សិក្ខាសាលាមួយដែលរៀបចំឡើងដោយអង្គការ UNDP កាលពីថ្ងៃសៅរ៍ រកឃើញថា យុវជននៅប្រទេសកម្ពុជាគួរតែស្វែងរកការធ្វើកម្មសិក្សា ខណៈដែលឱកាសការងារបានធ្លាក់ចុះ៨០ភាគរយក្នុងទីផ្សារការងារអំឡុងពេលកើតមានជំងឺកូវីដ១៩។
សិក្ខាសាលានោះធ្វើឡើងតាមប្រព័ន្ធអ៊ីនធឺណិតក្រោមប្រធានបទ «យុវជន និងទីផ្សារការងារក្នុងអំឡុងពេល និងក្រោយពេលជំងឺកូវីដ១៩» ត្រូវបានផ្សព្វផ្សាយតាមទំព័រហ្វេសប៊ុកហ្វេសប៊ុករបស់ UNDP ដោយមានអ្នកចូលមើលជាង៣,០០០ នាក់ គិតត្រឹមរសៀលថ្ងៃសៅរ៍នេះ។
លោក គី សិរីវុទ្ធ ទីប្រឹក្សាក្រសួងការងារ និងជាអ្នកវិភាគស្ថិតិនៅទីភ្នាក់ងារជាតិមុខរបរ និងការងារ លើកឡើងថា ដំណឹងជ្រើសរើសបុគ្គលិកដែលទីភ្នាក់ងារនេះប្រមូលបាន មានការធ្លាក់ចុះចាប់តាំងពីការផ្ទុះឡើងនៃជំងឺកូវីដ១៩។
លោក គី សិរីវុទ្ធ បានថ្លែងថា៖ «ទីភ្នាក់ងារជាតិមុខរបរ និងការងារ បានប្រមូលដំណឹងជ្រើសរើសបុគ្គលិកចំនួនប្រហែល៥ម៉ឺនដំណឹងក្នុងមួយខែ នៅលើគេហទំព័រទីភ្នាក់ងារជាតិ។ ប៉ុន្តែឥឡូវនេះយើងប្រមូលបានតែ១ម៉ឺនដំណឹងប៉ុណ្ណោះ»។
លោកបន្តថា ការធ្លាក់ចុះភាគច្រើនស្ថិតក្នុងវិស័យកាត់ដេរ ដោយសារតែជំងឺកូវីដ១៩បានធ្វើឱ្យមានការបិទការនាំចេញទៅក្រៅប្រទេស ពិសេសវិស័យទេសចរណ៍ និងសេវាកម្ម។
លោកបញ្ជាក់ថា៖ «យើងដឹងថាវិស័យកាត់ដេរមានបញ្ហា ដូច្នេះដំណឹងជ្រើសរើសបុគ្គលិកមានតិច»។
លោក គី សិរីវុទ្ធ បន្ថែមថា ដំណឹងជ្រើសរើសបុគ្គលិកលើវិស័យហិរញ្ញវត្ថុរងផលប៉ះពាល់តិចតួច ខណៈដែលក្រសួងការងារកំពុងធ្វើការបណ្តុះបណ្តាលនៅតាមរោងចក្រ ជាពិសេសជំនាញទន់ទៅដល់រោងចក្រនីមួយៗ។
លោកបន្ថែមថា៖ «ឥឡូវនេះយើងមានការបណ្តុះបណ្តាលជាច្រើននៅរោងចក្រទាំងនៅភ្នំពេញ និងក្រុងព្រះសីហនុ»។
កម្ពុជារកឃើញកើតមានជំងឺកូវីដ១៩ជាលើកដំបូងកាលពីថ្ងៃទី២៧ ខែមករា ឆ្នាំ២០២០។ គិតត្រឹមថ្ងៃទី១៧ ខែមិថុនានេះ កម្ពុជាមានករណីឆ្លងជំងឺកូវីដ១៩សរុប ចំនួន១២៩នាក់ ក្នុងនោះអ្នកជាសះស្បើយចំនួន១២៦នាក់ និងអ្នកកំពុងសម្រាកព្យាបាលចំនួន៣នាក់។
ចាប់តាំងពីមានការកើតមានករណីឆ្លងជំងឺកូវីដ១៩មក រោងចក្រជាច្រើនត្រូវបានព្យួរការងារដោយសារមិនមានអ្នកបញ្ជាទិញ ចំណែកវិស័យភោជនីយដ្ឋាន និងវិស័យផ្សេងៗមួយចំនួនទៀតក៏ត្រូវបានបិទ និងផ្អាកជាបណ្តោះអាសន្ន។
អ្នកស្រី ស៊ូ សុជាតា អ្នកសម្របសម្រួលរបស់អង្គការអន្តរជាតិខាងការងារ (ILO) សម្រាប់កម្មវិធីការងារសមរម្យដល់យុវជនបាននិយាយថា បើតាមការស្ទង់មតិរបស់ ILO នាពេលថ្មីៗនេះ យុវជនប្រមាណជា ១០,៧ភាគរយបានប្តូរពីធ្វើការងារពេញម៉ោងនៅត្រីមាសទី៤ កាលពីឆ្នាំមុន ទៅធ្វើការក្រៅម៉ោងនៅក្នុងត្រីមាសទីមួយនៃឆ្នាំ២០២០នេះ ។
អ្នកស្រី សុជាតា បានឲ្យដឹងថា ដោយសារតែការកើតមានជំងឺកូវីដ១៩នេះ ទើបមានការកាត់បន្ថយការងារពេញម៉ោងចំនួន៣០៥លានការងារ ដោយបានប្តូរមកធ្វើការក្រៅម៉ោងក្នុងចំណោមអត្រាសម្រាប់រយៈពេល៣ខែ ដើមឆ្នាំ២០២០នេះ។
អ្នកស្រីថ្លែងថា៖ «យើងមិនទាន់មានចំនួនជាក់លាក់ណាមួយថាតើមានយុវជនប៉ុន្មាននាក់ដែលគ្មានការងារធ្វើនោះទេ ប៉ុន្តែបើយោងតាមការស្ទង់មតិរបស់អង្គការ ILO យុវជនដែលធ្លាប់ធ្វើការពេញម៉ោងពីមុន ឥឡូវនេះពួកគេធ្វើការក្រៅម៉ោងដោយសារតែតម្រូវការថយចុះ»។
អ្នកស្រី សុជាតា បន្ថែមថា ការងារបែបសេដ្ឋកិច្ចក្រៅប្រព័ន្ធនៅកម្ពុជា អាចនឹងប្រឈមបញ្ហាកាន់តែអាក្រក់ជាងតួលេខផ្លូវការដែលបានបង្ហាញ។
អ្នកស្រី សុជាតា បញ្ជាក់ថា៖ «ចំនួនប្រជាជនដែលរងផលប៉ះពាល់គឺច្រើនជាងរដ្ឋាភិបាលផ្តល់ឲ្យ ទោះបីជារដ្ឋាភិបាលមានគោលនយោបាយល្អក៏ដោយ ក៏អ្នកនៅក្នុងសេដ្ឋកិច្ចក្រៅផ្លូវការមិនមានទិន្នន័យជាក់លាក់ណាមួយក្នុងការកំណត់ចំនួនពួកគេឡើយ» ។
អ្នកស្រីស្នើឱ្យរដ្ឋាភិបាលបន្តជួយកម្មករ ជាពិសេសស្ត្រី និងអ្នកដែលស្ថិតក្នុងសេដ្ឋកិច្ចក្រៅផ្លូវការ។
អ្នកស្រីថា៖ «វាជាការលំបាកសម្រាប់យើងក្នុងការផ្តល់ការផ្គត់ផ្គង់គ្រប់គ្រាន់ដល់ពួកគេ»។
បើតាមអ្នកស្រី សុជាតា ជារៀងរាល់ឆ្នាំ យុវជនជាមធ្យមប្រហែល១៦ម៉ឺននាក់បានចូលមកក្នុងទីផ្សារការងាររបស់ម្ពុជា។
កញ្ញា ប៉ែន រ៉ានី ជំនួយការតំណាង UNDP ប្រចាំកម្ពុជាដែលបានរៀបចំកិច្ចពិភាក្សានេះនិយាយថា យុវជនដែលផ្លាស់ប្តូរការងារថ្មី ឬកំពុងស្វែងរកការងារដំបូងគឺងាយនឹងរងផលប៉ះពាល់ពីការធ្លាក់ចុះនៃទីផ្សារការងារ។
កញ្ញាបញ្ជាក់ថា៖ «មុនពេលកូវីដ១៩ ពួកគេបានជួបការលំបាកក្នុងការស្វែងរកការងារធ្វើរួចទៅហើយ ប៉ុន្តែនៅអំឡុងពេលកូវីដ១៩នេះ វាកាន់តែពិបាកសម្រាប់ពួកគេក្នុងការស្វែងរកការងារ ពីព្រោះក្រុមហ៊ុនមួយចំនួនបានបញ្ឈប់ការជ្រើសរើសបុគ្គលិក និងខ្លះទៀតបានផ្អាកទទួលពាក្យ»។
កញ្ញា រ៉ានី បានបន្ថែមថា យុវជនគួរតែងាកទៅរកការធ្វើកម្មសិក្សា ដើម្បីទទួលបានបទពិសោធន៍ខ្លះដែលអាចជួយឱ្យពួកគេមានការងារល្អនាពេលអនាគត។
អ្នកនាំពាក្យក្រសួងការងារលោក ហេង សួរ បានប្រាប់សារព័ត៌មាន CCIM តាមបណ្តាញសង្គមតេលេក្រាមកាលពីថ្ងៃទី១១ ខែមិថុនាថា រដ្ឋាភិបាលបាននិងកំពុងធ្វើអន្តរាគមន៍ និងមានកញ្ចប់ថវិកា ដូចជាការបង្កើតការងារសហគមន៍សម្រាប់អ្នកអត់ការងារធ្វើ និងជួយក្រុមគ្រួសារក្រីក្រ និងពលករចំណាកស្រុកដែលវិលត្រឡប់អំឡុងពេលមានជំងឺរាតត្បាតនេះ។ យោងតាមរបាយការណ៍របស់ធនាគារពិភពលោក ជំងឺកូវីដ១៩បានធ្វើឱ្យប៉ះពាល់ដល់កត្តាជំរុញកំណើនសេដ្ឋកិច្ចដ៏សំខាន់របស់ប្រទេសកម្ពុជា គឺវិស័យទេសចរណ៍ ផលិតកម្ម និងសំណង់។ វិស័យទាំងបីរួមគ្នាមានជាង៧០ភាគរយនៃកំណើនសេដ្ឋកិច្ចរបស់ប្រទេស និងជិត៤០ភាគរយនៃការងារដែលទទួលប្រាក់ខែ ដោយអះអាងថា វិបត្តិនេះបង្កការគំរាមកំហែងធំបំផុតដល់ការអភិវឌ្ឍរបស់ប្រទេសកម្ពុជាក្នុងរយៈពេល ៣០ឆ្នាំ៕
