ការបោះឆ្នោតជ្រើសតាំងតំណារាស្រ្តសម្រាប់នីតិកាលទី៧ កាន់តែខិតជិតមកដល់ហើយ គណបក្សមួយចំនួនក៏បានត្រៀមខ្លួនដើម្បីចូលរួមក្នុងការបោះឆ្នោតជ្រើសតាំងតំណាងរាស្ត្រសម្រាប់ឆ្នាំ២០២៣នេះ។
រដ្ឋាភិបាលកម្ពុជាបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាកាលបរិច្ឆេទនៃការបោះឆ្នោតជ្រើសតាំងតំណាងរាស្រ្តសម្រាប់នីតិកាលទី៧ នៃរដ្ឋសភា។ ប៉ុន្តែទោះបីជាយ៉ាងនេះក្តីក៏ប្រជាពលរដ្ឋ និងអ្នកតាមដានស្ថានភាពសង្គមនយោបាយមួយចំនួននៅតែសម្តែងការយល់ឃើញរបស់ពួកគាត់ថាតើដំណើរការណ៍នៃការបោះឆ្នោតនាពេលខាងមុខនេះនឹងប្រកបដោយសេរីនិងយុត្តិធម៌ដែរឬទេ? 
លោក វណ្ណ ប៊ុនណា សហស្ថាបនិកនៃ The Thinker Cambodia និងជាអតីតនិស្សិតបរិញ្ញាបត្រជំនាញទំនាក់ទំនងអន្តរជាតិ អតីតនិស្សិតបរិញ្ញាបត្រជាន់ខ្ពស់វិទ្យាសាស្ត្រនយោបាយនៅប្រទេសឥណ្ឌា និងបច្ចុប្បន្នជាអ្នកសិក្សាស្រាវជ្រាវមួយរូបនៅវិទ្យាស្ថានខ្មែរសំរាប់សហប្រតិបត្តិការនិងសន្តិភាព បានផ្តល់កិច្ចសម្ភាសន៍ឲ្យ Newsroom Cambodia ពីការយល់ឃើញរបស់លោកពីស្ថានភាពនយោបាយបច្ចុប្បន្ននៅកម្ពុជាមុនពេលការបោះឆ្នោតជ្រើសតាំងតំណាងរាស្រ្តសម្រាប់នីតិកាលទី៧ និងថាតើកម្ពុជានឹងខាតបង់អ្វីខ្លះប្រសិនដំណើរការបោះឆ្នោតមិនប្រកបដោយ សេរី តម្លាភាព និងយុត្តិធម៌។
ដើម្បីជ្រាបកាន់តែច្បាស់ជួបជាមួលោក វណ្ណ ប៊ុណ្ណា ដូចតទៅ៖
Q: តើលោកយល់ឃើញបែបណាចំពោះស្ថានភាពនយោបាយបច្ចុប្បន្ននេះមុនពេលបោះឆ្នោតជ្រើសតាំងតំណាងរាស្រ្តនីតិកាលទី៧? 
A: បាទ! និយាយរួមបើតាមការវិវត្តន៍ថ្មីៗនេះ ទិដ្ឋភាពនយោបាយកម្ពុជាមុនពេលការបោះឆ្នោតគឺវាមិនមានភាពល្អប្រសើរទេ វានឹងមានការធ្វើទុក្ខបុកម្នេញ ឬរឹតត្បិតផ្នែកនយោបាយនៅតែបន្តទៀតផងដែរ។ ពិសេសមានការចោទប្រកាន់តាមប្រព័ន្ធតុលាការ អាចប្រើប្រាស់អំពើហិង្សានិងរឹតត្បិតចំពោះអ្នកចូលរួមក្នុងសកម្មភាពនយោបាយផងដែរ។ នេះវាគឺជាទិដ្ឋភាពនយោបាយមុនការបោះឆ្នោតនាពេលខាងមុខនេះ។
Q: តើលោកគិតថាការបោះឆ្នោតនឹងមានតម្លាភាពនិងយុត្តិធម៌សម្រាប់គណបក្សដែលចូលរួមដែរឬទេ? 
A: ទាក់ទងនឹងសំណួរទី២ យើងពិបាកទាយថា តើវាអាចមានការបោះឆ្នោតហ្នឹងដោយតម្លភាព និងយុត្តិធម៌សម្រាប់គណបក្សនយោបាយទាំងអស់ដែរអត់។ ដោយសារតែប្រសិនបើយើងគិតពីភាពតម្លាភាព និងយុត្តិធម៌ទាល់តែគណបក្សនយោបាយទាំងអស់ មានឱកាសក្នុងការចូលរួមក្នុងការឃោសនាបោះឆ្នោតធ្វើសកម្មភាពនយោបាយនិងបានស្មើៗគ្នា ដែលមានន័យថា គណបក្សកាន់អំណាចអាចឃោសនានៅកន្លែងណាបានគណបក្សប្រឆាំងអាចឃោសនានៅកន្លែងនោះបានដែរ។ 
ប៉ុន្តែសំខាន់ជារួម យើងមើលឃើញថាមកដល់ពេលនេះគណបក្សប្រឆាំងគឺគាត់បានពិបាកក្នុងការស្វែងរកទីតាំងជួលសម្រាប់ធ្វើសកម្មភាពនយោបាយរបស់គាត់ ជាពិសេសធ្វើកម្មវិធីនានាផងដែរ។ ហើយមួយវិញទៀត ពីភាពមានតម្លាភាពសម្រាប់គណបក្សទាំងនោះវាមានភាគរយតិចណាស់ដែលអាចកើតមាន។
Q: តើលោកយល់យ៉ាងណាដែរចំពោះការលើកឡើងរបស់គណបក្សមួយដែលបានលើកឡើងថា បើបរិយាកាសបោះឆ្នោតនាពេលខាងមុខពោរពេញដោយភាពភ័យខ្លាចនោះកម្ពុជានឹងខាតប្រយោជន៍ច្រើន? 
A: ជាការពិតនៅពេលណាកម្ពុជាមានបរិយាកាសនៃការបោះឆ្នោតពោរពេញទៅដោយភាពខ្លាចចឹងវាធ្វើឲ្យប៉ះពាល់ដល់កម្ពុជា
ទី១៖ វាធ្វើឲ្យការបោះឆ្នោតមិនបង្ហាញអំពីការការបោះឆ្នោតដែលកើតចេញពីឆន្ទៈរបស់ប្រជាពលរដ្ឋ ច៊ឹងទេក្នុងនាមជាប្រជាពលរដ្ឋមិនបានបញ្ចេញសិទ្ធិរបស់ពួកគាត់ក្នុងការរើសអ្នកតំណាងទៅតាមអ្វីដែលជាឆន្ទៈរបស់ពួកគាត់។ ហើយវាធ្វើឱ្យគណបក្សក្រៅរដ្ឋាភិបាលពិបាកក្នុងការប្រកួតប្រជែងដូចជាការធ្វើសកម្មភាពដើម្បីបម្រើផលប្រយោជន៍ដល់ប្រជាជន។
ទី២៖ វាប៉ះពាល់ទៅដល់លទ្ធិប្រជាធិបតេយ្យនៅកម្ពុជាដែលមានចែងនៅក្នុងរដ្ឋធម្មនុញ្ញប៉ះពាល់ដល់របបគ្រប់គ្រងនយោបាយនៅកម្ពុជា ដោយសារលទ្ធិប្រជាធិបតេយ្យតម្រូវឲ្យមានការបោះឆ្នោតប្រកបដោយសេរីនិងយុត្តិធម៌កាលណាប្រសិនបើមានការបោះឆ្នោតមួយដែលពោរពេញទៅដោយបរិយាកាសភ័យខ្លាចវាធ្វើឱ្យប៉ះពាល់ទៅដល់ដំណើរការណ៍ប្រជាធិបតេយ្យនៅកម្ពុជា។
ទី៣៖ វាធ្វើឲ្យនយោបាយនៅកម្ពុជាប៉ះពាល់ខ្លាំងដែលជាហេតុធ្វើឱ្យបរទេសជាពិសេសសហភាពអឺរ៉ុប ដូចជាសហរដ្ឋអាមេរិក ពិចារណាដែរពីទណ្ឌកម្មក្នុងការផ្តាច់ប្រព័ន្ធអនុគ្រោះពន្ធនានា ក៏ដូចជាការដាក់ទណ្ឌកម្មទៅលើមន្ត្រីរដ្ឋាភិបាលមួយចំនួនទៀត។ ហើយចំណុចនេះវាធ្វើឲ្យខាតបង់ទាំងផ្នែកសេដ្ឋកិច្ចនិងផ្នែកនយោបាយ។ 
Q: តើលោកយល់ដូចម្តេចដើម្បីឲ្យការបោះឆ្នោតនាពេលខាងមុខប្រកបដោយសេរី តម្លាភាព និងយុត្តិធម៌? 
A: ខ្ញុំគិតថា ដើម្បីឱ្យមានការបោះឆ្នោតប្រកបដោយសេរីនិងយុត្តិធម៌វាកើតចេញចាប់តាំងពីពិនិត្យឡើងវិញនូវច្បាប់បោះឆ្នោត ហើយនឹងសមាសភាពទាក់ទងនិងគណៈកម្មាការរៀបចំការបោះឆ្នោត ដូចជានីតិវិធីក្នុងការបោះឆ្នោត។ ពិសេសដូចជាទិដ្ឋភាពទូទៅនៃនយោបាយកម្ពុជាហើយនិងមុនថ្ងៃបោះឆ្នោតអំពីការធានាឲ្យបាននូវភាពអាចចួលរួមបានពេញលេញពីគណបក្សនយោបាយក៏ដូចជាអ្នកនយោបាយគ្រប់រូបក្នុងដំណើរការណ៍បោះឆ្នោតហ្នឹង៕

អភិបាលរងក្រុងភ្នំពេញ លោក ឃ្លាំង ហួត កាលពីថ្ងៃទី៤ ខែកុម្ភៈ ឆ្នាំ២០២៣ បានអំពាវនាវដល់ម្ចាស់សំណង់ និងម្ចាស់សំណង់បូរីទាំងអស់ឱ្យមានការយកចិត្តទុកដាក់ខ្ពស់លើការសាងសង់ជាពិសេសលើគុណភាពសំណង់។

នៅក្នុងវីដេអូដែលបានបង្ហោះលើបណ្តាញសង្គម Facebook លោកបាននិយាយពីយុវវ័យដែលមកទីក្រុងដើម្បីធ្វើការហើយមានលទ្ធភាពអាចបង់រំលោះ ឬទិញផ្ទះបាន តែគុណភាពសំណង់មិនល្អ ហើយធ្វើឱ្យពួកគេខាត់បង់ប្រាក់បន្ថែមដើម្បីជួសជុលទៅលើកន្លែងដែលមានបញ្ហាទាំងនោះ។

លោកបន្ថែមថា អ្នកដែលចំណេញគឺជាថៅកែសំណង់ឯទុក្ខលំបាក គឺបងប្អូនដែលបានទិញ ឬបង់រំលោះផ្ទះនោះ។

ដោយមើលឃើញពីបញ្ហាទាំងអស់នេះលោកបានប្រកាសរឹតបន្តឹងទៅលើគុណភាពសំណង់ទូទាំងរាជធានីភ្នំពេញ ជាពិសេសត្រូវឱ្យមានការ ត្រួតពិនិត្យរាល់លក្ខណៈទាំងអស់។

លោកបានបញ្ជាក់ថាម្ចាស់សំណង់ និងម្ចាស់សំណង់បូរីត្រូវអនុវត្តដូចជា ត្រូវមានលិខិតអនុញ្ញាតសាងសង់ឱ្យបានត្រឹមត្រូវ និងមិនត្រូវសាងសង់ខុសលិខិតអនុញ្ញាត។ លោកបន្តថាម្ចាស់សំណង់ត្រូវសហការជាមួយក្រុមហ៊ុនសាងសង់ដែលមានអាជ្ញាប័ណ្ណ ពីក្រសួងដែនដី នគរូបនីយកម្ម និងសំណង់ និងត្រូវអនុវត្តតាមគោលការ សុវត្តិភាព។ លោកបានបន្តថា ត្រូវយកចិត្តទុកដាក់ចំពោះ គុណភាពសំណង់ របស់ខ្លួនប្រកបដោយស្មារតីទទួលខុសត្រូវខ្ពស់។

លោកសឹង សែនករុណា អ្នកនាំពាក្យ​សមា​គម​ការពារ​សិទ្ធិ​មនុស្ស​អាដហុក បាននិយាយថារឿងនេះមិនមានអ្វីថ្មីទេ ព្រោះវាជាកិច្ចការរបស់សមត្ថកិច្ចក្នុងការត្រួតពិនិត្យ។ លោកបានលើកឡើងថា វាមិនត្រូវតែជាការអំពាវនាវប៉ុណ្ណោះទេ គឺត្រូវមានការចុះត្រួតពិនិត្យ និងត្រូវមានវិធានការ បើសិនជារកឃើញថាសំណង់ទាំងនោះមិនបានសាងសង់ឱ្យបានត្រឹមត្រូវ។

លោកបន្តថា៖ «ខ្ញុំគិតថាគ្មានអីដែលវាជារឿងមួយប្លែកទេ វាជាកាតព្វកិច្ចរបស់ខាងអាជ្ញាធរដែលពាក់ព័ន្ធទៅនឹងការគ្រប់គ្រប់រដ្ឋបាលមូលដ្ឋានរបស់ខ្លួនហ្នឹងណាស់បាទ»។

ចំពោះការផ្សព្វផ្សាយពីការរឹតបន្តឹងនេះមានការគាំទ្រជាច្រើនពីសំណាក់មហាជនដែលនិយមប្រើប្រាស់បណ្តាញសង្គមហើយមានអ្នកខ្លះបានថ្លែងអំណរគុណចំពោះលោកដែលបានខ្វល់ខ្វាយពីបញ្ហានេះ៕

រដ្ឋាភិបាលកម្ពុជាកាលពីថ្ងៃទី៣០ ខែមករា ឆ្នាំ២០២៣នេះ បានសម្រេចដាក់ចេញនូវវិធានការបន្ថែមជូនវិស័យទេសចរណ៍ក្នុងគោលបំណងបន្តកាត់បន្ថយផលប៉ះពាល់មកលើស្ថានភាពសង្គម-សេដ្ឋកិច្ច ព្រមទាំងបន្តជួយទ្រទ្រង់អាជីវកម្មនិងធុរកិច្ចឲ្យស្តាឡើងវិញ។ ការសម្រេចនេះធ្វើឡើងក្រោមកិច្ចសហការជាមួយវិស័យឯកជននិង ក្រសួងស្ថាប័នពាក់ព័ន្ធរាជរដ្ឋាភិបាល។

តាមរយៈសេចក្ដីប្រកាសព័ត៌មាន រដ្ឋាភិបាលកម្ពុជាបានដាក់ចេញនូវវិធានការបន្ថែមចំនួន ៣ សម្រាប់គ្រប់គ្រងផលប៉ះពាល់ និងគាំទ្រការងើបឡើងវិញនៃវិស័យទេសចរណ៍កម្ពុជាដោយបានលើកលែងការបង់ពន្ធប្រចាំខែគ្រប់ប្រភេទ លើកលែងតែតម្លៃសណ្ឋាគារ, ផ្ទះសំណាក់, និងក្រុមហ៊ុនភ្នាក់ងារទេសចរណ៍ ដែលបានចុះបញ្ចីពន្ធដារ និងមានសកម្មភាពអាជីវកម្មនៅខេត្តសៀមរាបសម្រាប់រយៈពេល ៣ ខែ(មករាដល់មីនា)ឆ្នាំ២០២៣ និងបានសម្រេចបន្តផ្តល់ការសម្របសម្រួលតាមរយៈការបញ្ឈប់តួលេខបំណុលត្រឹមចុងឆ្នាំ២០១៩ និងចំពោះវិស័យទេសចរណ៍ និងមិនគិតការពិន័យសម្រាប់ឆ្នាំ២០២៣ នេះ។

ជាមួយគ្នានេះ រដ្ឋាភិបាល ក៏បានសម្រេចជួយជំរុញអាជីវកម្មក្នុងវិស័យទេសចរណ៍រៀបចំកម្មវិធីអភិវឌ្ឍន៍ជំនាញជូនដល់បុគ្គលិករបស់ខ្លួនដោយខ្លួនឯង និងមានលទ្ធភាពស្នើរសុំប្រាក់កម្ចីពីសំណាក់គម្រោងមូលនិធិ អភិវឌ្ឍន៍ជំនាញ (SDF) តាមការចាំបាច់ផងដែរ។

សេចក្ដីប្រកាសព័ត៌មានដដែលបានឱ្យដឹងថា តាមការសង្កេតរបស់រាជរដ្ឋាភិបាល បានមើលឃើញពីស្ថានភាពសង្គមសេដ្ឋកិច្ចពាណិជ្ជកម្ម, តំបន់និងប្រទេស ទើបរាជរដ្ឋាភិបាលបានសម្រេចដាក់ចេញនូវវិធានការបន្ថែមនេះ ដើម្បីគ្រប់គ្រងនិងគាំទ្រការងើបឡើងវិញនៃវិស័យទេសចរណ៍ក្នុងកាលៈទេសៈដែលគ្មានភាពច្បាស់លាស់នេះ។

លោកស្រី ឆាយ សុីវលីន ប្រធានសមាគមន៍ទេសចរណ៍កម្ពុជាយល់ឃើញថា៖​ «វិធានការដែលរាជរដ្ឋាភិបាលបានបន្ថែមនេះ គឺជារឿងមួយដែលជួយកាត់បន្ថយការចំណាយរបស់អាជីវករទេសចរណ៍ បើទោះបីកម្ពុជាបានបើកទ្វាទេសចរណ៍ជាច្រើនខែមកហើយក៏ពិតមែនប៉ុន្តែ ចំនួនភ្ញៀវដែលមកទស្សនាកម្ពុជានៅមានកម្រិតនៅឡើយដោយចំនួនភ្ញៀវទេសចរបច្ចុប្បន្នមិនទទួលបានពាក់កណ្តាលនៃឆ្នាំ២០១៩នៅឡើយ»។

លោកស្រីបន្តថា វិធានការនេះជាការលើកទឹកចិត្តដល់សេវាករគ្រប់ទីតាំងទេសចរណ៍ដែលបានប្រឹងប្រែងកន្លងមក ហើយនៅថ្ងៃខាងមុខ លោកស្រីរំពឹងថា នឹងទទួលបានភ្ញៀវត្រឡប់មកវិញប្រមាណ ៤លាននាក់ព្រោះ ព្រឹត្តិការណ៍សុីហ្គេម និងការប្រកាសហ្សឺរ៉ូកូវីដ(កូវីដសុន្យ)របស់ប្រទេសចិនដែលជាកត្តាជំរុញដល់កម្ពុជាក្នុងការទទួលបានភ្ញៀវត្រឡប់មកវិញ។

លោកស្រីក៏បានសំណូមពរឲ្យរាជរដ្ឋាភិបាលជួយជំរុញការលក់ផលិតផលក្នុងស្រុកផងដែរ ដូចជាចំណីអាហារ និងវត្ថុអនុស្សវរីយ៍ឬសម្ភារៈប្រើប្រាស់ផ្សេងៗ ដល់ភ្ញៀវទេសចរទាំងនោះ។

សូមរំលឹកថា សកម្មភាពអាជីវកម្មក្នុង គោលដៅទេសចរណ៍ជាច្រើនរួមទាំងរាជធានីភ្នំពេញ, ខេត្តក្នុងតំបន់ឆ្នេរនិងខេត្តមួយចំនួនទៀតគឺមានកំណើនគួរឱ្យកត់សម្គាល់ដោយសារការកើនឡើងយ៉ាងគំហុកនៃភ្ញៀវទេសចរជាតិក៏ដូចជាធុរជននិងវិនិយោគិន។ក្នុងឆ្នាំ២០២១ដល់២០២៣រាជរដ្ឋាភិបាលនឹងបន្តតាមដានយ៉ាងខ្ជាប់ខ្ជួននូវស្ថានភាពនៃវិបត្តិនៃជំងឺកូវី-១៩និងត្រៀមដាក់ចេញនូវវិធានការបន្ថែមទៀតទៅលើការស្ដារនិងជំរុញកំណើនសេដ្ឋកិច្ចជាតិឡើងវិញប្រកបដោយគុណភាព៕

អង្គការតម្លាភាពអន្ដរជាតិបានរកឃើញថាអំពើពុករលួយនៅប្រទេសកម្ពុជានៅក្នុងឆ្នាំ២០២២ មានការថយចុះជាងឆ្នាំ២០២១។

នៅថ្ងៃអង្គាទី៣១ ខែមករា​ឆ្នាំ២០២៣នេះ​ អង្គការតម្លាភាពអន្ដរជាតិបានរកឃើញថាអំពើពុករលួយនៅក្នុងប្រទេសកម្ពុជាសម្រាប់ឆ្នាំ២០២២ មានភាពល្អប្រសើជាងឆ្នាំ២០២១ តែស្ថិតនៅក្នុងក្រុមប្រទេសដែលមានអំពើពុករលួយច្រើនដដែល នេះបើតាមលទ្ធផលស្រាវជ្រាវប្រចាំឆ្នាំស្ដីពីអំពើពុករលួយនៅទូទាំងពិភពលោក។

លទ្ធផលបានរកឃើញថា៖ «ប្រទេសកម្ពុជានៅក្នុងឆ្នាំ២០២២មាន ២៤ពិន្ទុកើនឡើងមួយពិន្ទុ បើធៀបទៅនឹងឆ្នាំ២០២១ កម្ពុជាមាន ២៣ពិន្ទុ ហើយនៅឆ្នាំ២០២១ កម្ពុជាឈរនៅលេខរៀងទី១៥៧ ក្នុងចំណោមប្រទេស១៨០ហើយនៅក្នុងឆ្នាំ២០២២ប្រទេសកម្ពុជាឈរនៅលេខរៀងទី១៥០ក្នុងចំនោមប្រទេស១៨០»។

បើប្រៀបធៀបទៅនឹងប្រទេសក្បែរខាងកម្ពុជាមានដូចជា ថៃ ឡាវ វៀតណាម ប្រទេសកម្ពុជានៅតែមានអំពើពុករលួយច្រើនជាងគេដ៏ដែល ដោយប្រទេសថៃមាន ៣៦ពិន្ទុ ឡាវមាន៣១ពិន្ទុ វៀតណាមមាន៤២ពិន្ទុ តែបើប្រៀបធៀបប្រទេសនៅក្នុងតំបន់អាស៊ានវិញ ប្រទេសកម្ពុជាមានភាពប្រសើជាងប្រទេសមីយ៉ាន់ម៉ា។

អ្នកនាំពាក្យរាជរដ្ឋាភិបាលលោក ផៃ ស៊ីផាន បានប្រាប់NewsroomCambodia ថាលោកពិតជាទទួលស្គាល់ថាមានអំពើពុករលួយ ហើយលោកថាកម្ពុជាក៏មានច្បាប់ប្រឆាំងនឹងអំពើពុករលួយដែលលោកថារដ្ឋាភិបាល ក៏មានវិធានការប្រយុទ្ធប្រឆាំងនឹងអំពើពុករលួយ កែទំរង់ផ្នែករដ្ឋបាល ផ្នែកហិរញ្ញវត្ថុ កិច្ចកែទំរង់គណនេយ្យភាព និងតម្លាភាពដែលជាមួលដ្ឋានគ្រឹះប្រឆាំងអំពើពុករលួយ។

លោកថាការបង់លុយមួយចំនួនគឺធ្វើឡើងតាមប្រពន្ធ័អេលិចត្រូនិច ឬធនាគារ។ លោកលើកឡើងថា៖ «ចំពោះអង្គការតម្លាភាពអន្ដជាតិនោះគេនិយាយតែអំពីបរិមាណ និយាយតែចំនួនពុករលួយ និយាយតែចំណាត់ថ្នាក់អំពើពុករលួយ ក៏ប៉ុន្តែគេអត់បានបង្ហាញអំពីវិធីសាស្រ្ដក្នុងការស្វែងរកអំពើពុករលួយ អាហ្នឹងយើងមិនអាចយល់ស្របតាម ឬមិនអាចវាយតម្លៃថាមិចទេ»។

តែយ៉ាងណាលោកថារដ្ឋាភិបាលធ្វើយ៉ាងមានប្រសិទ្ធភាពរួចស្រេចទៅហើយ លោកថានៅឆ្នាំ២០២៣នេះ ការប្រឆាំងនឹងអំពើពុករលួយ​ និងល្អប្រសើឡើងបន្តិចម្ដងៗ។

លោកបន្ថែម៖ «ជាមួយគ្នានោះដែលអង្គភាពប្រឆាំងអំពើពុករលួយហ្នឹងក្រៅតែពីកំណែទំរងឈរនៅលើតម្លាភាពហ្នឹងគណនេយ្យភាព[…] ក្រសួងសេដ្ឋកិច្ចកែទំរង់យ៉ាងស្រាក់ស្រាំទៅតាមប្រព័ន្ធ»៕

ការិយាល័យអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានប្រកាសថាអតីតបុគ្គលិកក្រុមហ៊ុន ណាហ្គាវើលដ៍មួយចំនួនបានស្នើសុំលោកស ខេង ឧបនាយករដ្ធមន្រ្តី រដ្ធមន្រ្តីក្រសួងមហាផ្ទៃ និងក្រសួងការងារនិងបណ្ដុះបណ្ដាលវិជ្ជាជីវៈឱ្យជួយអន្តរាគមន៍ក្រុមហ៊ុនផ្ដល់ប្រាក់បំណាច់បញ្ចប់កិច្ចសន្យាការងារស្របតាមច្បាប់ស្ដីពីការងារ។

យោងតាមសេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី៣១ ខែមករា ឆ្នាំ២០២៣ បានបញ្ជាក់ថា នាពេលកន្លងមក មន្រ្តីជំនាញរបស់ក្រសួងការងារ និងបណ្ដុះបណ្ដាលវិជ្ជាជីវៈបានធ្វើការពិនិត្យផ្ទៀងផ្ទាត់ការទូទាត់ប្រាក់បំណាច់បញ្ចប់កិច្ចសន្យាការងារជាមួយតំណាងក្រុមហ៊ុនហើយពិនិត្យឃើញថាការទូទាត់ចំនួន ៤ចំណុចគឺបានត្រឹមត្រូវស្របតាមច្បាប់ និងលិខិតបទដ្ធានគតិយុត្តិពាក់ព័ន្ធ និងការបញ្ឈប់ពីការងាររួម។

សេចក្ដីប្រកាសព័ត៌មានដដែល បានបញ្ជាក់ថា៖ «គិតត្រឹមថ្ងៃទី៣១ ខែមករា ឆ្នាំ២០២៣នេះមានអតីតបុគ្គលិកចំនួន ៤រូប បន្ថែមទៀតក្នុងចំណោមអតីតបុគ្គលិកដែលមិនទាន់ឯកភាពទទួលយកការទូទាត់ប្រាក់បំណាច់បញ្ចប់កិច្ចសន្យាបានមកទទួលយកដំណោះស្រាយតាមរយៈការធ្វើលិខិតព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុនរួចហើយ»។

គួរបញ្ជាក់ដែលថា គិតមកដល់ថ្ងៃនេះមានអតីតបុគ្គលិកសរុបចំនួន ២៦២រូប ក្នុងចំណោម ៣៧៣រូប បានយល់ព្រមទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុនដែលធ្វើឱ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម ១១១រួប។

ទីភ្នាក់ងារជាតិមុខរបរ និងការងារ(NEA)នៃក្រសួងការងារនិងបណ្ដុះបណ្ដាលវិជ្ជាជីវៈបានបន្តបញ្ជាក់ថានឹងត្រៀមខ្លួនដើម្បីជួយសម្របសម្រួលពាក់ព័ន្ធនឹងការជួយស្វែងរកការងារថ្មីសម្រាប់បងប្អូនអតីតបុគ្គលិកផងដែរ៕

ប្រធានសមាគមទេសចរណ៍កម្ពុជា លោកស្រី ឆាយ សៀវលីន បានបង្ហាញការពេញចិត្តចំពោះការស្តារឡើងវិញនូវព្រលានយន្តហោះខេត្តបាត់ដំបងក្រោយអភិបាលខេត្តនេះបានលើកឡើងក្នុងសន្និសីទជោគជ័យរយៈពេល ៥ ឆ្នាំរបស់រដ្ឋបាលខេត្តកាលពីថ្ងៃទី២៤ ខែមករា ឆ្នាំ២០២៣ កន្លងទៅនេះ។

យោងតាមការផ្តល់កិច្ចសម្ភាសន៍តាមរយៈប្រព័ន្ធតេឡេក្រាម ប្រធានសមាគមទេសចរណ៍កម្ពុជាលោកស្រី ឆាយ សៀវលីន បានបង្ហាញការពេញចិត្តជុំវិញការកែលម្អព្រលានយន្តហោះខេត្តបាត់ដំបងថានេះជាការល្អ ហើយក៏ដល់ពេលដែលកម្ពុជាចាប់ផ្តើមជួសជួល និងកែលម្អព្រលានយន្តហោះឡើងវិញដើម្បីបម្រើដល់ភ្ញៀងទេសចរណ៍ជាតិ និងអន្តរជាតិជាពិសេសការដឹកជញ្ជូនឲ្យបានគ្រប់វិស័យ ទាំងផ្លូវគោក ផ្លូវទឹក និងផ្លូវអាកាសផងដែរ។

លោកស្រីបានបន្ថែមថា អ្វីៗបានត្រឡប់មករកភាពប្រសើរឡើងវិញក្រោយសង្រ្គាមស៊ីវិល និងក្រោយរងគ្រោះដោយវិបត្តិកូវីដ-១៩ ដូច្នេះហើយត្រូវស្តារ និងអភិវឌ្ឍឡើងវិញឲ្យបានគ្រប់វិស័យជាពិសេសហេដ្ឋារចនាសម្ព័ន្ធការដឹកជញ្ជូនត្រូវឲ្យមានភាពសម្បូរបែប។ ព្រោះវានឹងជួយជំរុញវិស័យដឹកជញ្ជូនភ្ញៀងទេសចរណ៍ជាតិ និងអន្តរជាតិមកកាន់ខេត្តនេះកាន់តែច្រើនហើយខេត្តបាត់ដំបងជាខេត្តដែលមានសក្តានុពលសម្បូរទៅដោយវប្បធម៌ តំបន់ប្រវត្តិសាស្ត្រ និងតំបន់ធម្មជាតិ តំបន់អេកូទេសចរណ៍កែច្នៃផងដែរ។

ពិសេសនឹងមានការវិនិយោគមកកាន់ខេត្តនេះកាន់តែច្រើននិងជួយបង្កើនឱកាសការងារដល់ប្រជាពលរដ្ឋ។

លោកស្រីបានបញ្ជាក់ថា៖ «យើងគួរតែមានការកែលម្អ ហើយយើងមានព្រលាននេះរួចទៅហើយមិនមែនធ្វើថ្មីទេ យើងគ្រាន់តែកែលម្អឲ្យប្រើប្រាស់បាន ច៊ឹងគួរតែធ្វើ យើងមិនបានទៅធ្វើកន្លែងថ្មីឯណា»។

ម្យ៉ាងវិញទៀតអ្នកស្រីក៏បានបន្ថែមថា ការកែលម្អព្រលានយន្តហោះខេត្តបាត់ដំបងនេះមិនមានផលប៉ះពាល់អ្វីទេ ព្រោះវាជាព្រលានយន្តហោះដែលមានស្រាប់ ហើយផ្ទុយទៅវិញ មានតែការសាទរពីប្រជាពលរដ្ឋក្នុងខេត្តនេះព្រមទាំងប្រែមុខមាត់ថ្មី។

លោកស្រីបន្តថា ប្រសិនបើយើងកែលម្អព្រលានយន្តហោះនេះហើយ គឺវាអាចបម្រើវិស័យទេសចរណ៍នៅខេត្តបាត់ដំបងបានកាន់តែច្រើនពិសេសភ្ញៀងទេសចរណ៍នឹងមានភាពងាយស្រួលធ្វើដំណើរមកកាន់ខេត្តមួយនេះ។

ដោយឡែក ប្រធានការិយាល័យគ្រប់គ្រងឧស្សាហកម្មទេសចរណ៍នៃមន្ទីរទេសចរណ៍ខេត្តបាត់ដំបង លោក ហម អរុណ ក៏បានលើកឡើងស្រដៀងគ្នានឹងប្រធានសមាគមទេសចរណ៍កម្ពុជាដែរ ថាការកែលម្អប្រលានយន្តហោះខេត្តបាត់ដំបងនេះជារឿងដ៏ល្អដើម្បីបម្រើដល់វិស័យដឹកជញ្ជូនតាមផ្លូវអាកាសពិសេសការធ្វើដំណើររបស់ភ្ញៀវទេសចរដែលចង់មកខេត្តនេះចំណេញពេលវេលាក្នុងការធ្វើដំណើរ។

លោកបន្តថា ការរៀបចំជួសជួលព្រលានយន្តហោះនេះវាមិនមានផលប៉ះពាល់អ្វីខ្លាំងឡើយ ហើយក៏ជាការចំាចាច់ក្នុងការកែលម្អព្រលាននេះឡើងវិញសម្រាប់ខេត្តដែលមានសក្តានុពលខ្លាំង។

លោកបញ្ជាក់ថា៖ «ខេត្តបាត់ដំបងជាគោលដៅទេសចរណ៍ប្រកបដោយសក្តានុពល មានទាំងធនធានធម្មជាតិ វប្បធម៌ តំបន់ប្រវត្តិសាស្រ្ត អេកូទេសចរណ៍ ក៏ដូចជាមានលក្ខណៈពិសេសជាច្រើនទៀតដែលជាចំណុចលេចធ្លោរសម្រាប់ប្រទេសកម្ពុជា ហើយបច្ចុប្បន្នខេត្តនេះកំពុងមានកំណើនភ្ញៀវទេសចរជាតិនិងអន្តរជាតិមកកំសាន្តក្រោយវិបត្តិកូវីដ-១៩ បានធូរស្រាល»។

ដូច្នេះហើយការកែលម្អព្រលានយន្តនេះពិសេសជាមានសារៈសំខាន់ក្នុងការជួយលើកស្ទួយឲ្យវិស័យទេសចរណ៍នឹងជួយជំរុញសេដ្ឋកិច្ចខេត្តឲ្យមានការរីកចម្រើន។

សូមជម្រាបផងដែរថា បើតាមការបញ្ជក់ពី លោក សុខ លូ អភិបាលខេត្តបាត់ដំបងថា៖ «នៅមិនទាន់កំណត់ពេលវេលាជាក់លាក់នឹងបើកការដ្ឋាននៅពេលណាទេ ប៉ុន្តែរដ្ឋាភិបាលកម្ពុជាបានឯកភាពឱ្យមានការសិក្សាប្រែក្លាយព្រលានយន្តហោះខេត្តបាត់ដំបងជាព្រលានយន្តហោះថ្នាក់ ៤C ប្រហាក់ប្រហែលនឹងព្រលានយន្តហោះខេត្តសៀមរាបបច្ចុប្បន្ន»៕

អាជីវកផ្សារទួលសង្កែរបានប្រមូលផ្ដុំគ្នានៅមុខក្រសួងមហាផ្ទៃក្រោយពីក្រសួងបានកោះហៅតំណាងរបស់ខ្លួនបីនាក់ចូលឆ្លើយបំភ្លឺនៅទីនោះ។

នៅថ្ងៃចន្ទ ទី៣០ ខែមករា ឆ្នាំ២០២៣ អាជីវកនៅផ្សារទទួលសង្កែ ហៅថាផ្សារសាមហាន បានប្រមូលផ្ដុំគ្នានៅមុខក្រសួងមហាផ្ទៃដើម្បីលើកទឹកចិត្ដតំណាងរបស់ខ្លួនបីនាក់ចូលទៅឆ្លើយបំភ្លឺនៅក្រសួង ពាក់ពន្ធ័នឹងបណ្ដឹងរបស់ម្ចាស់ផ្សារ។

អ្នកស្រី ផា សុភណ្ឌ័ អាយុ៣៥ឆ្នាំជាអាជីវកនៅផ្សារទួលសង្កែបានប្រាប់ Newsroom Cambodia ថាអ្នកស្រីមកនេះគឺដើម្បីលើកទឹកចិត្ដតំណាងរបស់ខ្លួនដែលត្រូវបានម្ចាស់ផ្សារប្ដឹង ពីបទញុះញង់ ប៉ុន្តែអ្នកស្រីថាការតវ៉ានោះគឺអាជីវករទាំងអស់ធ្វើឡើងដោយស្ម័គ្រចិត្ដទាំងអស់គ្នាដោយសារតែម្ចាស់ផ្សារតំរូវឱ្យអាជីវករទាំងអស់ត្រូវតែទៅទិញសិទ្ធិសារជាថ្មីដែលមានតម្លៃថ្លៃជាងមុន។

លោកស្រីលើកឡើងថា៖ «គេតំរូវឱ្យពួកខ្ញុំទៅទិញសិទ្ធិក្នុងតូបកែង(តម្លៃ)៣៥៧៨(ដុល្លា)តូបបន្ទាប់មកកែង ២៥៧៨(ដុល្លា) តូបបន្តបន្ទាប់ ១៥៧៨(ដុល្លា) ជាលុយដាច់(លុយគ្រប់ចំនួន) ពីឆ្នាំដាច់ (រយៈពេល) គេគិតពីគេចូលមកខែបីហ្នឹង[…] ចឹងពួកខ្ញុំអត់មានលទ្ធភាពចឹង ពួកខ្ញុំតវ៉ាដើម្បីកុំឱ្យគាត់ធ្វើចឹង ឱ្យគាត់ធ្វើដូចថៅកែចាស់»។

អ្នកស្រីថាការថៅកែចាស់នៅគ្រប់គ្រង់គឺអាជីវករបង់ប្រចាំខែធម្មតាហើយលុយប្រចាំឆ្នាំ គេយកតាមជួរ មួយជួរ រយៈពេលពីរឆ្នាំ តែ៥០០ដុល្លាទេ។

លោកស្រីបន្តថា៖ «គេតំរូវឱ្យយើងមួយតូបហ្នឺង តូបកែង ៣៥៧៨ដុល្លាគឺលុយដាច់ហើយឱ្យយើង(បង់) ប្រចាំខែ ២០០ដុល្លាអីទៀតតាមតូបទៀត[…] គេប្ដឹងអាជីវករថាបីនាក់តវ៉ាដោយស្ម័គ្រចិត្ដ អត់មានណាគេបង្ខំពួកខ្ញុំទេ»។

អាជីវករម្នាក់ទៀតគឺអ្នកស្រី ទី លាត់ អាយុ៤២ឆ្នាំបានប្រាប់ NewsroomCambodia ថាពួកគាត់មកនេះគឺដោយសារមានគេប្ដឹងអាជីវករថាដើរញុះញង់ឱ្យបះបោរ តែការពិតអាជីវករទាំងអស់ គឺធ្វើឡើងដោយស្ម័គ្រចិត្ដ អត់មានអ្នកណាញុះញង់ ឬបង្ខំអ្នកណាទេគឺខាងថៅកែផ្សាអាជីវករ។

អ្នកស្រីបានលើកឡើងថា៖ «ពួកខ្ញុំមកហ្នឹងគឺមកគាំទ្រតំណាងរបស់ខ្ញុំ លើកទឹកចិត្ដគាត់ព្រោះគាត់មកហ្នឹងមានខាងម្ចាស់ផ្សារគាត់ប្ដឹងថាគាត់ដើរញុះញង់អាជីវករដើម្បីឱ្យបះបោតែការពិតអត់មានទេកូន។ អត់មានទេពួកខ្ញុំមកនេះគឺដោយសុខចិត្ដ ហើយពួកខ្ញុំតវ៉ាហ្នឹងគឺដោយសុខចិត្ដអត់មានអ្នកណាបង្ខំអ្នកណាអត់មានអ្នកណាញុះញង់អ្នកណាទេ»។

តំណាងអាជីវករលោក ស៊្រុន ភី បានប្រាប់ NewsroomCambodia ថាការចោទមកលើលោកពីបទញុះញង់នេះគឺលោកច្រានចោលទាំងស្រុងការតវ៉ានេះគឺជាកំលាំងសាមគ្គីរួម លោកថាលោកមិនបានញុះញង់ ឬក៏ហៅឱ្យអាជីវករទាំងធ្វើសកម្មភាពផ្សេងៗនោះទេរាល់ការតវ៉ាគឺធ្វើឡើងដោយស្ម័គ្រចិត្ដពីអាជីវករគ្រប់គ្នា។

លោកលើកឡើងថាពាក់ពន្ធ័ហ្នឹងដំណោះស្រាយថ្ងៃហ្នឹង[…]គាត់គ្រាន់តែឱ្យយើងមកស្រាយបំភ្លឺទេទៅតាមពាក្យបណ្ដឹងរបស់តំណាងផ្សារ ចងគាត់ឱ្យយើងមកស្រាយបំភ្លឺទៅ។ ហើយយ៉ាងណាម៉ិញ មានការកោះហៅ ឬយ៉ាងម៉ិច ពួកគាត់នឹងចូលរួមបន្តទៀត។

នៅថ្ងៃចន្ទនេះ Newsroom C​​ambodia មិនអាចសុំការឆ្លើយបំភ្លឺពីតំណាងផ្សារទួលសង្កែ បានទេដោយសារគ្មានលេខទូរស័ព្ទទំនាក់ទំនង៕

កម្ពុជាបដិសេធចោលទាំងស្រុងចំពោះការផ្សព្វផ្សាយព័ត៌មានមិនពិត ដែលថាប្រទេសកម្ពុជា ជាប្រទេសដែលបានផ្ដល់ជំនួយយោធាដល់អ៊ុយក្រែន។

យោងតាមសេចក្តីថ្លែងការណ៍ជាភាសាអង់គ្លេសរបស់ក្រសួងការបរទេស និងសហប្រតិបត្តិការអន្តរជាតិលើកឡើងថា នៅក្នុង Channel Telegram ឈ្មោះថា «Demografiya upala» បានផ្សាយនៅឈ្មោះប្រទេសដែលផ្តល់ជំនួយយោធា ផ្តល់ជំនួយមនុស្សធម៌ដល់អ៊ុយក្រែន ប្រទេសអព្យាក្រឹត្យ និងប្រទេសដែលគាំទ្រប្រទេសរុស្ស៊ី។ ក្នុងកាផ្សាយ Channel Telegram ផ្សាយថាស្ថិតក្នុងបណ្តាប្រទេសដែលផ្តល់ជំនួយយោធាឱ្យអ៊ុយក្រែន។

ក្រសួងការបរទេសបញ្ជាក់នៅក្នុងសេចក្តីថ្លែងការណ៍ថា៖ «ជំរុញឱ្យបណ្តាញតេឡេក្រាម «Demografiya upala កែតម្រូវការបោះពុម្ពផ្សាយខាងលើ ដោយមើលឃើញថា ការប្រមូលផ្តុំគ្នានេះមិនត្រឹមតែមិនត្រឹមត្រូវទេ ប៉ុន្តែអាចបង្ហាញឱ្យឃើញពីការបំផ្លាញដល់ប្រទេសកម្ពុជា ដែលជាសន្តិភាព។ កម្ពុជាជាប្រទេសស្រលាញ់ ដែលប្រកាន់ខ្ជាប់នូវគោលនយោបាយការបរទេស អព្យាក្រឹតភាព ដូចមានចែងក្នុងរដ្ឋធម្មនុញ្ញ។»

សេចក្តីថ្លែងការណ៍ដដែល៖ «ការសម្រេចចិត្តផ្ដល់ជំនួយផ្នែកបណ្ដុះបណ្ដាលបច្ចេកទេស បោសសម្អាតមីន(ដោះគ្រាប់មីន) ដល់អ្នកដោះមីនមកពីប្រទេសអ៊ុយក្រែន នៅក្នុងប្រទេសកម្ពុជា គឺក្រោមកិច្ចសហប្រតិបត្តិការជាមួយអង្គការ JICA ដែលធ្វើឡើងដោយផ្អែកលើគោលការណ៍មនុស្សធម៌សុទ្ធសាធ ដូចគ្នាទៅនឹងបេសកកម្មរក្សាសន្តិភាពរបស់កម្ពុជា ក្រោមឆ័ត្រអង្គការសហប្រជាជាតិ នៅក្នុងតំបន់អាហ្វ្រិក និងមជ្ឈិមបូព៌ា។»

គួបញ្ជាក់ផងដែរថា ថ្នាក់ដឹកនាំនៃប្រទេសកម្ពុជា និងជប៉ុនគាំទ្រ មណ្ឌលសកម្មភាពកំចាត់មីន(GMAC) និងរៀបចំការហ្វឹកហ្វឺនជូនមន្ត្រីជំនាញសកម្មភាពមីននៃ អង្គភាពផ្តល់សេវាកម្មរដ្ឋក្នុងគ្រាអាសន្ននៃប្រទេសអ៊ុយក្រែន (State Emergency Service of Ukraine) ដែលហៅកាត់ថា (SESU)នៅកម្ពុជា ក្នុងខែមករា ឆ្នាំ២០២៣ លើការប្រើប្រាស់សម្ភារៈបច្ចេកទេសបោសសម្អាតមីនជាពិសេសឧបករណ៍មីនប្រភេទ (ALIS) ផលិតនៅប្រទេសជប៉ុន៕

សហព័ន្ធសហជីពសេរីកម្មករ នៃព្រះរាជាណាចក្រកម្ពុជា(PTUWKC)បានធ្វើការអំពាវនាវនិងសំណូមពរយ៉ាងទទូចសូមឲសមត្ថកិច្ចគ្រប់ជាន់ថ្នាក់ ជាពិសេសរាជរដ្ឋាភិបាលកម្ពុជាស្វែងរកមុខឃាតករពិតប្រាកដ និង អ្នកបញ្ជាពីក្រោយខ្នងដែលបានសម្លាប់លោក ជា វិជ្ជា កាលពីថ្ងៃទី២២ ខែមករា ឆ្នាំ២០០៤ យកមកផ្តន្ទាទោសតាមច្បាប់ជាធរមាន ដើម្បីផ្ដល់ពន្លឺយុត្តិធម៌ដល់ក្រុមគ្រួសារ សាច់ញាតិជនរងគ្រោះ និង ឈានទៅលុបបំបាត់វប្បធម៌និទណ្ឌភាព និងពង្រឹងយុត្តិធម៌សង្គមនៅកម្ពុជា។

សហជីពសេរីកម្មករបានធ្វើការអំពាវនាវនេះតាមរយៈសេចក្តីថ្លែងការណ៍របស់ខ្លួនក្នុងពិធីជួបជុំដាក់កម្រងផ្ការំលឹកខួប១៩ឆ្នាំនៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករ កាលពីថ្ងៃទី២២ ខែមករាឆ្នាំ២០២៣ នៅឯទីតាំងតំកល់រូបសំណាកលោក ជា វិជ្ជា។

លោក ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់ Newsroom Cambodia នៅថ្ងៃអង្គារ៍នេះថាសំណុំរឿងនៅពេលដែលរកមិនទាន់ឃើញក្រសួងក៏នៅចំហរនៅឡើយទេ មិនបិទសំណុំរឿងនោះចោលទេ គ្រាន់តែសំណុំរឿងហ្នឹង វាស្មុគស្មាញ វាជំពាក់វាក់វិនច្រើន ហើយវាពិបាករកព្រោះរកទៅវាដាច់។

«ឧទាហរណ៍:អ្នកដឹងរឿងគាត់រត់ចោលស្រុក ដល់ចឹងសមត្ថកិច្ចបាត់ភស្តុតាង បាត់សាក្សីអីចឹងទៅ វាដាច់ដោយដុំយើងមិនអាចស្រាវជ្រាវដល់ទីចុងបំផុតបានចឹង យើងត្រូវប្រើពេលវេលាយូរ ប៉ុន្តែយើងមិនទាន់បានបិទសំណុំរឿងនៅឡើយទេបាទ។»

លោកបានបន្តថា «ចំពោះសេចក្តីថ្លែងការណ៍វាដដែលជារៀងរាល់ឆ្នាំវាមានហើយ វាអត់មានអីថ្មីទេ បើគេមិនចេញសេចក្តីថ្លែងការណ៍ ទើបវាចម្លែក។ ខាងអាជ្ញាធរក៏គាត់ធ្វើដែរ បុិនរកវាមិនទាន់ឃើញ។ យើងមិនព្រងើយកន្តើយទេ ហើយយើងអំពាវនាវទៀតអ្នកទាំងឡាយណាដែលមានព័ត៌មានពាក់ព័ន្ធសូមឲផ្តល់មកសមត្ថកិច្ចថែមទៀតទោះបីអ្នកណាក៏ដោយ ឱ្យតែមានព័ត៌មានហ្នឹង យើងជួយគ្នា ជួយផ្តល់ពត៌មានសហការគ្នាហើយសហការគ្នា នាដោយស្មារតីស្មោះត្រង់ មិនមែនសហការចាប់ដៃជាន់ជើងទេ៕»

ស្ថាបនិកនៃគម្រោង Ladies in Tech បានលើកទឹកចិត្តឱ្យស្ដ្រីនិងក្មេងស្រី ចូលរួមក្នុងវិស័យបច្ចេកវិទ្យាឱ្យបានច្រើន ដើម្បីសម្របនឹងបដិវត្តឧស្សាហកម្ម៤.០។

កញ្ញាកៅ ម៉េងហ័ង ជាសិស្សថ្នាក់ទី១២ នៃវិទ្យាល័យហ៊ុនសែនពាមជីកង ជាស្ថាបនិកនៃគម្រោង Ladies in Tech ដែលជាគម្រោងមួយដែលជួយជម្រុញឱ្យស្ត្រី និងក្មេងស្រីចូលរួមក្នុងវិស័យបច្ចេកវិទ្យា។

ក្នុងឆ្នាំ២០២០ កញ្ញាបានចូលរួមក្នុងកម្មវិធី Technovation Girls Cambodia ហើយក៏បន្តចូលរួមក្នុងកម្មវិធីនេះ ៣ឆ្នាំជាប់ៗគ្នារហូតដល់ឆ្នាំ ២០២២ កញ្ញាក៏ទទួលបានជ័យលាភីឯកផ្នែក Senior។ កញ្ញាបានបង្កើតកម្មវិធីទូរស័ព្ទដៃ ៣ខុសៗគ្នាដើម្បីជួយដល់សហគមន៍របស់កញ្ញា ព្រមទាំងធ្លាប់ចូលរួមក្នុងកម្មវិធី The 11th E-icon World Contest ដែលសហការជាមួយសមាជិកក្រុមនៅប្រទេសកូរ៉េ ដែលបានបង្កើតកម្មវិធីទូរស័ព្ទដៃមួយដើម្បីជួយកាត់បន្ថយបញ្ហាបម្រែបម្រួលអាកាសធាតុ និងបានចូលរួមកម្មវិធីជាច្រើនទៀត។

កញ្ញាបានបន្តថា៖ «វិស័យបច្ចេកវិទ្យា បានរួមចំណែកដ៏ធំមួយក្នុងការផ្លាស់ប្តូរជីវិតរបស់ខ្ញុំ ដោយបានផ្តល់នូវចំណេះជំនាញជាច្រើនដល់ខ្ញុំ ក្នុងការវិភាគដោះស្រាយបញ្ហា ការគិតបែបច្នៃប្រឌិត និងជំនាញក្នុងការបង្កើតថ្មីផងដែរ»។

កញ្ញាបានជួបនឹងបញ្ហាប្រឈមមួយចំនួនដូចជា ការគ្រប់គ្រងពេលវេលា បញ្ហាកម្រិតចំណេះជំនាញបច្ចេកវិទ្យា តែទោះបី មានពេលតិចតួច ក៏កញ្ញាខិតខំកំណត់ គោលដៅ ផែនការ ច្បាស់លាស់ និងចំណាយពេលសិក្សា តាម Internet។

កញ្ញាបន្ថែមថាវិស័យនេះពិតជាមានសារៈសំខាន់ ក្នុងសង្គមសព្វថ្ងៃ យ៉ាងហោចណាស់ត្រូវតែមានចំណេះជំនាញបច្ចេកវិទ្យាក្នុងខ្លួនបន្តិចបន្តួច ដើម្បីសម្របនឹងសង្គមបច្ចុប្បន្ន។

ជាចុងក្រោយកញ្ញាបាន ផ្តាំផ្ញើរទៅកាន់ប្អូននារីៗទាំងអស់ថា៖ «វិស័យបច្ចេកវិទ្យាគឺមិនមែនសម្រាប់តែក្មេងប្រុសនោះទេ វាគឺសាកសមទាំងចំពោះក្មេងប្រុស និងក្មេងស្រី។ ដូច្នេះប្រសិនបើអ្នកទាំងអស់គ្នាស្រឡាញ់ចូលចិត្តក្នុងវិស័យនេះ អ្នកទាំងអស់គ្នាត្រូវកំណត់គោលដៅឱ្យច្បាស់ ហើយសូមដើរតាមក្តីសុបិនរបស់អ្នកទាំងអស់គ្នា ទោះបីជាជួបឧបសគ្គយ៉ាងណាក៏ដោយ។ ខ្ញុំជឿថាអ្នកអាចធ្វើបាន»៕

ក្រសួងធនធានទឹកនិងឧតុនិយម បានចេញសេចក្ដីជូនដំណឹងបន្ថែម ថាតំបន់ខ្ពង់រាប និងភាគពាយ័ព្យនឹងមានស្ថានភាពចុះត្រជាក់ខ្លាំងចាប់ពីថ្ងៃទី២៩ ដល់៣០ មករា ឆ្នាំ២០២៣។

ក្នុងសេចក្ដីជូនដំណឹង បានឱ្យដឹងពីការវិវត្តស្ថានភាពអាកាសធាតុ ចាប់ពីថ្ងៃទី២៧ រហូតដល់ថ្ងៃទី៣០ មករា ឆ្នាំ២០២៣ ដោយទ្រនុងសម្ពាធខ្ពស់ពីចិន និងខ្យល់មូសុងឦសាន្ត បន្តបង្កើនឥទ្ធិពលក្នុងកម្រិតពីបង្គួរ ទៅខ្លាំងមកលើកម្ពុជា។

ក្រសួងបានបញ្ជាក់ ពីអាកាសធាតុចុះត្រជាក់បន្ថែម ជាពិសេស នៅថ្ងៃទី២៩-៣០ មករា តាមបណ្តាខេត្តនៅតំបន់ខ្ពង់រាប និងតំបន់ភាគពាយ័ព្យដោយសីតុណ្ហភាពអប្បបរមានៅ បណ្តាខេត្តទាំងនោះ អាចធ្លាក់ចុះត្រជាក់ខ្លាំង រហូតដល់ ១៤-១៦អង្សាសេ។

ខេត្តដទៃទៀត សីតុណ្ហភាពអប្បបរមាមានពី ១៧-២១អង្សាសេ។ ក្នុងរាជធានីភ្នំពេញ សីតុណ្ហភាពអប្បបរមាអាចធ្លាក់ចុះដល់ ២០អង្សាសេ ហើយបន្ទាប់ពីនោះរហូតដល់ថ្ងៃទី០៥ កុម្ភៈ សីតុណ្ហភាពនឹងវិលមកជាធម្មតាវិញ។

ក្រសួងក៏បានអំពាវនាវផងដែរថា៖ «សូមសាធារណជន ទទួលជ្រាបជាព័ត៌មាន និងបន្តបង្កើនការប្រុងប្រយ័ត្នចំពោះស្ថានភាពធាតុអាកាសចុះត្រជាក់»៕