​ថា៖«កម្មករគាត់ កាល​ណាឆេះ​អ៊ីចឹង​គាត់​អត់​មាន​ការ​ងារ​ធ្វើ គាត់​ប្រឈម​ហើយ​អាចមាន​គ្រោះថ្នាក់អីចឹងទៅ ហើយបើទោះបីជាច្បាប់តម្រូវ​ឱ្យក្រុមហ៊ុនត្រូវបង់លុយឱ្យគាត់ ប៉ុន្តែកន្លែង​ខ្លះ​ក៏​ក្រុម​ហ៊ុនមានភាពស្មុគស្មាញ អីមិនចង់បើកលុយឱ្យគាត់អីចឹងទៅ។ ចំណែកក្រុមហ៊ុន ពេលដែលឆេះអ៊ីចឹង ទី​១ គាត់បាត់បង់អត្ថប្រយោជន៍ និងប៉ះពាល់ដល់ក្រុមហ៊ុន ហើយ​ទី២ ក្រុមហ៊ុនត្រូវទទួលខុសត្រូវបង់​លុយឱ្យកម្មករកំឡុងពេលដែលកម្មករអត់ការងារធ្វើហ្នឹង»។

ប្រធានសហព័ន្ធ​សហជីព​សេរីឯករាជ្យ​ លោក សយ ចាន់ធូ​ មានប្រសាសន៍​ថា ក្រោយហេតុការណ៍គ្រោះអគ្គិភ័យនេះ ខាងភាគីសហជីព តំណាង​កម្មករ​ បានប្រជុំជាមួយតំណាង​រោងចក្រ​ដោយមានការចូលរួមពី​មន្ត្រី​ក្រសួង​​កា​រ​ងារ​ កាល​ពី​ថ្ងៃ​អង្គារម្សិលមិញ​ ជុំវិញ​គោលជំហ​របស់ខាងរោងចក្រ និងការ​រកដំណោះស្រាយជូនកម្មករ។ ​លោក​បន្តថា ក្នុងកិច្ចប្រជុំនេះ ភាគីរោងចក្រ មិនទាន់មានដំណោះស្រាយសម្រាប់កម្មករនៅ​ឡើយទេ ដោយ​ខាង​រោងចក្រ​កំពុងពិភាក្សាផ្ទៃក្នុង និងផ្តល់ដំណឹងដល់ក្រុមកម្មករក្នុងសប្តាហ៍នេះ។​​

លោកថា៖ «​ក្នុងនាមថ្នាក់ដឹកនាំ ក៏ដូចជាកម្មករ ទី១ គាត់ចង់ឱ្យ​រោងចក្រដំណើរការបន្ត គាត់​អត់ចង់ឱ្យ​​រោង​ចក្រ​បិទ​ទេ ប៉ុន្តែបន្តឬមិនបន្ត​នៅលើថៅកែ ហើយទី២ ក្នុងករណីគាត់បិទគាត់អី កម្មករក៏ស្នើ​សុំឱ្យ​​ទូទាត់​ប្រាក់​អត្ថប្រយោជន៍​តាម​ផ្លូវ​ច្បាប់»។

បើតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១៩ ខែមីនា ឆ្នាំ២០២៤ បាន​លើកឡើង​ថា ក្រសួង​កំពុងយកចិត្តទុកដាក់​ចំពោះសុខទុក្ខរបស់កម្មករ​និយោជិត​នៃរោង​ចក្រ​ អ.ជី ហ៊្វូត​វែរ ដែលអាចប្រឈមនឹងបញ្ហាមួយចំនួន។ ដើម្បីជួយសម្រាលទុក្ខលំបាក ក្រសួងថា កម្មករ​និយោជិត​នៃរោង​ចក្រនេះ នៅតែ​ទទួលបាន​អត្ថប្រយោជន៍​ និងការប្រើ​ប្រាស់​ប័ណ្ណ​ ប.ស.ស (បេឡាជាតិរបបសន្តិសុខ​សង្គម)ជាធម្មតាដដែល ហើយ​ក្រសួងនឹង​បន្តចុះផ្សព្វផ្សាយពីឱកាស​ការ​ងារ និងមានមន្ត្រីរងចាំចុះឈ្មោះ​ស្វែងរកការងារ​ធ្វើ​ភ្លាមៗជូនកម្មករ​នៅម្តុំរោង​ចក្រ​ស្បែក​ជើង​នេះ។ 

គួរបញ្ជាក់ថា កាលពីថ្ងៃទី១៨ ខែមករា ឆ្នាំ២០២៤ ក៏ធ្លាប់មាន​ករណីគ្រោះអគ្គិភ័យមួយ​ ឆាបឆេះឃ្លាំង​ស្តុកទុក និង​ចែកចាយសារធាតុគីមីសម្រាប់បោកគក់ ​នៅរោងចក្រកាត់ដេរយីដា ស្ថិត​នៅ​​ស្រុកកៀនស្វាយ ខេត្តកណ្តាល ផងដែរ ដោយ​បណ្តាលឱ្យកម្មការិនីម្នាក់ឈ្មោះ សុខ ឆវី អាយុ ៣៣ឆ្នាំ បានស្លាប់បាត់បង់ជីវិត និងមនុស្ស​ ២០នាក់ទៀត​បាន​រង​របួស។

ក្រោយហេតុការណ៍នេះ ក្រសួងការងារ និងបណ្តុះបណ្តាលវិជ្ជាជីវៈ និងរដ្ឋាភិបាល ជាបន្តបន្ទាប់ បានដាក់​ចេញនូវ​​វិធានការមួយចំនួន ដើម្បី​បង្ការអគ្គិភ័យ និងវិធានការសុវត្ថិភាព និងសុខភាព​ការងាររបស់កម្មករនិយោជិត​នៅតាមសហគ្រាស និង​គ្រឹះស្ថាន​។ ក្នុងសេចក្ដីណែនាំរបស់ក្រសួងការ​ងារ ចុះថ្ងៃទី១៩ ខែមករា​ ក្រសួង​បានណែនាំឱ្យ​បង្កើន​​ការ​ត្រួត​ពិនិត្យ​ជាប្រចាំនូវបណ្ដាញផ្ដល់អគ្គីសនី បណ្ដុះបណ្ដាលកម្មករ​ពីសញ្ញាសុវត្ថិភាព និងការជម្លៀសខ្លួន ព្រមទាំងការ​ត្រួតពិនិត្យមធ្យោបាយសង្គ្រោះបឋម និងពិនិត្យច្រកចេញអាសន្នជាដើម។

ពាក់ព័ន្ធនឹងករណីគ្រោះអគ្គិភ័យ​ឆេះរោង​ចក្រផលិត​ស្បែកជើង​នេះដែរ រដ្ឋមន្ត្រីក្រសួងមហាផ្ទៃ លោក ស សុខា កាលពីថ្ងៃទី​១៩ ខែមីនាម្សិលមិញ បានអំពាវនាវ​ឱ្យ​​មានការប្រុងប្រយ័ត្នខ្ពស់ ដោយ​សារ​គ្រោះអគ្គិភ័យ​​អាចកើតមានគ្រប់ទីកន្លែង ទាំងនៅ​ក្នុង​ផ្ទះ ផ្សារ រោង​ចក្រ សហគ្រាស​អាជីវកម្ម ទីតាំងសាធារណៈផ្សេងៗ ស្រែចំការ និងព្រៃជាដើម ជាពិសេស​ក្នុងអំឡុងពេលរដូវក្តៅនេះ៕

ចៅក្រមស៊ើបសួរសម្រេចឃុំខ្លួនមន្ត្រី​ផ្កាយ២ម្នាក់ ពីបទឆបោក

ចៅក្រមស៊ើបសួរនៃ​សាលាដំបូងរាជធានីភ្នំពេញ បាន​សម្រេច​​ឃុំខ្លួន​អនុប្រធាន​នាយកដ្ឋាន​​ពន្លត់​អគ្គិភ័យនៃក្រសួងមហាផ្ទៃមួយ​រូប ដាក់ពន្ធនាគារ​ PJ ជាបណ្តោះអាសន្ន ពាក់ព័ន្ធ​នឹង​បទ​ចោទ​ «ឆបោក» ​។

កាលពីរសៀលថ្ងៃទី១៨ ខែមីនា ឆ្នាំ២០២៤ កម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បាន​ចាប់ឃាត់ខ្លួន​មន្ត្រីពាក់ផ្កាយ២ម្នាក់​ ឈ្មោះ អេង សាវឿន ជាអនុប្រធាន​នាយកដ្ឋាន​ពន្លត់អគ្គិភ័យ​នៃក្រសួងមហាផ្ទៃ ពាក់ព័ន្ធនឹងបទឆបោក ប្រព្រឹត្តនៅរាជធានីភ្នំពេញ កាលពីថ្ងៃទី១៧ ថ្ងៃទី២២ ថ្ងៃទី២៧ ខែកញ្ញា ឆ្នាំ២០២១ ដោយ​អនុវត្ត​តាម​ដីកា​បង្គាប់​ឱ្យ​នាំខ្លួន​របស់សាលាដំបូងរាជធានីភ្នំពេញ។

អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា មានប្រសាសន៍នៅថ្ងៃទី១៩ ខែមីនាថា ក្រោយការ​ចាប់ខ្លួន សមត្ថកិច្ចជំនាញបានបញ្ជូនខ្លួន លោក អេង សាវឿន ទៅកាន់សាលា​ដំបូងរាជធានីភ្នំពេញ ហើយករណីនេះចៅក្រម​ស៊ើបសួរ ​បានសម្រេចឃុំខ្លួនជាបណ្តោះអាសន្ននៅពន្ធនាគារ​រួចរាល់ហើយ។

លោកមានប្រសាសន៍ថា៖ «ចាប់ខ្លួនថ្ងៃទី១៨ ខែមីនា ឆ្នាំ២០២៤ ចាប់នៅតាមផ្លូវ […] តុលាការសម្រេចឃុំខ្លួនហើយ»។

ចំណែក អ្នកនាំពាក្យអយ្យការអម​សាលាដំបូងរាជធានីភ្នំពេញ លោក ប៉េង ម៉េងគ័ង បាន​បញ្ជាក់ថា សំណុំរឿង​នេះ បានបញ្ជូនទៅចៅក្រមរួចរាល់ហើយ ហើយ​ចៅក្រមស៊ើបសួរ បាន​​​សម្រេចឃុំខ្លួន លោក អេង សាវឿន ដាក់ពន្ធនាគារជាបណ្ដោះអាសន្ន កាលពីថ្ងៃទី១៨ ខែមីនា ក្រោយ​ពី​​សាកសួរ​ចប់​។

បើតាមប្រភព​​ពីសារព័ត៌មាន​​នានា លោក អេង សាវឿន អាយុ ៥៤ឆ្នាំ ដែលជាមន្ត្រីពាក់ផ្កាយ២រូបនេះ បាន​រងបណ្តឹង ពាក់ព័ន្ធនឹងករណីទទួលយកប្រាក់អ្នកដទៃជាង ៥ម៉ឺនដុល្លារអាមេរិក ដើម្បីយក​ទៅរត់ការចូលក្របខណ្ឌនគរបាលជាតិ តែ​រត់ការមិន​បាន​សម្រេច ហើយលោកបែរជាយកប្រាក់របស់ជនរងគ្រោះនោះ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារសិទ្ធិមនុស្ស​លីកាដូ លោក អំ សំអាត មាន​ប្រសាសន៍ថា ការ​ចាប់ និង​ការ​ឃុំខ្លួន​លោកឧត្តមសេនីយ៍​ទោរូប​នេះ គឺជាការអនុវត្តច្បាប់ និងជាគំរូដូចដែលក្រសួងមហាផ្ទៃ បានប្តេជ្ញាចិត្តចាត់វិធានការលើមន្រ្តីកងកម្លាំងនគរ​បាល​ដែល​ប្រើប្រាស់​សារធាតុញៀន ប្រព្រឹត្តអំពើពុករលួយ ប្រព្រឹត្តខុសច្បាប់ និងមិនគោរពវិន័យ។

លោកថា ចំណាត់ការតាមផ្លូវច្បាប់ទៅលើ​មន្ត្រីដែលប្រព្រឹត្ត​ខុសនេះ ត្រូវបន្តអនុវត្ត​ឱ្យ​បាន​ម៉ឹងម៉ាត់​បន្ថែម​ទៀត ដើម្បីប្រសិទ្ធភាព តម្លាភាព និងយុត្តិធម៌ក្នុងសង្គម។ លោក​ថ្លែង​ថា៖ «ចំណាត់ការនេះ ជារឿងល្អ និងជាគំរូមួយ យើង​ជា​សង្គមស៊ីវិល​ដែល​ធ្វើការ​លើវិស័យ​សិទ្ធិមនុស្ស និងជំរុញ​ការអនុវត្តច្បាប់សូមលើកទឹកចិត្តនូវវិធានការនេះបន្តទៀត ដែលធ្វើឡើងដោយ តម្លាភាព និងយុត្តិធម៌ មន្រ្តីណាដែលធ្វើខុសត្រូវប្រឈមមុខចំពោះច្បាប់ ដូចប្រជាពលរដ្ឋដែរ ជាពិសេសត្រូវធ្វើជាគំរូសម្រាប់ពលរដ្ឋ»

អាជ្ញាធរព្រមានចាត់វិធានការ​​​ផ្លូវច្បាប់​ចំពោះទីតាំង​លក់​ និង​កែច្នៃស៊ីផ្លេ និងបំពង់ស៊ីម៉ាំង​ខុស​លក្ខណៈបច្ចេកទេស

អាជ្ញាធររាជធានីភ្នំពេញ ណែនាំដល់អាជីវករ និងម្ចាស់ទីតាំងលក់ និងយានដ្ឋាន​ដែលកែច្នៃ​ស៊ីផ្លេ និង​បំពង់ស៊ីម៉ាំង​យាន​យន្ត​​ខុសលក្ខណៈបច្ចេកទេស ត្រូវ​បញ្ឈប់​សកម្មភាពលក់ឬកែច្នៃជាបន្ទាន់ បើពុំនោះទេនឹងប្រឈមវិធានការផ្លូវច្បាប់។

សេចក្តីណែនាំរបស់​រដ្ឋបាល​រាជធានីភ្នំពេញ នៅថ្ងៃទី១៩ ខែមីនា ឆ្នាំ២០២៤ បាន​លើកឡើង​ថា កន្លងមក មានយានយន្ត​មួយចំនួន បានកំពុងប្រើប្រាស់​ស៊ីផ្លេ និង​បំពង់​ស៊ី​ម៉ាំងខុស​លក្ខណៈបច្ចេកទេស​ ដែលសកម្មភាពនេះ បានបង្កជាសំឡេងរំខាន​ដល់​សាលា​រៀន មន្ទីរពេទ្យ វត្តអារ៉ាម និង​ធ្វើ​ឱ្យប៉ះពាល់ដល់សណ្តាប់​ធ្នាប់សាធារណៈនៅតាមដងផ្លូវ ក៏ដូចជា​បង្ក​ហានិភ័យដល់​អ្នកធ្វើដំណើរ​ ដែលអាចបណ្តាល​ឱ្យ​មានគ្រោះថ្នាក់ជាយថាហេតុ។

ដើម្បីលុបបំបាត់​ករណីនេះ រដ្ឋបាលរាជធានីភ្នំពេញ បាន​ណែនាំ​ដល់​អ្នកប្រើប្រាស់យាន​យន្ត​កំពុង​បំពាក់​ស៊ីផ្លេ និង​បំពង់ស៊ីម៉ាំង​ដែលបានកែច្នៃខុស​លក្ខណៈបច្ចេកទេស​ ត្រូវ​ដោះឧបករណ៍​​ទាំងនោះចេញ ដោយ​ត្រូវ​ផ្លាស់ប្តូរ​ឱ្យបានត្រឹមត្រូវ​ស្របតាមលក្ខណៈបច្ចេក​ទេស​យាន​យន្ត​​ដូចដើមវិញ។ ចំណែកអាជីវករ​ ពាណិជ្ជករ​ និង​ទីតាំងកែច្នៃ ដែលកំពុងធ្វើអាជីវកម្មប្រភេទនេះ ត្រូវ​បញ្ឈប់សកម្មភាពជាបន្ទាន់ ហើយ​បើសិន​នៅ​បន្ត​ការលក់ និង​កែច្នៃទៀត​នោះ អាជ្ញាធរ នឹងធ្វើការ​ដកហូត​នូវឧបករណ៍ទាំងនោះ និង​បិទទីតាំង​អាជីវកម្ម​តែម្តង។​

សេចក្តីណែនាំបានគូសបញ្ជាក់ថា៖ «សូម​បងប្អូន​ប្រជាពលរដ្ឋដែល​បាននិងកំពុងប្រើប្រាស់​ អាជីវករ ពាណិជ្ជ​ករ និងម្ចាស់​យានដ្ឋាន និងម្ចាស់ទីតាំង​កែច្នៃ​នូវ​ឧបករណ៍​ខុស​លក្ខណៈបច្ចេក​ទេសទាំងអស់ ត្រូវបញ្ឈប់សកម្មភាពទាំងនេះ​ជាបន្ទាន់ ដោយទុករយៈពេល ០១សប្តាហ៍ គិតចាប់ពីថ្ងៃចុះហត្ថលេខានេះតទៅ។ ផុតរយៈពេលឱសានវាទនេះ អាជ្ញាធរ​មានសមត្ថកិច្ចនឹងអនុវត្តវិធានការរដ្ឋបាល និងវិធានការច្បាប់ដោយគ្មានការលើកលែងឡើយ»។

គេហទំព័រ Newsroom Cambodia មិនអាចសុំការអត្ថាធិប្បាយ​បន្ថែម​ជុំវិញករណីនេះ ពី​អ្នកនាំពាក្យ​រដ្ឋបាលរាជធានីភ្នំពេញ លោក ម៉េត មាសភក្តី បាន​នោះទេ​។

ការព្រមានរដ្ឋបាលរាជធានីភ្នំពេញ​នេះ បាន​ធ្វើឡើង​​ក្រោយពីលោក​នាយករដ្ឋមន្រ្តី ហ៊ុន ម៉ាណែត កាលពីថ្ងៃទី១៨ ខែមីនា ឆ្នាំ​២០២៤ បានណែនាំដល់ក្រសួង ស្ថាប័នពាក់ព័ន្ធ អាជ្ញាធរ និងសមត្ថកិច្ច​រាជធានី-ខេត្ត ត្រូវមានវិធានការ​ចំពោះយានយន្ត​ដែល​ដាក់ស៊ីផ្លេខុសលក្ខណៈ​បច្ចេកទេស ​និង​ទប់ស្កាត់​ភាពអនាធិបតេយ្យតាមរយៈការរាំតាមភ្លេងស៊ីផ្លេ​តាមដងផ្លូវសាធារណៈ ដែលអាចបង្កគ្រោះថ្នាក់​ដល់​អាយុជីវិត។ នេះបើតាមការលើកឡើងរបស់នាយករដ្ឋមន្ត្រីក្នុងបណ្តាញសង្គមហ្វេសប៊ុក។

ការណែនាំនេះ ដោយសារតែលោកនាយករដ្ឋមន្ត្រី សង្កេត​ឃើញថា ក្នុងរយៈពេលថ្មីៗ​នេះ មាន​ការបង្ហោះតាមបណ្តាញ​សង្គម​មួយចំនួន ពាក់ព័ន្ធនឹងសកម្មភាពរបស់ប្រជាពលរដ្ឋ ជាពិសេស​យុវជន​ និង​​កុមារ ធើ្វ​សកម្មភាពរាំលេងតាមដងផ្លូវទៅតាមចង្វាក់ស៊ីផ្លេបែបភ្លេង​របស់រថយន្តធំៗ។

ករណីនេះ លោក​បាន​​អំពាវនាវ​ដល់ប្រជាពលរដ្ឋ ជាពិសេសកុមារ​​ៗ ត្រូវ​បញ្ឈប់​សកម្មភាព​រាំលេងតាមដងផ្លូវតាមចង្វាក់ស៊ីផ្លេភ្លេងរបស់រថយន្តធំៗ ជៀស​វាងគ្រោះថ្នាក់ និង​បង្កភាពអនា​ធិប​តេយ្យតាមដងផ្លូវបែបនេះ។

នាយកទទួលបន្ទុកកិច្ចការទូទៅ​អង្គការ​សិទ្ធិ​មនុស្ស​​លីកាដូ លោក អំ សំអាត មានប្រសាសន៍ថា​ ក្រុម​ហ៊ុន​​​ផលិត​​រថយន្ត ម៉ូតូ និងយាន្តជំនិះ​ផ្សេងៗ គឺមាន​បំពាក់​ឧបករណ៍បច្ចេក​ទេស​គ្រប់​គ្រាន់​ហើយ ដែល​មិនចាំបាច់ត្រូវ​ការ​​បំពាក់បន្ថែមឧបករណ៍​ដែលនាំឱ្យខុសលក្ខណ:បច្ចេក​ទេស និង​បង្កការ​​រំខានដល់អ្នកដំណើរ ប្រជាពលរដ្ឋ និងអាចបង្កឱ្យមានគ្រោះថ្នាក់​នោះទេ។

លោកយល់ថា វិធានការរឹតបន្តឹងលើការកែច្នៃយានយន្តខុសលក្ខណៈបច្ចេកទេសនេះ អាជ្ញាធរ​គួរអនុវត្ត​ឱ្យបានជាប្រចាំ និងម៉ឹងម៉ាត់។

លោកថា៖ «វិធានការនេះ អាជ្ញារធរគួរអនុវត្តយូរមកហើយ មិនចាំបាច់ដល់ពេល​ថ្នាក់ដឹកនាំ​មើល​ឃើញ និង​ដាក់​បទបញ្ជា ទើ​ប​អនុវត្តនោះទេ វិធានការនេះ​ពេលថ្នាក់ដឹកនាំដាក់បញ្ជា អាជ្ញាធរពាក់ព័ន្ធពិតជាអនុវត្ត ប៉ុន្តែការអនុវត្តគួរតែជាប្រចាំ និងអនុវត្តតាមច្បាប់ កុំឱ្យបញ្ហានេះកើតមានមកវិញ»៕

Voxpop៖ ទស្សនៈពលរដ្ឋលើ​ការប្រើប្រាស់បណ្ដាញទំនាក់ទំនងសង្គមរបស់កុមារក្រោម​​​១៨ឆ្នាំ

ការប្រើប្រាស់បណ្ដាញទំនាក់ទំនងសង្គម​ដូចជា Facebook,Tik Tok, Instagram, Whatsapp,Telegram និងកម្មវិធីជាច្រើនទៀត កំពុងមានការពេញនិយមចំពោះមនុស្សគ្រប់វ័យ ជាពិសេសកុមារក្រោយអាយុ១៨ឆ្នាំដែលកំពុងស្ថិតនៅក្នុងវ័យសិក្សា។ បណ្តាញទំនាក់ទំនងសង្គម​ត្រូវបានទទួល​ស្គាល់​ថា​មានទាំងចំណុចវិជ្ជមាន និងអវិជ្ជមាន ។

Newsroom Cambodia បានសម្ភាសន៍ពលរដ្ឋចំនួន​៦នាក់ ជុំវិញការ​យល់ឃើញ​​របស់ពួក​គេ​ទាក់ទង​នឹង​ការប្រើប្រាស់​បណ្ដាញទំនាក់ទំនងសង្គមរបស់កុមារក្រោមអាយុ១៨ឆ្នាំ៖​

លោក​​ ​វឿន ទិវា អាយុ២៥ ជាទាហាន យល់ឃើញថា ការប្រើប្រាស់បណ្ដាញសង្គមរបស់កុមារក្រោមអាយុ១៨ឆ្នាំ ធ្វើឲ្យពួកគេយល់ដឹង តាមទាន់បច្ចេកវិទ្យាសម័យថ្មី ប៉ុន្តែ​អាចធ្វើឱ្យប៉ះពាល់ដល់ការសិក្សា​របស់ពួកគេ​។

​លោកបន្តថា៖​ «ចំពោះផលវិជ្ជមានពួកគាត់ អាចយល់ដឹងច្រើនពីសង្គមជាក់ស្ដែង។ ផលអវិជ្ជមានពួកគាត់ អាចញៀនរបស់អស់នឹង នៅពេលដែលគាត់ញៀនច្រើន​ លេងច្រើន អាចប៉ះពាល់ដល់ការសិក្សារបស់ពួកគាត់»។

លោក​​ ​វឿន ទិវា អាយុ២៥ ជាទាហាន។ (រូបភាព៖ ឈួន ចាន់រស្មី)

លោក លីប សេងហួរ ជានិសិ្សតនៅសាកលវិទ្យាល័យវិទ្យាសាស្រ្តសុខាភិបាល លើកឡើងថា បច្ចុប្បន្ននេះកុមារមួយចំនួនប្រើជំនាញរបស់ពួកគេ បង្កើតជាជំនួញ (លក់អនឡាញ) ស្របពេលដែលកុមារមួយចំនួនទៀតបង្កើតមាតិកាមិនសមរម្យ ។

លោកបន្តថា៖​ ​« គាត់អាចបង្កើតជា Page(ទំព័រលើបណ្តាញសង្គម)គាត់បង្កើតBusiness(ជំនួញ)ខ្លួនឯងក្មេងខ្លះគាត់ឆ្លាតគាត់ចំណាប់ខាងរកស៊ីប្រើពួកនឹងទៅល្អទម្រាំពួកគាត់ចូលសាកលទៀត​ ការវិវឌ្ឍន៍របស់ពួកគាត់កាន់តែល្អ»។

លោក លីប សេងហួរ និសិ្សតនៅសាកលវិទ្យាល័យវិទ្យាសាស្រ្តសុខាភិបាល។ (រូបភាព៖ ឈួន ចាន់រស្មិ)

លោកបន្ថែមថា៖​ «​ក្មេងខ្លះទៀតគាត់ប្រើក្រោមរូបភាពមិនត្រឹមត្រូវ ឬ ​​Post (ផ្សព្វផ្សាយ) ប្រភេទរូបភាពមិនល្អ​ធ្វើសកម្មភាពឆ្គាំឆ្គង វាមិនល្អដល់សង្គម​ ​[…] មើលទៅមិនល្អសម្រាប់គាត់ នៅក្មេងថតរូបសិចស៊ីបង្ហាញលើ Social media(បណ្ដាញសង្គម)ដែលធ្វើឲ្យអាប់ឱនដល់មុខមាត់គាត់ ក៏ដូចជាប៉ាម៉ាក់គាត់»។

កញ្ញា ស៊ឹម ផាត់ទីយ៉ា ជាបុគ្គលិកសង្គមកិច្ច ក្នុងអង្គការមិនមែន​រដ្ឋាភិបាល យល់​ឃើញថា សព្វថ្ងៃនេះឪពុកម្ដាយមួយចំនួនធំមានលទ្ធភាពឲ្យកូនប្រើប្រាស់ទូរស័ព្ទទំនើប ធ្វើឲ្យ​កុមារងាយស្រួលក្នុងការប្រើបណ្ដាញទំនាក់​ទំនង​សង្គម ទង្វើទាំងនេះប្រៀបដូចអាវុធមុខពីរចំពោះកុមារស្ថិតក្នុងវ័យសិក្សា។

កញ្ញាបន្តថា៖​ «ឧទាហរណ៍ពាក់ព័ន្ធជាមួយកម្មវិធី Tik Tok (ទិកតុក) មួយចុះ ជាកម្មវិធីដែលយើង Post (ផ្សព្វផ្សាយ) រូប​ ឬវីដេអូ ហើយវាទាក់ទង​ការ Post (ផ្សព្វផ្សាយ) វីដេអូរាំ អ្វី​ដែល​អត់​ល្អ​ចំពោះ​ក្មេង អ៊ីចឹងទៅនឹងធ្វើឲ្យប៉ះពាល់ការគិតរបស់ក្មេងហើយជះឥទ្ធិពលដល់ពួកគាត់​​ ឲ្យគាត់ធ្វើតាមរឿងអស់នឹង​ដែរ គាត់វក់លេងវាច្រើន លែងចង់រៀន ​ហើយរបៀបរៀបចំខ្លួនរបស់ពួកគាត់មើលទៅខុសពីក្មេងដទៃ»។

កញ្ញា ស៊ឹម ផាត់ទីយ៉ា ជាបុគ្គលិកសង្គមកិច្ច ក្នុងអង្គការមិនមែន​រដ្ឋាភិបាល។ (រូបភាព៖ ផ្តល់ដោយ ស៊ឹម ផាត់ទីយ៉ា)

កញ្ញាបន្ថែមថា៖​ «ទន្ទឹមនឹងនោះក៏មានផលវិជ្ជមានដែរ បើសិនជាក្មេងក្នុងវ័យនឹងគាត់អាចប្រើជាប្រយោជន៍មើល Youtube (យូធូប) មើលមេរៀន»។

កញ្ញា កែវ សុធា ជានិស្សិតនៅវិទ្យាស្ថានវ៉ាន់ដា បានលើកឡើងថាមានផលប៉ះពាល់ខ្លាំងប្រសិនបើកុមារធ្វើត្រាប់តាមមាតិកាមិនសមរម្យ ដែលផ្សព្វផ្សាយលើបណ្តាយសង្គម ស្របគ្នានេះធ្វើឲ្យកុមារស្គាល់ពីសង្គមខាងក្រៅកាន់តែច្បាស់។

កញ្ញាសំណូមពរថា៖ ​​«អ្នកម្តាយ ឬលោកឪពុកគ្រប់រូប ពេលទំនេរនាំកូនដើរលេងកម្សាន្តកុំឲ្យគាត់ [កុមារ] លេង​ទូរសព្ទច្រើន»។

កញ្ញា កែវ សុធា ជានិស្សិតនៅវិទ្យាស្ថានវ៉ាន់ដា។ (រូបភាព៖ ឈួន ចាន់រស្មី)

កញ្ញា ប៉ិច​​ សៀមលី​​​ ជាបុគ្គលិកធនាគារ យល់ឃើញថាកុមារចំណាយពេលលើបណ្តាញសង្គមច្រើនខ្លាំងពេក​ធ្វើឲ្យប៉ះពាល់ដល់ទំនាក់ទំនងរបស់កុមារជាមួយក្រុមគ្រួសារ។

កញ្ញាបន្តថា៖​​ ​​«ផលប៉ះពាល់ទី១គឺជះឥទ្ធិពលខ្លាំងលើContent(មាតិកា)មិនសូវសរម្យធ្វើឲ្យគាត់យកគំរូតាម ទី២គឺប៉ះពាល់លើការសិក្សារបស់ពួកគាត់ព្រោះវ័យនឹង ជាវ័យដែលកំពុងក្រេបយកចំណេះវិជ្ជា​»​។

កញ្ញា ប៉ិច​​ សៀមលី​​​ ជាបុគ្គលិកធនាគារ។ (រូបភាព៖ ឈួន ចាន់រស្មី)

កញ្ញាបន្ថែមថា៖ ​«ប្រសិនបើគាត់ប្រើលើផ្លូវត្រូវគឺគាត់ទទួលបានចំណេះដឹងច្រើន គាត់ទទួលបាន Video(វីដេអូ)ល្អគាត់យកគំរូតាម​​​​»។ 

លោក កែវ សំណាង ជានិស្សិតសាកលវិទ្យាល័យវេស្ទើន លើកឡើងថាមានផលល្អបើកុមារប្រើបណ្តាញ​ទំនាក់ទំនងសង្គមជាប្រយោជន៍សម្រាប់ស្រាវជ្រាវឯកសារមេរៀន។

លោក កែវ សំណាង ជានិស្សិតសាកលវិទ្យាល័យវេស្ទើន។ (រូបភាព៖ ឈួន ចាន់រស្មី)

លោកបន្តថា៖​ ​«គុណវិបត្តិធ្វើឲ្យកុមារមួយចំនួនវក់​នឹងការប្រើបណ្តាញសង្គម មិនថាYoutube(យូធូប) ឬកម្មវិធីផ្សេងៗ»៕

Voxpop៖ ​ការ​យល់​ឃើញ​របស់​ប្រជាពលរដ្ឋ​​ក្នុង​ការ​ទុក​ដាក់​​សំរាម​នៅ​​រាជធានីភ្នំពេញ​

ការទុកដាក់សំរាមនៅរាជធានីភ្នំពេញក្នុងរយៈពេល​ប៉ុន្មាន​ឆ្នាំ​ចុងក្រោយ​នេះ ហាក់មានភាពប្រសើរជាងមុន​ដោយសារ​តាម​​ទី​សាធារណៈមួយចំនួន​មាន​ធុងសំរាមច្រើន ប៉ុន្តែ​គេ​ឃើញ​ថា​ប្រជាពលរដ្ឋ​​នៅ​​តាម​តំបន់​មួយចំនួន​នៅ​បន្ត​បោះសំរាមចោល​​ពាស​វាល​ពាស​កាល​នៅឡើយ ចំណែក​ការ​ទុក​ដាក់​សំរាម​ក៏​ហាក់នៅមាន​កម្រិត។

​​Newsroom Cambodia បានសម្ភាសន៍ប្រជាពលរដ្ឋជាអាជីវករ និងយុវជនចំនួន​៦រូប ដែល​រស់នៅ​រាជធានី​ភ្នំពេញ អំពី​ការយល់​ឃើញ​របស់​ពួកគាត់​លើ​ការទុកដាក់​សំរា​ម​នៅ​រាជធានី​ភ្នំពេញ៖

កញ្ញា យាង សុខម៉េង មកពីខេត្តត្បូងឃ្មុំ ជានិស្សិតរៀនជំនាញគណនេយ្យ ឆ្នាំទី១ នៅ​វិទ្យាស្ថាន​វ៉ាន់ដា​លើកឡើងថា ​នៅរាជធានីភ្នំពេញ​​​​មាន​ធុងសំរាម​ច្រើន ប៉ុន្តែ​ធុង​សំរាម​ខ្លះ​នៅ​មាន​សំរាម​ក្នុងធុង​ដែល​ប្រមូលមិនបានអស់ ចំណែក​កន្លែង​ខ្លះទៀ​ត​ដែល​គ្មាន​ការអនុញ្ញាត​ឱ្យ​មាន​ការចោ​លសំរាមនៅទីនោះ តែមានសំរាមចោលរប៉ាត់រប៉ាយ។  

កញ្ញាបញ្ជាក់​​ថា៖ «បើសិនយើងជាយុវជន ពេលធ្វើដំណើរទៅជួប ឬឃើញ​សំរាម​កន្លែង​ហ្នឹង​ហើយ ទោះជាយើងមិនបានប្រមូលចេញ ក៏យើង​មិន​គួរ​យក​សំរាម​ទៅ​ដាក់​ចោល​កន្លែង​ហ្នឹង​ថែម​ទៀតដែរ ទោះបីឃើញមានសំរាមនៅហ្នឹងមានច្រើនហើយក្ដី បើសិនគេ​ឃើញ​យើង​នៅ​តែ​បន្ត​ចោលសំរាមនៅទីនោះ អ្នកផ្សេងទៀតនឹងបន្តចោលតាមដែរ ដូច្នេះ​មាន​ន័យ​ថា​ធ្វើ​ឱ្យ​បរិស្ថាន​​ស្អា​តត្រូវមានការចាប់ផ្ដើមពីខ្លួនឯងផ្ទាល់»។

កញ្ញា យាង សុខម៉េង និស្សិតរៀនជំនាញគណនេយ្យនៅ​វិទ្យាស្ថាន​វ៉ាន់ដា។ (រូបភាព៖ កេង ចាន់នូ)

កញ្ញាបន្ថែមថា៖ «សូមឱ្យបងប្អូនឈប់បន្ត​ចោលសំរាម​ពាស​វាល​ពាស​កាល និង​ត្រូវ​រក្សា​ទុក​ជាប់​ខ្លួនរហូតទៅដល់កន្លែងដែលមានធុងសំរាមច្រើនសម្រាប់ចោល គឺ​មិនមាន​ការខាត​បង់​អ្វី​ទេ ហើយណាមួយបើសិនជាបរិស្ថានស្អាតធ្វើឱ្យយើងមានសុខភាពល្អ ទីក្រុង​មានការអភិវឌ្ឍ និង​មាន​ការទាក់ទាញ​ភ្ញៀវ​ទេសចរ​មាន​ចំណាប់​អារម្មណ៍​មក​ដើរកំសាន្ត​នៅ​ក្នុង​ប្រទេស​ស្អាត ធ្វើឱ្យប្រទេសជាតិរីកសុសសាយ»។

កញ្ញា អ៊ី កែវរស្មី និស្សិតរៀនជំនាញគណិតវិទ្យា។ (រូបភាព៖ កេង ចាន់នូ)

កញ្ញា អ៊ី កែវរស្មី អាយុ១៩ឆ្នាំ មកពីខេត្តកំពត ជានិស្សិតរៀនជំនាញគណិតវិទ្យា ឆ្នាំទី៣ នៅ​វិទ្យាល័យភូមិន្ទភ្នំពេញ លើកឡើងថា ការទុកដាក់ ឬចោលសំរាមនៅរាជធានីភ្នំពេញ ​មានការ​រៀបចំ និង​ទុកដាក់​បាន​ល្អ​ដោយកន្លែង។

កញ្ញាបញ្ជាក់ថា៖ «ដើម្បី​មាន​បរិស្ថាន​ល្អ​ប្រសើរ​គឺ​អាស្រ័យ​លើ​យើង​ត្រូវ​ចាប់ផ្ដើម​កាត់បន្ថយ​ការប្រើប្រាស់​សំរាម។ ព្រោះធម្មតាក្នុងទីក្រុងភ្នំពេញយើង​គឺ​មាន​ក្រុមហ៊ុន​ខាង​ការប្រមូល​សំរាម ដូច្នេះហើយមានការរៀបចំកន្លែងចោលសំរាមនីមួយៗ និង​ចង់​ឱ្យ​ពួកគាត់​ដែល​ចោល​សំរាម​ក្នុង​ទីកន្លែង​ពាសវាលពាសកាល ឬ​ក្នុង​លូទឹក ត្រូវ​មាន​ការប្រមូល​សំរាម​ដាក់​ទុក​ក្នុង​ធុង​ដែល​គេ​តម្រូវឱ្យចោលបាននោះវិញ​ដូចជា​នៅមុខផ្ទះនីមួយៗគឺមានកន្លែង​ទុកដាក់​សំរាម​សម្រាប់​ទុក​ឱ្យខាងអ្នកប្រមូលសំរាម​មកធ្វើការប្រមូល បើតាមមើលឃើញពេលខ្លះ២ថ្ងៃ ឬ៣​ថ្ងៃ​មក​ប្រមូល​ម្ដង»។

ព្រះតេជគុណ អួន សូនី អាយុ២៤ឆ្នាំ មកពីខេត្តកំពត ជានិស្សិតរៀនជំនាញអក្សរសាស្ត្រខ្មែរ ឆ្នាំទី១ នៅវិទ្យាល័យភូមិន្ទភ្នំពេញ យល់ឃើញថា សំរាម​តាមដងវិថីនានា​​​ក្នុង​រាជធានី​ភ្នំពេញ​ មាន​ការរៀបចំ​ទុកដាក់បានល្អ ខណៈប្រជាពលរដ្ឋ​ភាគច្រើន​​យកចិត្តទុក​ដាក់​ចោល​សំរាម​ក្នុង​ធុង​សំរាម​មានសណ្ដាប់ធ្នាប់ត្រឹមត្រូវ។

ព្រះតេជគុណ​បន្ថែមថា៖ «សម្រាប់និយមន័យរួមប្រពលរដ្ឋខ្មែរនៅរាជធានីភ្នំពេញ គឺយើងត្រូ​វ​ធ្វើ​យ៉ាងណា​ទម្លាប់​ខ្លួន​ឱ្យ​ជា​មនុស្ស​ដែល​ស្រលាញ់​សំរាម​ មាន​ន័យ​ថា ពេល​ឃើញ​សំរា​ម​គឺ​យើង​ចង់​កាន់វាយកទៅដាក់នៅក្នុងធុងសំរាម ដើម្បី​ឱ្យ​រាជធានី​ភ្នំពេញ​របស់​យើង​មាន​សោភ័ណ​ភាព​ល្អ ហើយជាពិសេសសម្រាប់ទាក់ទាញ និង​បង្ហាញ​ភ្ញៀវ​បរទេស​ឱ្យ​គាត់​បាន​ឃើញ​ពី​ទិដ្ឋភាពថា ប្រជាជនខ្មែរគឺមាន​​របៀបរបប និង​មាន​វិន័យ​ត្រឹមត្រូវ គឺ​ពេល​ឃើញ​សំរាម​អី​គឺពួ​កគាត់ចង់ប្រមូលចោលក្នុងធុងសំរាម»។​

ព្រះតេជគុណ អួន សូនី។ (រូបភាព៖ កេង ចាន់នូ)

អ្នកនាង វ៉េង ស្រីមាស អាយុ៣៣ឆ្នាំ ជាអ្នកលក់ភេសជ្ជៈ​តាមដងផ្លូវនៅសង្កាត់កាកាប ខណ្ឌពោធិ៍សែនជ័យ រាជធានីលើកឡើងថា ការទុកដាក់សំរាម​នៅរាជធានីភ្នំពេញ​នៅមា​ន​ការខ្វះ​ចន្លោះ ដោយសារ​ការយល់ដឹង​របស់​ប្រជាពលរដ្ឋ​នៅមា​នកម្រិត​នៅឡើយ។

អ្នកនាង វ៉េង ស្រីមាស បានបន្ថែមថា៖ «ការផ្សព្វផ្សាយជូនដំណឹងក្នុងការទុក​ដាក់​សំរាម​ជូន​ដល់​ប្រជាពលរ​ដ្ឋ ​ច្រើន តែបងប្អូនប្រជាពលរដ្ឋភាគច្រើន​មិនមាន​ចំណាប់​អារម្មណ៍​តាមដាន​ស្ដាប់ មើលពីរបៀបរបបល្អៗក្នុងការទុកដាក់សំរាម ដូច្នេះ​ហើយ​សូម​សំណូមព​​រ​ឱ្យ​ប្រជាពលរដ្ឋ​យកចិត្ត​ដាក់មើល និងធ្វើតាមសកម្មភាពល្អៗ ព្រោះបើ​មិនទុកដាក់​ឱ្យ​បាន​ត្រឹមត្រូវ​ទេ​នោះ សំរាមជះផលប៉ះពាល់មកយើងវិញ»។​

អ្នកនាង អ៊ាម ស្រីតូច អាជីវករលក់បន្លែនៅផ្សារសិនជូរីផ្លាហ្សា​។ (រូបភាព៖ កេង ចាន់នូ)

អ្នកនាង អ៊ាម ស្រីតូច អាយុ៣៣ឆ្នាំ ជាអាជីវករលក់បន្លែនៅផ្សារសិនជូរីផ្លាហ្សា​លើកឡើង​ថា ការទុកដាក់សំរាមនៅរាជធានីភ្នំពេញ មានភាពល្អប្រសើរ​ដោយកន្លែង។ អ្នកនាង​បន្ថែម​ថា៖

អ្នកនាង អ៊ាម ស្រីតូច បានបន្ថែមថា៖ «ចង់បានបរិស្ថាន និងទីលំនៅយើង​ស្អាតគឺមាន​ការចាប់​ផ្ដើម​ពី​យើងត្រូវមានការទុកដាក់សំរាមដោយមានការវេចខ្ចប់ទុកដាក់ឱ្យបានត្រឹមត្រូវ ព្រោះ​សំរាម​មាន​ក្លិនមិនល្អដល់បរិស្ថាន ធ្វើខូចសុខភាពផងដែរ»។​

អ្នកនាង អ៊ាម ស្រីតូច អាជីវករលក់បន្លែនៅផ្សារសិនជូរីផ្លាហ្សា​។ (រូបភាព៖ កេង ចាន់នូ)

អ្នកស្រី យ៉ែម សុផា អាយុ៤៤ឆ្នាំ ជាអ្នកប្រកបមុខរបរលក់ត្រី នៅផ្សារសិនជូរីផ្លាហ្សា លើកឡើងថា ការទុកដាក់ ឬចោល​សំរាម​នៅរាជធានី​ភ្នំពេញ​គឺ​កន្លែង​ខ្លះ​មាន​សណ្ដាប់​ធ្នាប់​ក្នុង​ការទុកដាក់សំរាមដោយមានការវេចខ្ចប់ក្នុងថង់ និងយកទៅចោល​ក្នុង​​ធុងសំរាម និង​កន្លែង​ខ្លះទៀត​មានការចោលពាសវាលពាសកាល ដោយគ្មានសណ្ដាប់ធ្នាប់។

អ្នកស្រី យ៉ែម សុផា អ្នកប្រកបមុខរបរលក់ត្រី នៅផ្សារសិនជូរីផ្លាហ្សា។ (រូបភាព៖ កេង ចាន់នូ)

អ្នកស្រី​បន្ថែមថា៖ «ចំពោះកន្លែង​ដែលមានការចោលសំរាម​ពាសវាល​ពាស​កាល​គ្មាន​សណ្ដាប់​ធ្នាប់ សូមឱ្យបងប្អូនជាពិសេស​អាជីវករ​លក់ដូរ​ទាំងអស់​ជួយ​ប្រមូល​ដោយ​មាន​ការវេចខ្ចប់​ដាក់​ក្នុងថង់ចោលក្នុងធុងសំរាម កុំមានការពង្រាយក្នុងទីធ្លាសាធារណៈ  ព្រោះ​សំរាមប៉ះពាល់ដល់បរិស្ថាន និងបង្កឱ្យមានផលប៉ះពាល់ដល់សុខភាព»៕

ធនាគារ​ជាតិទទួល​​​ប្តូរក្រដាសប្រាក់រៀលចាស់មកថ្មីដោយមិនគិតកម្រៃ​រយៈពេល​១០ថ្ងៃ

ធនាគារ​ជាតិ​នៃកម្ពុជា​​ជូនដំណឹង​ពីការ​​​ប្តូរក្រដាសប្រាក់រៀល ចាស់ ទក់ រហែក ដោយ​មិន​គិត​កម្រៃ​សេវា គ្រប់សាខាធនាគារជាតិ​នៃកម្ពុជា និងសាខាគ្រឹះស្ថានធនាគារ និងហិរញ្ញវត្ថុទូទាំងប្រទេស ចន្លោះ​ពី​ថ្ងៃទី២០ ដល់២៩ ខែមីនា ឆ្នាំ២០២៤។

បើតាម​សេចក្តី​ជូនដំណឹង​របស់​ធនាគារជាតិ​ ​សី្តពី​ «យុទ្ធនាការស្រឡាញ់ប្រាក់រៀ​ល​»​ ចេញ​ផ្សាយ​ថ្ងៃទី១៩ ខែមីនា ឆ្នាំ​២០២៤​នេះ បញ្ជាក់ថា ដើម្បី​អបអរ​សាទរខួបលើកទី ៤៤ នៃ​ការចេញ​ផ្សាយ​ក្រដាស​ប្រាក់​​រៀល​ និងលើក​កម្ពស់​ការប្រើ​ប្រាក់រៀល​ ធនាគារជាតិនៃកម្ពុជា សហការនឹងគ្រឹះស្ថាន​ធនាគារ និងហិរញ្ញវត្ថុ​​ទទួលប្រាក់បញ្ញើ តាមខេត្តក្រុងទាំងអស់ នឹងទទួលប្តូរក្រដាសប្រាក់រៀល​ចាស់ ទក់ រហែ​ក ប្តូរមកជាក្រដាក់ប្រាក់​ថ្មីវិញ​ ចាប់ពីថ្ងៃទី២០ ដល់២៩ ខែមីនា ឆ្នាំ២០២៤ ចន្លោះ​ម៉ោង ៧:៣០ នាទីព្រឹក​ ដល់​ម៉ោង​ ៣រសៀល។

សេចក្តីជូនដំណឹងដដែលបន្តថា ការប្តូរក្រដាស​​ប្រាក់ចាស់ មិន​គិត​កម្រៃសេវា​នោះ​​ទេក្នុងអំឡុង​ពេល​ខាង​លើនេះ។

តាមរយៈសេចក្តី​ជូន​ដំណឹង​នេះបន្ថែម​​ថា៖ «​ធនាគារ​ជាតិនៃកម្ពុជា​ ទទួលប្តូរ​ក្រដាស​ប្រាក់​រៀល​ចាស់​ ទក់ រហ័ក​ ដោយមិនគិតកម្រៃសេវា ជូន​សាធារណជន នៅគ្រប់​សាខា​ធនាគារ​ជាតិ​នៃ​កម្ពុជា​រាជធានី-ខេត្ត​ ចាប់ពី​ម៉ោង ៧:៣០ នាទី​ ដល់ម៉ោង ១១:០០ នាទីរៀងរាល់​ថ្ងៃធ្វើ​ការ​ ទោះជាមិន​នៅ​ក្នុង​អំឡុង​ពេល​យុទ្ធ​នា​ការ​ប្តូរ​ប្រាក់រៀល​ក៏ដោយ»។

គួរ​រំឮក​ផងដែរ​ថា ក្រដាស​ប្រាក់រៀល​​ត្រូវ​បានបោះ​​ផ្សាយឡើង​វិញនៅ​ថ្ងៃទី២០ ខែមីនា ឆ្នាំ១៩៨០ ដើម្បី​សម្រួលដល់ការទូទាត់ថ្លៃទំនិញ សេវាកម្ម និងបើកប្រាក់បៀរវត្សដល់​មន្រ្តីរាជការស៊ីវិល ក្រោយពេលឈប់ប្រើប្រាស់ទាំងស្រុងអំឡុងពេល​​របប​កម្ពុជា​ប្រជាធិបតេយ្យ ឬ​ខែ្មរក្រហម ចាប់ពីឆ្នាំ​១៩៧៥ ដល់​ឆ្នាំ​១៩៧៩​។ នេះបើ​តាមគេហទំព័រ​ផ្លូវការរបស់ធនាគារជាតិ​នៃកម្ពុជា៕

អង្គការយូនីសេហ្វ​ណែនាំឱ្យមានការការពារ​​ទារក​ កុមារ​ និងមនុស្សចាស់​អំឡុង​​អាកាសធាតុ​ក្តៅខ្លាំង​

មូលនិធិ​​កុមារ​​របស់​​អង្គការសហប្រជាជាតិ​​ ​ហៅ​កាត់​ថា​ យូនីសេហ្វ (UNICEF) ណែនាំ​ឱ្យ​មាន​ការការពារ​​​​​ទារក​ កុមារ​​ និង​មនុស្ស​ចាស់​ ដើម្បីទប់ទល់​​​​​សីតុណ្ហភាព​​​ក្នុង​រដូវ​​ក្តៅ​​​ដែល​អាច​នឹង​កើន​​​ដល់​​​៣៩​អង្សារ​សេ។

​​​បើតាម​សារ​អំពី​ចំណុច​​សំខាន់ៗ​​​ដែល​​​​​ត្រូវ​​យល់​ដឹង និង​​ត្រៀមខ្លួន អង្គកា​យូនីសេហ្វ​បាន​បង្ហោះ​ ​​​​ថ្ងៃ​​​ទី​១៩  ខែមីនា​ ​បញ្ជា​ក់​​​ថា ក្នុង​អំឡុង​សីតុណ្ហភាព​​កើន​កម្តៅ​ក្តៅ​ ​​​សូម​​ពិនិត្យ​​ក្មេង​​ឱ្យ​​បាន​​ទៀង​ទាត់​ និង​ឱ្យ​​ពួកគេ​​ស្លៀក​​សម្លៀក​បំពាក់​រលុង​​​ដែលអាច​បន្ថយ​ការ​ឡើង​ក​ម្តៅ ​​​​និង​​​​រលាក​ដោយ​សារ​កម្តៅ។​ អង្គកាយូនីសេហ្វបន្ថែមថា ​សូម​ឱ្យ​កុមារ​ញាំ​​ទឹក​​​ឱ្យ​​​បាន​​​គ្រប់គ្រាន់​ ​និង​ទៀង​ទាត់ និង​ចៀសវាងផ្តល់​ថ្នាំ​ដោយ​មិនបាន​ពិគ្រោះជាមួយអ្នកជំនាញ​។ 

អង្គការ​យូនីសេហ្វបញ្ជាក់​ថា៖​ «កុំ​​ផ្តល់​​ថ្នាំ​​ដល់​​ទារក ដោយ​​​​​មិន​​​បាន​​ពិគ្រោះ​​​ជាមួយ​​​វេជ្ជ​បណ្ឌិ​ត​​បើសិន​​ជា​​​ពួកគេ​​មាន​​​អាការៈ​​​ឡើង​​​កម្តៅ»

អង្គការ​យូនីសេហ្វ​បន្ថែម​​ថា កុំ​​ទុក​​​ទារក ​​និង​​កុមា​រ​​​នៅ​​កន្លែ​ង​បិទ​ជិត និង​​កុំ​​បណ្តោយ​​ឱ្យ​​ពួកគេ​​លេង​​នៅ​​ខាង​ក្រៅ។ នៅ​ពេល​​​​កុមា​រ​​​ហាត់ប្រាណ ឬ​​លេង​​​នៅ​​​ក្រោម​​​សីតុណ្ហភាព​​​ខាងក្រៅ​​ត្រូវ​​ឱ្យ​​​ពួកគេ​​​សម្រាក​​ជារៀងរាល់ ៣០នាទីម្តង។

ការចេញសាររបស់អង្គការ​យូនីសេហ្វធ្វើ​ឡើង​ខណៈដែល​កម្ពុជា​​​​កំពុង​ប្រឈម​នឹង​ការកើន​កម្តៅ​​ខ្លាំង​​​​​​​​ក្នុង​អំឡុង​រដូវប្រាំងនេះ។

​​​​បើតាម​សេចក្ដីជូនដំណឹងរបស់ក្រសួងធនធានទឹក និងឧតុនិយម​ស្តីពីការព្យាករ​អាកាសធាតុ​លើកទី​២​សម្រាប់​រដូវ​ប្រាំង​ពីខែ​មីនា ដល់ដើមរដូវវស្សា​​​​ ខែឧសភា ឆ្នាំ​២០២៤​ បញ្ជាក់ថា ធាតុភូត​សកល​ក្នុង​រយៈពេល​ពី​ខែមីនា ដល់ខែមេសា​ ឆ្នាំ២០២៤ នេះ​នឹង​មាន​អត្រា​បាតុភូត​អែលនីណូ (EI Nino) ខ្ពស់​ជាង​​៧០% ដែលបណ្តាលឱ្យ​សីតុណ្ហភាព​នៅ​ទូទាំង​ប្រទេស​​​ឡើង​ខ្ពស់​ជាង​​មធ្យមភាគ​ច្រើនឆ្នាំ ដែល​ជាកត្តា​ដែល​ធ្វើ​ឱ្យ​អាកាសធាតុ​ក្តៅ ហើយ​ស្ងួត៕

ពលរដ្ឋនៅ​បឹងតាមោក ស្នើព្រះ​មហាក្សត្រជួយអន្តរាគមន៍ឱ្យពួកគាត់​មាន​សិទ្ធិ​រស់នៅ​លើ​ដីធ្លី​របស់​ខ្លួន

ប្រជាពលរដ្ឋ​រស់នៅបឹង​តាមោក ​និងក្រុមយុវជន​ប្រមាណ ១០០​នាក់ បាននាំគ្នាយក​ញត្តិទៅដាក់នៅព្រះបរមរាជវាំង កាលពីរសៀល​ថ្ងៃចន្ទម្សិលមិញ ដើម្បីស្នើសុំព្រះរាជអន្តរាគមន៍ពីព្រះមហាក្សត្រ ទៅកាន់អាជ្ញាធរឱ្យមាន​ការ​​ដោះស្រាយវិវាទដីធ្លី និង​ផ្តល់​​កម្មសិទ្ធិ​ដីធ្លីដល់ពួកគាត់។

អ្នកស្រី ស៊ា ដាវី ជាប្រជា​ពលរដ្ឋរស់នៅតំបន់​បឹងតាមោក បានឱ្យដឹងថា កាលដែលពួកគាត់​នាំគ្នាទៅដាក់ញត្តិ​ថ្វាយព្រះមហាក្សត្រ ដើម្បីសុំព្រះរាជអន្តរាគមន៍នេះ ដោយសារតែពួកគាត់មានការបាមរ្ភពីការបណ្តេញ​ចេញ​ដោយបង្ខំ ក្រោយពី​អាជ្ញាធរ​ខណ្ឌ​ព្រែកព្នៅ កាលពីអំឡុងខែកុម្ភៈកន្លងទៅនេះ បានជូនដំណឹងឱ្យ​ពួកគាត់រុះរើផ្ទះចេញពីទីតាំងដែលកំពុងរស់នៅសព្វថ្ងៃ។

អ្នកស្រីមានប្រសាសន៍ថា៖ «គោលបំណងពួកខ្ញុំគឺសុំសិទ្ធិរស់នៅ និងកានកាប់ដីធ្លីពួកខ្ញុំរស់នៅតាំងពីឆ្នាំ៩០[១៩៩០] រហូត​មក ហើយ​ឥលូវ​នេះ​បែរជា​អាជ្ញាធរ​ខណ្ឌ​ព្រែក​ព្នៅ ចេញលិខិតឱ្យពួកខ្ញុំរុះរើលំនៅឋាន​វិញ ចឹង​ពួកខ្ញុំអត់មាន​ជម្រើស​អ្វីក្រៅពីមកព្រះ​បរមរាជវាំង សុំព្រះករុណា[ព្រះមហាក្សត្រ​​] ឱ្យព្រះអង្គជួយអន្តរាគមន៍ សុំសិទ្ធិរស់នៅលើដីលំនៅឋាន​ពួកខ្ញុំ»។

ប្រជាពលរដ្ឋ​​នៅតំបន់តាមោកម្នាក់ទៀត អ្នកស្រី ឌី សាវឿន ដែលអះអាងថាបានរស់នៅទីនោះ​រយៈពេល ៣០ឆ្នាំ​មក​ហើយ បាន​លើកឡើង​ថា អ្នកស្រី​ចង់​បានតែ​ទីជម្រកសម្រាប់រស់នៅ​ប៉ុណ្ណោះ ពីព្រោះពេលនេះបឹង​តាមោក ត្រូវបានអាជ្ញាធរលុបអស់ហើយ​។​

អ្នកស្រីថ្លែងថា៖ «ខ្ញុំគ្មានចង់បានអ្វីក្រៅពីដី និង​ផ្ទះសម្បែង​ទេ ព្រោះបើពួកគាត់ដេញពួកខ្ញុំចេញ ពួកខ្ញុំគ្មានជម្រកទេ ព្រោះខ្ញុំគ្មានដីគ្មានអីទេ មានតែដីហ្នឹងហើយ[] សូមឱ្យគាត់[ព្រះមហាក្សត្រ​​] ជួយ​ប្រជាពលរដ្ឋ​ក្រីក្រដែល​រស់លំបាក​នៅទី​នេះ ដែល​គ្មាន​​​ក្តី​​សង្ឃឹម​ ឥលូវ​នេះ​ពួក​គាត់​លុប​បឹង​អស់​​ហើយ ហើយពួកខ្ញុំគ្មានអ្វីជាទីពឹង សុំតែកន្លែងជាទីជម្រក សុំផ្តល់សិទ្ធិ ផ្តល់​កម្ម​សិទ្ធិ ផ្តល់ប្លង់ និងសៀវភៅគ្រួសារ​ដល់​ពួកខ្ញុំ​ក្នុងសហគមន៍ហ្នឹង»។

កញ្ញា រៀម ស្រីពេជ្ររតនា ដែលជាយុវជនចូលរួមដាក់ញត្តិជាមួយនឹងពលរដ្ឋបឹងតាមោក បានលើកឡើង​ថា ការដែលរូបគាត់ចូលរួមដើរថ្មើរជើងពីផ្សាររាត្រី ទៅដាក់ញត្តិជាមួយប្រជាពលរដ្ឋបឹងតាមោក នៅព្រះបរម​រាជវាំងនេះ ដោយសារតែ​កញ្ញាមើលឃើញពីទុក្ខលំបាករបស់ពលរដ្ឋ ដែលរងគ្រោះដោយសារបញ្ហា​ដីធ្លី។

កញ្ញាមានប្រសាសន៍ថា៖ «យើងនៅក្នុងប្រទេសតែមួយ បើកាលណាជួបបញ្ហា យើងបិទភ្នែកថ្ងៃក្រោយបញ្ហាហ្នឹង នឹងធ្លាក់មកលើយើងដែរ ហើយការរំលោភបំពានសិទ្ធិមនុស្ស​នេះ បើថ្ងៃក្រោយរំលោភបំពានសិទ្ធិមនុស្សបាន យើងកុំព្រួយឱ្យសោះថាយើងមិនបានជួប យើងត្រូវតែបានជួបដូចពួកគាត់ដែរ»។

កញ្ញាថា ការបណ្ដេញប្រជាពលរដ្ឋចេញពីផ្ទះរបស់ពួកគាត់ជារឿងពុំគួរគប្បី ព្រោះប្រជាពលរដ្ឋមិនចង់​បាន​អ្វីក្រៅ​ពី​ដំណោះស្រាយ និងយុត្តិធម៌សម្រាប់ខ្លួនឯងនោះទេ។​

Newsroom Cambodia មិនអាចសុំការឆ្លើយតប​ពីខាងក្រសួងព្រះបរមរាជវាំងបានទេ នៅថ្ងៃអង្គារនេះ។

ចំណែក អភិបាលខណ្ឌព្រែកព្នៅ លោក ធឹម សំអាន មានប្រសាសន៍​ថា អាជ្ញាធរបានរៀបចំដីស្របច្បាប់ជូនពួកគាត់រួចរាល់ហើយ ដោយក្នុងមួយគ្រួសារទទួលបានដីទំហំ ៤ម៉ែត្រកន្លះគុណនឹង១៨ម៉ែត្រ​។ លោកបន្តថា អ្វីដែលពលរដ្ឋត្រូវការមានទាំងអស់ ទាំងសៀវភៅគ្រួសារ សៀវភៅស្នាក់នៅ និងអត្តសញ្ញាណប័ណ្ណជាដើម​។

លោកបញ្ជាក់ថា៖ «អាជ្ញាធរអត់មានទុកគាត់នៅដោយឡែកទេ អាជ្ញាធរនៅជិតគាត់ បម្រើ​ប្រជាពលរដ្ឋ តែបើគាត់ចង់បានអ្វីឱ្យច្បាស់ បើចង់​បាន​នៅទីនេះគឺមិនបានទេ ព្រោះជាកម្មសិទ្ធិរបស់គេ បើចង់បានច្បាស់មានតែដី៤ម៉ែត្រកន្លះ គុណនឹង​១៨ម៉ែត្រ ធ្វើកម្មសិទ្ធិ​ស្របច្បាប់​ជូន​គាត់ ជូន​ថវិការ ១០ ០០០​ដុល្លាទៀត […] បងនៅតែសំណូម​ពរបើកជើង​មេឃ​ចំហ ទាំងពេលយប់ក៏បងនៅតែធ្វើការឱ្យគាត់ដែរ ឱ្យតែមកយកដីហ្នឹង នៅជិតតែម្តង នៅផ្លូវហ្នឹងតែម្តង បានរៀបចំហេដ្ឋារចនាសម្ព័ន្ធរួចហើយ ទឹក​ភ្លើង លូមានរួចអស់ហើយ»។

កាលពីថ្ងៃទី១៩ ខែកុម្ភៈ ឆ្នាំ២០២៤ រដ្ឋបាលខណ្ឌព្រែកព្នៅ បាន​ចេញលិខិត​ជូនដំណឹង​មួយ ដោយប្រាប់​ប្រជា​ពលរដ្ឋ​ដែល​កំពុង​អាស្រ័យផល​លើ​ដី​របស់​រដ្ឋ ស្ថិតក្នុងបឹងតាមោក ដូច​ជា ការចិញ្ចឹមត្រី ការសង់ រោង-តូបយាមចាំដី ឃ្លាំង ដាក់សម្ភារៈផ្សេងៗ និងសំណង់មិនរៀបរយនានា ហើយត្រូវ​បញ្ឈប់​ការ​ចិញ្ចឹមត្រី និង​រុះរើ​សំណង់​គ្រប់​ប្រភេទ ឱ្យ​​បានឆាប់បំផុត ដើម្បីរដ្ឋបាលខណ្ឌ​ចាប់ផ្តើមអនុវត្តគម្រោងអភិវឌ្ឍន៍ប្រឡាយ​មេរំដោះ​​ទឹក សម្រាប់ជាប្រយោជន៍សាធារណៈ។

សេចក្តីប្រកាសបន្ថែមថា ក្នុង​ពេល​ឆាប់ៗ​ខាង​មុខ​នេះ រដ្ឋបាលខណ្ឌ នឹង​ដំណើរការ​​កាយ​ប្រឡាយបន្ត ដោយមិនទទួលខុសត្រូវ លើការខូចខាត-បាត់បង់ទ្រព្យសម្បត្តិ ឬសម្ភារៈរបស់​ពលរដ្ឋទាំងនោះឡើយ។

នាយក​ទទួល​បន្ទុក​កិច្ចការទូទៅនៃអង្គការសិទ្ធិមនុស្ស​លីកាដូ លោក អំ សំអាត មានប្រសាសន៍​ថា បើ​យោងតាម​រដ្ឋ​ធម្មនុញ្ញ ច្បាប់ជាតិ និងច្បាប់អន្តរជាតិ ពលរដ្ឋមានសិទ្ធិដាក់សំណើរទៅស្ថាប័នព្រះមហាក្សត្រ ស្ថាប័ន​រដ្ឋ និង​អាជ្ញាធរជាដើម​ ដើម្បីស្វែងរក​ព្រះរាជអន្តរាគមន៍ និងការអន្តរាគមន៍ឱ្យមានដំណោះស្រាយ​។​

លោក​យល់ថា អាជ្ញាធរ គួរពិនិត្យមើលលើការស្រាវជ្រាវ និងការវាយតម្លៃជាក់ស្តែង ហើយគួរដោះស្រាយដោយរៀបចំកាត់ដី និងផ្តល់កម្មសិទ្ធិជូនសហគមន៍ ដោយសារកន្លងមក រាជរដ្ឋាភិបាល​ ក៏បាន​កាត់​ផ្ទៃដីបឹង​តាមោក ផ្តល់ជាកម្មសិទ្ធិ​ឱ្យស្ថាប័នរដ្ឋ ឯកជន និងក្រុមហ៊ុនជាច្រើន​មកហើយដែរ។

លោកថ្លែងថា៖ «សហគមន៍ និងអាជ្ញាធរហាក់ដូចមិនមានទំនុកចិត្តនឹងគ្នា ដូច្នេះហើយកាលពីម្សិលមិញ ស្រាប់តែឃើញសហគមន៍យកញត្តិទៅដាក់ថ្វាយស្ថាប័នព្រះមហាក្សត្រ ដើម្បីសុំព្រះរាជអន្តរាគមន៍សហគមន៍ដីធ្លីនៅសង្កាត់សំរោងក្រោម បឹងតាមោក ខណ្ឌព្រែកព្នៅ មានបញ្ហាដីធ្លីនេះ គឺចង់​ក្លាយ​ជា​បញ្ហារ៉ាំរ៉ៃ ដែលកន្លងមកយើង​​មើល​ឃើញថា មានតំណាងសហគមន៍ជាច្រើនរូបកំពុងជាប់បណ្តឹងនៅតុលាការ និងមានការប្រឈមមុខដាក់គ្នារវាងអាជ្ញាធរ និង​សហគមន៍ផងដែរ»។

កាល​ពី​ថ្ងៃ​ទី២៥ ​ខែ​មករា ​ឆ្នាំ​២០២៤ ​ក្រុម​សង្គម​ស៊ីវិល​ និង​សមាគម​អង្គការ​មិន​មែន​រដ្ឋាភិបាល ​និង​សហគមន៍​មូលដ្ឋាន​ចំនួន​ ៣៨​ស្ថាប័ន ​បាន​ចេញ​សេចក្តី​ថ្លែង​ការណ៍​មួយ ​ដោយ​ស្នើ​«បញ្ឈប់​ការ​ធ្វើ​ទុក្ខបុក​ម្នេញ ​គំរាម​កំហែង​ និង​ផ្ដល់​ការ​កាន់​កាប់​ដីធ្លី​ស្រប​ច្បាប់​ជូន​ប្រជា​សហគមន៍​សំរោង​ត្បូង»។​ សេចក្តី​ថ្លែង​ការណ៍​រួម​នេះ​លើក​ឡើង​ថា​ សហគមន៍​សំរោង​ត្បូង ​មិន​ស្ថិត​នៅ​ក្នុង​អនុក្រឹត្យ​នៃ​ការ​កំណត់​ផ្ទៃ​បឹង​នេះ​ទេ​ ហើយ​ក៏​មិន​ប៉ះពាល់​ដល់​កា​រពង្រីក​ផ្លូវ​ទាំង​ស្រុង​នោះ​ដែរ។​

ប្រភពដដែល បន្តថា បច្ចុប្បន្ន​នេះ ​ប្រជា​ពល​រដ្ឋ​សំរោង​ត្បូង​ចំនួន ​១៨​នាក់ ​កំពុង​រង​បណ្តឹង​តុលាការ ​ក្រោម​បទ​ចោទ​ ហិង្សា​ដោយ​ចេតនា ​និង​ប្រឆាំង​នឹង​អ្នក​រាជការ​សាធារណៈ​មាន​ស្ថាន​ទម្ងន់​ទោស ខណៈ​​ពលរដ្ឋ​ម្នាក់​បាន​រត់​គេច​ខ្លួន ​ដោយ​ព្រួយ​បារម្ភ​ពី​សុវត្ថិភាព។ ​ សង្គមស៊ីវិលទាំងនោះបន្តទៀតថា ចាប់​តាំង​ពី​ឆ្នាំ​២០១៩​ មក​ សហគមន៍​បាន​ស្វែង​រក​កិច្ច​អន្តរាគមន៍​ពី​ស្ថាប័ន​​ជាតិ​​នានា ​ដូច​ជា ​សាលា​សង្កាត់​សំរោង​ត្បូង ​សាលា​ខណ្ឌព្រែក​ព្នៅ ​សាលា​រាជធានី​ភ្នំពេញ ​ខុទ្ទកាល័យ​​នាយក​​រដ្ឋមន្ត្រី ​ព្រឹទ្ធ​សភា ​និង​ក្រសួង​រៀបចំ​ដែនដី​នគរូប​នីយកម្ម ​និង​សំណង់​ជាដើម ប៉ុន្តែ​នៅ​មិនទាន់​​មាន​ដំណោះ​ស្រាយ​នៅ​​ឡើយ ​រហូត​មក​ដល់​ពេល​នេះ៕

Latest News